Azərbaycanın Dövlət Neft Şirkəti ilə dünyanın 6 ölkəsinin 11 tanınmış neft şirkəti arasında 1994-cü il sentyabrın 20-də “Xəzər dənizinin Azərbaycan sektorunda “Azəri”, “Çıraq” yataqlarının və “Günəşli” yatağının dərinlikdə yerləşən hissəsinin birgə işlənməsi və hasilatın pay bölgüsü haqqında” Sazişin imzalanması müstəqil dövlətimizi qarşıya qoyduğu məqsədlərə doğru aparan böyük bir yolun başlanğıcı olub.
Bu saziş, eyni zamanda, təbii sərvətlər amilinin Azərbaycanın gələcək inkişafındakı rolu barədə ictimai düşüncəyə hakim kəsilən mücərrəd təsəvvürləri konkretləşdirdi, qarşıdakı istiqamətlərə aydınlıq gətirdi. Azərbaycan, eyni zamanda, “Əsrin müqaviləsi” ilə özünün təbii sərvətlərinə sahib çıxmaq haqqını bütün dünyaya bəyan etdi, milli mənafeləri, iqtisadi və strateji maraqları qorumaq əzmini sərgilədi. Bir sözlə, bu müqavilə dövlət müstəqilliyimizin mühüm təminatına çevrildi. “Azəri–Çıraq–Günəşli” (AÇG) yataqlarından hasilat isə 20 il əvvəl – 1997-ci ilin noyabr ayında başladı. İlkin hesablamalara görə, “Azəri”, “Çıraq” yataqlarının və “Günəşli” yatağının dərinlikdə yerləşən hissəsində çıxarıla bilən neft ehtiyatı 511 milyon ton olsa da, sonralar yeni qiymətləndirmələrə əsasən, neft ehtiyatı 1.072 milyard ton həcmində müəyyənləşdirilib.
Altı il bundan əvvəl – 2017-ci il sentyabrın 14-də Prezident İlham Əliyev və birinci xanım Mehriban Əliyevanın iştirakı ilə Bakıda Xəzər dənizinin Azərbaycan sektorundakı “Azəri”, “Çıraq” yataqlarının və “Günəşli” yatağının dərinlikdə yerləşən hissəsinin birgə işlənməsi və neft hasilatının pay bölgüsü haqqında düzəliş edilmiş və yenidən tərtib olunmuş sazişin imzalanması mərasimi keçirildi. Saziş Azərbaycan Hökumətinin, SOCAR-ın, BP, “Chevron”, “Inpex”, “Statoil”, “ExxonMobil”, “TP”, “Itochu” və “ONGC Videsh” şirkətlərinin rəsmiləri tərəfindən imzalandı. Sənədə əsasən, BP layihənin operatoru olaraq qaldı. Saziş Milli Məclis tərəfindən həmin ilin oktyabrın 31-də ratifikasiya olundu.
Beləliklə, həmin tarix ölkəmizin həyatına çox əlamətdar bir gün kimi yazıldı, “Azəri-Çıraq-Günəşli” nəhəng neft yatağının işlənilməsində yeni dövr başlandı.
Sazişin bir hissəsi olaraq SOCAR-ın “Azəri-Çıraq-Günəşli” yatağındakı iştirak payı 11,65 faizdən 25 faizə qaldırıldı və beynəlxalq tərəfdaş şirkətlərin Dövlət Neft Fonduna 3,6 milyard dollar bonus ödəyəcəkləri qərara alındı. Azərbaycana çatacaq mənfəət neftinin səviyyəsinin isə 75 faiz təşkil edəcəyi nəzərdə tutuldu. Bununla da ölkəmizin ümumi mənfəət göstəricisi 89,1 faiz hesablandı ki, bu da gələcəkdə yeni strateji layihələrə başlamağa zəmin yaratmaq demək idi.
