Bu ölkənin Azərbaycanın “mavi yanacağ”ına tələbatı yüksəkdir
Yaxın vaxtlarda Azərbaycandan Macarıstana nəql olunan qazın həcmi təqribən 1 milyard kubmetrə çatdırılacaq. Bununla bağlı Budapeşt və Bakı arasında siyasi saziş imzalanıb.
Bu barədə Macarıstanın xarici işlər naziri Peter Siyarto məlumat verib. Onun sözlərinə görə, 2023-cü ilin dördüncü rübündə Macarıstan Azərbaycandan 100 milyon kubmetr qaz alacaq. Nazir əlavə edib ki, Macarıstan uzun müddətdir ki, Azərbaycanla əməkdaşlığı inkişaf etdirir və siyasi saziş qaz tədarükünün daha da artırılaraq bir milyard kubmetrə çatdırmağı nəzərdə tutur.
Peter Siyartonun bildirdiyinə görə, yeni sazişə əsasən, Macarıstan rezervuarlarında 50 miyon kubmetr Azərbaycan qazının saxlanmasına dair razılaşma da əldə edilib. O, həmçinin qeyd edib ki, Macarıstan hazırda qaz tədarükünün şaxələndirilməsi üzərində işləyir və Ekvadordan neft idxalı imkanlarını nəzərdən keçirir.
Xatırladaq ki, bundan əvvəl Macarıstanın MVM CEEnergy enerji şirkəti ilə Azərbaycanın neft-qaz şirkəti SOCAR arasında 2023-cü ilin sonuna qədər Macarıstana ildə 2 milyard kubmetrə qədər mümkün artımla 100 milyon kubmetr qaz tədarük edilməsi haqqında saziş imzalanıb.
“Xalq qəzeti”
