Bu azalmanın Azərbaycana təsiri ola bilərmi?
Dizel qıtlığı ilə bağlı problemi “Bloomberg” agentliyinə şərh edən analitiklərin fikrincə, ehtiyatların hazırkı səviyyəsi qış aylarında iqtisadiyyatın tələbatını ödəməyə kifayət etməyə bilər. Əgər təchizatla bağlı hər hansı bir pozulma və ya tələbin gözlənilməz artımı baş verərsə, bu yanacaq növünün qiymətində kəskin artım baş verə bilər.
Beynəlxalq ekspertlərin fikrincə, hazırda xüsusilə Avropada və ABŞ-ın Atlantik sahillərində vəziyyət gərgindir. Hətta yaxın aylarda Şimali və Qərbi Avropada dizel ehtiyatlarının azalacağı proqnozlaşdırılır. Qeyd olunur ki, hazırda neft emalı zavodları daha yüngül neft növlərinin istehsalına üstünlük verirlər ki, bu da dizel yanacağının istehsalının azalmasına səbəb olub.
Əksər analitiklər qeyd edirlər ki, hətta Çinin yanacaq ixracına yeni kvotalar verməsi də vəziyyəti kökündən yaxşılaşdırmağa kifayət etməyəcək. Belə ki, tikinti sektorundakı problemlərə baxmayaraq, Çindən daxili tələb gözləniləndən yüksək olub. Nəşrin məlumatında daha sonra bildirilir ki, qlobal iqtisadiyyat qış mövsümü ərəfəsində dizel yanacağı ehtiyatlarının tarixi minimumuna yaxınlaşıb. Bu isə qarşıdakı aylarda tədarük zəncirlərində hər hansı bir pozulma yaranacağı təqdirdə kəskin qiymət artımına gətirib çıxaracaq.
Məlum olduğu kimi, hazırda Azərbaycanda dizel yanacağından geniş istifadə olunur. Təkcə onu qeyd etmək kifayətdir ki, Azərbaycan hökuməti 2023-cü ildə ölkədə dizel istehsalını 2 milyon 533 min ton səviyyəsində proqnozlaşdırır. Proqnozlara görə, ölkəmizdə 2024-cü ildə 2 milyon 542,6 min ton, 2025-ci ildə 2 milyon 536,5 min ton, 2026-cı ildə isə 2 milyon 535,6 min ton dizel yanacağı istehsal ediləcək. Göründüyü kimi, 2023-2026-cı illərdə Azərbaycanda dizel yanacağının istehsalı 0,1 faiz artacaq. Yeri gəlmişkən, Heydər Əliyev adına Neft Emalı Zavodunda həyata keçirilən yenidənqurma və modernləşdirmə layihəsi çərçivəsində 2023-cü ilin ikinci rübündən etibarən “Avro-5” standartına uyğun dizel yanacağının istehsalına başlanılıb. Hazırda Azərbaycanda dizel yanacağının bir litri 80 qəpiyə satılır.
Bəs, dünyada dizel qıtlığı ilə bağlı narahatlığın ölkəmizə təsiri ola bilərmi? Ekspertlər hesab edirlər ki, mövcud vəziyyətdə Azərbaycanda dizelin qiymətinin bahalaşacağı inandırıcı görünmür. Çünki istehsalatda və yükdaşımada xüsusi paya malik olan bu yanacağın qiyməti dövlət tərəfindən tənzimlənir. Onların fikrincə, ölkədə kifayət qədər dizel yanacağının istehsal olunması da qiymətləri sabit saxlamağa kömək edə bilər.
İlham ŞABAN,
Neft Araşdırmaları Mərkəzinin rəhbəri
Son günlər “Bloomberg” agentliyinin dünyada dizel yanacağının qıtlığı ilə bağlı yaydığı məlumat geniş müzakirələrə səbəb olub. Bu da ondan qaynaqlanır ki, son 30 ildə Şimal yarımkürəsində və Amerika Birləşmiş Ştatlarında dizel yanacağı ehtiyatında azalma qeydə alınıb. Əslində bu, adi bir statistikadan başqa bir şey deyil. Qarşıdan gələn isitmə mövsümünün dizel qıtlığı ilə bağlı heç bir əlaqəsi yoxdur. Çünki bu mövsümdə dizelə yox, mazuta tələbat artır. Belə ki, qış aylarında isitmə mənbəyi olan qazanxanalar məhz bu yanacaqla işləyir.
Məlum olduğu kimi, son illər inkişaf etmiş ölkələrdə dizel yanacağına tələbat getdikcə aşağı düşür. Bu da ondan irəli gəlir ki, həmin ölkələrdə dizellə işləyən avtomobillərin istehsalı ilbəil azalır. Belə bir şəraitdə dizel yanacağı ehtiyatlarının azalması da təbii prosesdir. Digər tərəfdən, Rusiya– Ukrayna müharibəsində tanklardan tutmuş bütün hərbi texnikaların 90 faizi dizel yanacağı ilə işləyir. Hazırda əksər Avropa ölkələri öz ehtiyatlarının bir hissəsini məhz Ukraynaya göndərir. Bu da dizel ehtiyatlarının azalmasına gətirib çıxarır.
Üçüncü bir tərəfdən, 2023-cü il fevral ayının 5-dən Rusiyanın neft məhsullarının Avropada satışına sanksiya qoyulub. Hansı ki, Rusiya Avropa bazarında ən çox dizel satan ölkə idi. İndi isə Hindistana və digər ölkələrə ixrac edir.
Bu məsələdə mən başqa bir narahatedici məqam görmürəm. Bu, bir növ onu xatırladır ki, adətən, sentyabrın sonu, oktyabrın əvvəlində birdən-birə qazın və ya neftin qiymətində artım müşahidə olunur. Belə bir şəraitdə çoxları düşünür ki, qış mövsümü olduqca sərt keçəcək. Amma bəzən tamamilə bunun əksi baş verir. Düşünürəm ki, dizel qıtlığı ilə bağlı məlumatlar süni ajiotajdan başqa bir şey deyil.
Bir məqamı da qeyd edim ki, son günlər Avropada 1990-cı ildən sonra mazut xam neftdən ilk dəfə baha satılıb. Bu da ondan irəli gəlir ki, qaz anbarları olmayan ölkələr ehtiyat kimi məhz mazuta üstünlük verirlər. Çünki mazutun saxlanması çox asan və əlverişlidir. Belə ki, bu yanacaq növünün tədarükü üçün, sadəcə, dəmir çən kifayət edir.
Azərbaycanda da son günlər bu xəbər müəyyən narahatlıq yaradıb. Düşünürəm ki, buna heç bir əsas yoxdur, bunun ölkəmizə hər hansı bir təsiri gözlənilmir. Çünki Azərbaycan nə Avropaya, nə Amerikaya, nə də inkişaf etmiş digər ölkələrə dizel yanacağı satır. Dizel yalnız Gürcüstana ixrac olunur. Eyni zamanda, ölkəmiz bu yanacaq növünü idxal də etmir. Dizel keyfiyyəti aşağı olan yanacaq növüdür. Ölkəmizdə onun istehsalı və istifadəsi dövlət tərəfindən tənzimlənir. Bu prosesin isə dünya bazarı ilə də heç bir əlaqəsi yoxdur.
M.QULİYEV, “Xalq qəzeti”