Ölkəmizdə mövcud torpaq və su resurslarından səmərəli istifadə etmək, aqrar sahə üzrə yeni ideyaları, startapları dəstəkləmək, ərzaq təhlükəsizliyini təmin etmək, kənd yerlərində yaşayan əhalinin aqrar sahədə məşğulluğunun artırılması yolu ilə sosial rifahını yaxşılaşdırmaq, yerli məzənnənin güclənməsinə dəstək verəcək ixrac potensialının artırmaq və ixrac coğrafiyasını genişləndirmək üçün mühüm tədbirlər həyata keçirilir.
Kənd təsərrüfatı nazirinin müavini Elçin Zeynalov “Agro Business Forum Azerbaijan-2023” forum-sərgisinin açılış mərasimində çıxışı zamanı bildirib ki, Azərbaycanda aqrar sektorun bütün növ vergi ödəmələrindən azad olunduğu hazırkı şəraitdə ölkədə fermerlərə dəstək üçün müxtəlif növ subsidiya və kredit mexanizmləri mövcuddur.
“Biz aqrar biznes sektorunu dəstəkləmək üçün aqrar bazarımızı ədalətli rəqabətə açmışıq. Hazırda xarici şirkətlər heç bir bürokratik prosedur olmadan müstəqil olaraq öz məhsullarını fermerlərə təklif edə və dövlətin güzəştlərindən yararlana bilirlər. İnnovativ metodlara əsaslanan bu elektron xidmətlər aqrotexniki xidmətlərin idarəçiliyində tamamilə şəffaflıq yaradacaq, zaman itkisinin qarşısını alacaq və fermerlərə operativ xidmət göstərməyə imkan verəcək”,–deyə Elçin Zeynalov əlavə edib.
“Xalq qəzeti”
