Dünən Monakoda UEFA Çempionlar Liqasının əsas mərhələsinin püşkatma mərasimi keçirilib. Tədbirdən öncə əsas mərhələdə iştirak edəcək 36 komanda 4 səbətə bölünüb. IV səbətdə yer alan Azərbaycan təmsilçisi “Qarabağ” püşkatmanın nəticələrinə əsasən “Liverpul” (İngiltərə), “Benfika” (Portuqaliya), “Napoli” (İtaliya) və “Atletik”lə (İspaniya) səfərdə, “Çelsi” (İngiltərə), “Ayntraxt” (Almaniya), “Ayaks” (Niderland), və “Kopenhagen”lə (Danimarka) evdə qarşılaşacaq.
UEFA Çempionlar Liqasının Liqa mərhələsinin ilk turunun oyunları sentyabrın 16-18-də keçiriləcək. Son turun görüşləri 2026-cı il yanvarın 28-də baş tutacaq.
Pley-off mərhələsinə fevralın 17-18-də start veriləcək. UEFA Çempionlar Liqasında 2025/2026 mövsümünün qalibi mayın 30-da Macarıstanın paytaxtı Budapeştdə baş tutacaq final oyununda bəlli olacaq.
Qabil YUSİFOĞLU
XQ
