Dünyanın ən ali beynəlxalq qurumu olan Birləşmiş Millətlər Təşkilatı (BMT) hər yerdə sevinclə qarşılanan təşəbbüs göstərmişdir. Bu gün planetin ən ucqar kənd və qəsəbələrindən tutmuş nəhəng şəhərlərədək hər yerdə ən çox işlədilən söz, bəlkə də, futbol olacaq. Elə “Xalq qəzeti” də səhərin gözü açılmamış 25 mayın Ümumdünya Futbol Günü olduğunu bir daha hörmətli oxucularına xatırladıb, milyonlarla insanı həyəcanlandıran, sevindirən, birləşdirən bu ecazkar oyun haqqında ona rəğbət hissi ilə söhbət açır.

Görünür, taleyin Azərbaycan futboluna bir töhfəsidir ki, BMT-nin elan etdiyi gün həm də Bey­nəlxalq Futbol Federasiyasının (FİFA) hakimlər korpusunun respublikamızda Tofiq Bəhramovdan sonra ikinci səlahiyyətli nümayəndəsi olmuş Eldar Əzimzadənin doğum gününə təsadüf edir. Yaşa­saydı, bir vaxtlar bu gözəl oyundan aldığı böyük zövqü özünün “Məhəbbətim mənim—futbol” kita­bında tam səmimiyyətlə təsvir etmiş Eldar müəllim bu gün 90 yaşını qeyd edəcəkdi…

Futbolun qəlbləri riqqətə gətirməsi, xoş mə­rama xidmət etməsi, bununla da dünyaya layiqli töhfə verməsi heç kimə sirr deyil. Planet əhalisinin böyük hissəsinin biganə qalmadığı bu çox sevimli oyun xalqların bir-birinə yaxınlaşmasında və onlar arasında dostluq əlaqələrinin möhkəmlənməsində, qarşılıqlı anlaşmanın, əmin-amanlığın qorunma­sında mühüm vasitədir. Məhz buna görə də idma­nın şahı adlandırılan futbol hamının sevimlisidir. İnsanların öz komandalarının oyunlarını izləmək üçün, bəlkə də, aylarla yığdıqları vəsaitə heyfslən­mədən bəzən dünyanın bir başından o biri başına getmələri təsadüfi deyil. Onlar belə səfərlər zama­nı özlərini futbol deyilən sehrli bir aləmdə xoşbəxt sanırlar.

İndi futbolun qüdrətini, onun nəyə qadir oldu­ğunu bilməyən yoxdur. Prezidentlər, baş nazirlər, krallar, parlament rəhbərləri, sərkərdələr, general­lar da istisna deyil. 

Mən 1986-cı ildə o zaman Azərbaycan Döv­lət İdman Komitəsində futbol şöbəsinin müdiri və­zifəsində çalışan Rauf Adıgözəlovla birlikdə sovet jurnalistləri və mütəxəssisləri qrupunda Meksikada dünya çempionatı oyunlarını izləmək imkanı qa­zanmışdım. Mundialın necə parlaq bayrama çevril­diyinin əyani şəkildə, birbaşa hadisə yerində şahidi olduq.

Çempionat günlərində Meksika qəzetləri ölkə­nin ovaxtkı prezidenti Migel de la Madridin tez-tez ailə üzvləri ilə birlikdə Mexikonun fəxri sayılan əzəmətli “Asteka” stadionunun hökumət tribuna­sında göründüyünü, Braziliya parlamentinin oyun­lardan birini televizorda izləmək üçün öz iclasını 3 saat təxirə saldığını, Mərakeş futbolçularının Portuqaliya millisi üzərində gözlənilməz və inamlı qələbəsindən (3:0) sonra Mərakeş Kralı Il Həsənin gecəyarısı paytaxt Rabatdan uzaq Qvadalaxara şəhərinə zəng vurub komandasını təbrik etdiyini diqqətə çatdırmışdı.

Leon şəhərində qollarla zəngin SSRİ—Belçika səkkizdəbir final görüşündə (3:4) sovet komanda­sından hər üç topu Kiyev dinamoçusu İqor Belano­vun vurduğu da yadımdadır.

