Cüdoçularımızdan Paris Olimpiya zirvəsinə yüksəlməyi gözləyirik

Azərbaycan cüdo komandası daha bir möhtəşəm qələbəyə imza atdı. İlk dəfə dünya çem­pionatında 2 təmsilçimiz qızıl medal əldə etdi. Bu mühüm nailiyyət dördilliyin ən mötəbər idman hadisəsi olan Paris Olim­piadası ərəfəsində qazanıldığı üçün daha qiymətlidir. Bununla da, Azərbaycan komandası Paris Yay Olimpiya Oyunlarında yalnız geniş heyəti ilə yox, həm də çox güclü yığma kimi diqqət mərkə­zində olacaq.

İlk dəfə 2011-ci ildə Azərbaycan cüdoçusu Elxan Məmmədov dünya çempionatının qalibi olduqdan sonra, bu nailiyyəti təkrarlayan olmamışdı. Birləşmiş Ərəb Əmirliklərinin paytax­tı Əbu-Dabidə keçirilən dünya çem­pionatında komandamızın üzvləri Hidayət Heydərovdan (73 kq) sonra Zelim Kotsoyevin (100 kq) də yarışın ali mükafatını qazanması son illər bu idman növü üzrə yığmamızın potensi­alının daha da yüksəlməsinin göstəri­cisidir. 

Azərbaycan Cüdo Federasiyası­nın vitse-prezidenti, Olimpiya çem­pionu Elnur Məmmədli qəzetimizə açıqlamasında qeyd etdi ki, Dünya çempionatında əldə edilən bu nai­liyyət Azərbaycan idmanının parlaq uğurudur:

– Bu böyük qələbəni illərdir göz­ləmişik. Bu, tək cüdonun deyil, Azər­baycan idmanının şərəf kitabına ya­zıldı. Xoşbəxtik ki, ölkəmizdə idmana dövlət tərəfindən belə böyük qayğı var. Prezident İlham Əliyev, Birinci vit­se-prezident Mehriban xanım Əliye­vanın idmana, idmançılarımıza diqqə­ti bizim üçün böyük dəstəkdir. Bu ciddi nailiyyətin əldə edilməsində Gənclər və İdman Nazirliyi, Milli Olimpiya Ko­mitəsi, Cüdo Federasiyası, eləcə də məşqçilər, həkimlər korpusunun, bizə dəstək olan hər bir kəsin böyük əməyi var.

Olimpiya çempionu daha sonra bil­dirdi ki, uzun illər dünya çempionatla­rında cüdoçular mükafatçılar sırasın­da yer alsalar da, qızıl medal qazana bilməyiblər. Təsəvvür edin, 11 ildən sonra 2 cüdoçumuz bu çətin maneəni aşdı, zirvəyə yüksəldi. Həm Hidayət Heydərov, həm də Zelim Kotsoyev öz çəkilərində Olimpiya reytinqində liderdirlər. Hər 2 idmançıdan Olimpiya çempionluğunu da gözləyirik. 

Elnur Məmmədli, ümumiyyətlə, Azərbaycan cüdo komandasında son illər güclü potensialı olan çox­lu idmançıların yetişdiyini bildirdi. O qeyd etdi ki, Dünya çempionatın­da, əslində, onların hər biri mükafat qazanmağa layiq idi:

– Dünya çempionatında, ümu­miyyətlə, zəif idmançı olmur. Medal qazana bilməyən tatami ustalarımız da ruhdan düşməməlidirlər. Onların gücünə bələd olduğumuz üçün hər bi­rindən mükafat gözləyirdik. Amma bu, idmandır. İndi çalışmalıyıq ki, növbəti yarışlarımız üçün səhvlərimizi düzəl­dək. Qarşıda bizi Paris Olimpiadası gözləyir. Pekin Olimpiadasında mə­nim çempionluğumdan uzun illər son­ra 1 yox, 2 Olimpiya qızılı qazanma­ğın vaxtıdır. Cüdoçularımıza inanırıq. 

Qeyd edək ki, Hidayət Hey­dərovdan sonra çempion titulunu qazanan Avropa çempionu, Dünya çempionatının ikiqat bürünc mü­kafatçısı Zelim Kotsoyev yarışda qələbə ruhunun əsas rol oynadığını bildirdi. O qeyd etdi ki, Birinci vit­se-prezident Mehriban Əliyevanın rəsmi instaqram səhifəsində Hi­dayət Heydərovu təbrik etməsi ona əlavə güc, həvəs verib:

– Hidayət mənə həmin təbrik pay­laşımına görə çox xoşbəxt olduğunu dedi. O, qızıl medalı qazandıqdan sonra bunu mənim də bacaracağıma inandığını bildirdi. Bütün bunlar məni qələbəyə ruhlandırdı. 

Azərbaycan bayrağını beynəlxalq arenada dalğalandırdığı üçün iftixar duyduğunu söyləyən Z.Kotsoyev Olimpiadada da uğur qazanmaq üçün əlindən gələni edəcəyini dedi:

– Mən bütün yarışlarda ölkəmin üçrəngli bayrağını yüksəklərə qaldır­maq arzusundayam. Paris Oyunların­da fəxri kürsüyə yüksəlmək üçün fiziki qüvvəmi, mənəvi enerjimi toplayaca­ğam. 

Beləliklə, cüdoçularımızın Əbu-Dabidə son dünya çempionatın­da tarixi nəticəsi, bundan əvvəl “Böyük dəbilqə” turnirlərində, Avropa çempio­natlarında, Dünya, Avropa kuboku və digər yarışlarda parlaq nailiyyətləri Paris Oyunlarında yeni zirvələrin fət­hi üçün geniş imkanlar açır. Olimpiya tatamisində bütün çəki dərəcələrində mübarizə aparacaq Azərbaycan cü­doçularından Olimpiya qızıllarını göz­ləmək üçün gerçək əsas var. 

Leyla QURBANOVA
XQ