Dünya Bankı (DB) 2026-cı ilə kimi Azərbaycanda qeyri-neft sektorunun artım proqnozunu açıqlayıb. Bankın hesabatında bildirilir ki, qeyri neft-qaz sektoru iki illik sürətli artımdan sonra “COVID-19” pandemiyasından əvvəlki səviyyəsinə yaxınlaşıb.
Hesabatda qeyd olunur ki, qeyri-neft sektorunda artım, əsasən, yenidənqurma işləri ilə bağlı xidmətlər və tikinti ilə bağlı olacaq. Bu da güclü dövlət sərmayəsinin xidmət və tikinti sektoruna yönəldilməsi ilə bağlıdır. “Ortamüddətli perspektivdə struktur islahatlarının aparılmaması şəraitində artımın orta hesabla 2,5 faiz olacağı gözlənilir”, – deyə bankın hesabatında bildirilir.
Bank həmçinin, kənd təsərrüfatı üzrə artımın real ÜDM-də payının 2023-cü il üzrə 3,2 faiz, 2024 və 2025-ci illər üzrə isə 3 faiz proqnozlaşdırdığını açıqlayıb. Yeri gəlmişkən, ötən il üzrə bu rəqəm 3,4 faiz təşkil edib.
Azərbaycanda sənaye üzrə artım cari ildə 0,5 faiz, 2024-cü ildə 1 faiz, 2025-ci il üzrə isə 1,2 faiz müəyyən edilib. Bankın hesabatına əsasən, ölkəmizin xidmət sektoru üzrə artımın 2023-cü ildə 4,7 faiz, 2024-cü ildə 4,5 faiz, 2025-ci ildə isə 4,6 faiz gözlənilir.
“Xalq qəzeti”