Bu məqamda Azəri–Çıraq–Günəşli (AÇG) və Şahdəniz yataqları üzrə gəlirlərə də nəzər salmaq istərdik. ARDNF-dən verilən məlumata görə, 2022-ci il üzrə AÇG yatağı üzrə əldə olunan ümumi gəlirlər 9 milyard 889 milyon ABŞ dolları təşkil edib. Hesabat dövründə “Şahdəniz” yatağından (qaz və kondensat) isə gəlirlərin həcmi 1milyard 443 milyon ABŞ dolları olub. O cümlədən, “Şahdəniz” yatağı üzrə kondensatın satışından əldə olunan gəlirlər ötən ilin ilk 6 ayında 328,567 milyon ABŞ dolları təşkil edib.
Bakı Enerji Həftəsi çərçivəsində keçirilən enerji forumunun panel iclasında BP şirkətinin hasilat və əməliyyatlar üzrə icraçı vitse-prezidenti Qordon Birrel Azərbaycanın AÇG yataqlar blokunun çox unikal neft-qaz mənbəyi olduğunu bildirib. Q.Birrel burada zəngin qaz ehtiyatlarının mövcudluğunu və bu potensialın reallaşdırılması istiqamətində tədbirlər həyata keçirildiyini vurğulayıb. Xatırladaq ki, adıçəkilən yataqlar blokunun hasilatda olan laylarının altında yerləşən dərin qatlardakı qaz ehtiyatlarının qiymətləndirilməsi prosesinə başlanılıb.
Bakı Enerji Forumunda çıxış edən BP-nin Azərbaycan, Gürcüstan və Türkiyə üzrə regional prezidenti Qari Counz isə cari il “Şahdəniz” yatağından hasilatın ən yüksək sabit səviyyəyə çatdırılmasının planlaşdırıldığını, bu mərhələdə yatağın ildə təxminən 26 milyard kubmetr qaz hasil edəcəyini, bununla da regional və Avropa bazarları üçün enerji təchizatının təhlükəsizliyinə və diversifikasiyasına əlavə töhfə veriləcəyini deyib.
O bildirib ki, hazırda “Şahdəniz” yatağından gündəlik 73 milyon kubmetr qaz hasil olunur və hasilatın tədricən artırılması davam etdirilir. “Şahdəniz” layihəsi demək olar ki, 100 faizə çatan fenomenal əməliyyat səmərəliliyinə malikdir. Eyni zamanda, BP yeni qaz mənbələri axtarır. Bu ilin əvvəllərindən başlayaraq “Şahdəniz”də istismarda olan məhsuldar layların altında daha çox qaz tapmaq üçün yeni kəşfiyyat quyusunun qazılması da həyata keçirilir və burada işin yaxın vaxtlarda yekunlaşdırılacağı nəzərdə tutulur.
Bakı Enerji Forumunda respublikamızdakı neft və qaz hasilatında karbonsuzlaşdırmanın və emissiyaların azaldılmasının yollarının axtarılması məsələsinə də toxunulub. Məsələn, BP tərəfindən Azərbaycanın yataqlarında məşəlin müntəzəm yanmasını aradan qaldırmaq istiqamətində müəyyən tədbirlərin həyata keçirilməsinə başlanılıb və emissiyaları 50 faiz azaltmaq üçün obyektlərdə metan detektorlarının quraşdırılması diqqət mərkəzində saxlanılıb. Onu da qeyd edək ki, uzaq məsafədən idarə ediləcəyi və onun əksər sistemləri və proseslərinin avtomatlaşdırılacağı nəzərdə tutulan “Azəri-Mərkəzi-Şərqi” (ACE) platformasının daha az karbonlu olması da nəzərdə tutulub.
Bütün bunlarla bərabər, BP tərəfindən “Şahdəniz” yatağında “Şahdəniz Alfa” platformasındakı dizel generatorlarının “Şahdəniz Bravo”nun qazla işləyən daha az emissiyalı generatorlarında hasil olunan enerji ilə əvəzlənməsi üçün də tədbirlər həyata keçirilir. Bu, “Şahdəniz Alfa”dan karbon tullantılarının azaldılmasını və platformanın istismar səmərəliliyinin artırılmasını şərtləndirir.