Tribunadan izlədiyimiz digər oyunlar sırasında Puebla şəhərində əfsanəvi Diyeqo Maradonanın komandası Argentinanın Uruqvay ilə prinsipial gö­rüşü də (1:0) çox gərgin keçdi. Çempionatın bağla­nış mərasimində Dünya Kuboku da elə Maradona­nın və onun dostlarının, bütün Argentinanın üzünə güldü.

Mexico—86-dan bir il əvvəl bu ölkənin gənclər­dən ibarət yığma komandasını Bakıda, Respublika stadionunda gördüyümüz günlər də xatirələrdən silinməyib. FİFA 1985-ci ildə gənclər komandaları­nın dünya çempionatının təşkilini SSRİ-yə həvalə etmişdi. İlkin mərhələdə qruplarda oyunlar ölkənin bir neçə şəhəri ilə yanaşı, Bakıda və Sumqayıtda­kı Mehdi Hüseynzadə adına stadionda keçirilirdi. Bizim qrupa Meksika, Çin, Paraqvay və İngiltərə komandaları daxil idi. Qrupun qalibi hər üç rəqibini məğlubiyyətə uğradan Meksika oldu.

Açılış mərasimində FİFA-nın həmin illərdə pre­zidenti Joao Avelanjın da iştirak etdiyi Bakı turnirini ona görə xüsusi qeyd edirəm ki, futbol xeyrxahlığı sevir. Meksika komandasının oyunlardan birində meydana üzərində rus dilində yazılmış və təşkilat­çılara, azarkeşlərə qonaqpərvərliyə görə minnət­darlığını ifadə edən “Spasibo, Baku!” lövhəsi ilə çıxması da rəğbət doğuran addım idi.

Ümumdünya Futbol Günündə Azərbaycan futbolunun qürur mənbəyi Ağdamın “Qarabağ” komandasının ötən payızda, builki erkən bahar­da bütün ölkəyə yaşatdığı gözəl günləri bir daha böyük razılıq hissi ilə xatırlayaq. Qurban Qur­banovun futbolçularının “Braqa” (Portuqaliya) və “Bayer”ə (Almaniya) qarşı keçirdiyi görüşlər unudulası oyunlar deyil. Tezliklə komanda yenə avrokuboklar meydanına çıxacaq. Təbii ki, əsas məqsəd Çempionlar Liqasında mümkün qədər uzağa getmək olacaq.

Azərbaycan çempionundan növbəti nailiyyət gözləyənləri başa düşmək olar. Çünki artıq elə bilirik ki, bir həftə əvvəl Bundesliqada məğlubiy­yətsiz çempion olmaqla tarix yazan “Bayer” kimi, “Qarabağ” da evdə və ya səfərdə oynamasından asılı olmayaraq həmişə uğurlu nəticə göstərməlidir. Bunun özü qürurverici inamdır.

Misli Premyer Liqasında son turun Ümumdün­ya Futbol Günü ilə eyni vaxta təsadüf etməsi də maraq doğuran faktdır. Finiş ərəfəsində olan milli çempionatımızın vida turundan sonra Avroliqa və Konfrans Liqasında mübarizə aparacaq klubları­mız da qəti məlum olacaq.

Yeni mövsümdə beynəlxalq meydanda müba­rizəyə qoşulacaq kollektivlərə, eləcə də, uğurları həsrətində olduğumuz, amma qələbələrinə heç vaxt ümidimizi itirmədiyimiz milli komandaya, ölkə­nin bütün futbol həvəskarlarına Azərbaycan təm­silçilərinin ifasında məzmunlu və məhsuldar futbol arzulayırıq.

Bu arada iyunun 14-də Almaniya stadionların­da başlayıb, düz bir ay gecə və gündüz dünyanın diqqət mərkəzində olacaq növbəti Avropa çempio­natının startı ərəfəsinə gəlib çatmışıq. Bizim azar­keşlər, həmişəki kimi, yenə qardaş Türkiyə millisi­nin oyunlarını daha böyük həyəcanla izləyəcəklər.

Növbəti, 2028-ci il qitə çempionatında Azərbay­can komandasını da görmək arzusu ilə.

Hələlik isə, günün mübarək, əlahəzrət futbol!

Oqtay BAYRAMOV,
Əməkdar jurnalist