Eldəniz ƏMİROV,
enerji məsələləri üzrə ekspert
Azərbaycan neft ehtiyatlarına görə, dünyada 20-ci yerdə qərarlaşır. Qaz ehtiyatlarına görə isə belə deyil, ABŞ, İran, Rusiya, Qətər kimi ölkələrlə müqayisədə çox geridir. Buna görə də respublikamızın Avropa İttifaqının (Aİ) enerji təhlükəsizliyinin təmin edilməsində oynadığı rol 4-5 faiz həcmində qiymətləndirilir. Amma buna baxmayaraq, Azərbaycan tərəfindən Aİ ölkələrinin çox vacib nöqtələri qazla təmin olunur. Məsələn, Qərbi Avropa ölkələri okean üzərindən ABŞ-ın mayeləşdirilmiş təbii qazı (LNG) və Norveç “mavi yanacağ”ı ilə təchiz edilir. Şərqi Avropa ölkələrində isə məhz Azərbaycan qazına daha çox ehtiyac duyulur. Cənub Qaz Dəhlizi bu təchizatı gerçəkləşdirməyə imkan verir.
Bu dəhlizin sonuncu seqmenti olan Trans-Adriatik Boru Kəməri (TAP) isə Yunanıstan və Türkiyə sərhədindən başladığına görə, Yunanıstanın şimal qonşuları Rumıniya, Macarıstan, Slovakiya daxili qaz şəbəkələri vasitəsilə Azərbaycan qazını nəql edə bilir. Bu şəbəkələri paralel olaraq yeniləmək və genişləndirmək imkanları da Azərbaycan qazının interkonnektorlar vasitəsilə həmin ölkələrə nəqlini reallaşdırılır.
Azərbaycanın Avropanın enerji təhlükəsizliyinin təmin edilməsi istiqamətində son illərdəki addımları ABŞ tərəfindən yüksək dəyərləndirilir. Belə ki, Rusiya–Ukrayna müharibəsinin başlamasından sonra Avropa ölkələri kəskin enerji böhranı yaşayır.
Belə bir şəraitdə nəinki 10-a yaxın Avropa ölkəsindən Azərbaycan qazının tədarükü ilə bağlı müraciət daxil olub, hətta ölkə başçımızın bu istiqamətdə fəaliyyəti ABŞ Prezidenti Cozef Bayden tərəfindən də müsbət qarşılanıb. Çünki ABŞ-ın bir növ təkidi ilə Avropanın bir çox ölkəsi sanksiyalara qoşularaq Rusiyanın enerji resurslarından imtina edib.
Həmin ölkələr ABŞ-ın başladığı kampaniyadan kənarda qala bilməməklə bərabər enerjisiz də qala bilməz. Belə vəziyyətdə Azərbaycan bu ölkələrin köməyinə çatıb. Respublikamızın xüsusilə də Şərqi Avropa ölkələrinin enerji təchizatında yardımçı mövqe sərgiləməsi bu dövlətlərin ABŞ-a qarşı neqativ baxışlarının azalmasını şərtləndirib. Buna görə ABŞ prezidenti son üç məktubunun hər birində məhz enerji təhlükəsizliyi sahəsində Azərbaycanın oynadığı rola görə Prezident İlham Əliyevə təşəkkür edib.
Azərbaycan, həm də alternativ enerji strategiyasını tətbiq etməyə başlayıb. Bununla bağlı Gürcüstan, Rumıniya və Macarıstanla Buxarestdə “yaşıl enerji” sahəsində strateji tərəfdaşlığa dair Saziş imzalanıb. Nəticədə Azərbaycanda alternativ enerji mənbələri hesabına istehsal olunacaq elektrik enerjisinin Qara dənizin dibi ilə Avropaya ixracı nəzərdə tutulub.
Vaqif BAYRAMOV, “Xalq qəzeti”