Almaniyanın Heydelberq şəhərində keçirilən para-cüdo üzrə Qran-pri yarışında kişilər arasında +90 çəki dərəcəsində J1 kateqoriyasında mübarizə aparan İlham Zəkiyev medal qazanmaqla Paris Paralimpiadasına doğru daha bir inamlı addım atdı. 

İkiqat Paralimpiya çempionu, Milli Paralimpiya Komitəsinin vit­se-prezidenti İlham Zəkiyev “XQ”yə müsahibəsində bugünlərdə başa çatmış yarışda lisenziya şanslarını daha da artırdığını bildirdi.

– İlk sualımız Almaniyada ye­nicə başa çatmış Qran-pri yarı­şında iştirakınız barədə olacaq. Yarışa zədəli qatılmışdınız...

– Sol biləyim zədəli olduğun­dan müalicə alırdım. Yarış lisenzi­ya xarakterli olduğu üçün mütləq iştirak etməliydim. İşin tərsliyindən 2-ci görüşdə sağ biləyim də əzildi. Buna baxmayaraq döyüşü davam etdirməyi qərara aldım. Hazırlığım yaxşı idi. Bürünc medalla reytinqdə yerimi qoruya bildiyim üçün sevi­nirəm. 

– Tokio Paralimpiadasında cüdo komandamız böyük uğur­la çıxış etdi. Komandamızın bu­dəfəki Paralimpiya Oyunlarında şanslarını necə qiymətləndirirsi­niz?

– Elədir. Cüdo yığmamız Tokio Yay Paralimpiya Oyunlarını 6 qızıl, 2 bürünc medalla ümumi hesabda birinci yerdə başa vurdu. Ümumi­likdə isə Azərbaycan komandası tarixi uğur qazanaraq 14 qızıl, 1 gümüş və 4 bürünc olmaqla 19 me­dala sahib olmuşdu. Komandamız medalların əyarına görə 162 dövlət arasında 10-cu yeri tutdu. Hazır­da cüdo yığmamız əla formadadır. Vüqar Şirinli, Şəhanə Hacıyeva, Dürsədəf Kərimova, Xanım Hüsey­nova və digərlərinin reytinqi yaxşı­dır. Namiq Abbaslının səhhətində bir az problemlər var. Yaxşı olsa, onun da reytinq xalları lisenziya şansı verir. 

– Qarşıda komandamızı hansı lisenziya turnirləri gözləyir?

– Apreldə Antalya, mayda isə Tbilisidə Qran-pri yarışları olacaq. Kimlərin dördilliyin əsas idman ya­rışına vəsiqə qazanacağı mayda elan olunacaq. Onu da deyim ki, reytinqdə ilk 10-da olan idmançılar “Paris-2024”də iştirak edəcəklər. Mən özüm Paralimpiya reytinqində 3-cüyəm. 

– Necə düşünürsünüz, ko­mandamız Tokio Paralimpiada­sında qazandığı tarixi nailiyyəti təkrarlaya bilərmi?

– İndiyədək 9 lisenziya əldə etmişik. Cüdo ilə yanaşı, parata­ekvondo, atletika, pouerliftinqçilə­rimizə də böyük ümidlərimiz var. Paraatletika üzrə komandamız Parisdə keçirilən dünya çempio­natında 2 qızıl, 1 bürünc medal və növbəti Yay Paralimpiya Oyunla­rına 4 vəsiqə qazanmaqla yüksək nəticəyə imza atdı. Parataekvon­doşularımızın 3-ü özü üçün lisen­ziyanı rəsmiləşdirib. Güllə atıcılığı və üzgüçülük üzrə isə hərəsində 1 vəsiqəmiz var. Komandamız güclü potensiala malikdir. Milli Paralimpi­ya Komitəsi idmançılarımızın yük­sək nəticə əldə etmələri üçün hər bir şərait yaradır. Hazırlığımız yaxşı gedir. 

Tokio Paralimpiadasında özü­müzü qələbəyə kökləmişdik. Bizə motivasiya verən 44 günlük müha­ribədə möhtəşəm Zəfərimiz idi. 2-ci görüşdə 2 barmağım sındı. Bunu mən nə rəqibə, nə də bir başqa­sına bildirdim. Ağrını iradəmlə dəf edərək növbəti görüşə çıxdım. Çün­ki dopinq nəzarətinə görə ağrıkəsi­cidən də istifadə etmək olmazdı. Xatırlayırdım ki, yaralı əsgərlərimi­zin əksəri müalicəni yarıda saxlayıb necə döyüş yoldaşlarının yanına tələsirdilər. O zaman xəstəxanalar­da yaralıları ziyarət edərkən bunun şahidi olurdum. Qarşılaşmalar za­manı Vətən müharibəsində hərb­çilərimizin yaralı vəziyyətdə döyüş meydanında aslan kimi vuruşmala­rı gözümün önünə gəlirdi ki, bu da əlavə güc verirdi. Oyunlara bu dəfə də və bundan sonra həmişə müzəf­fər ölkənin qalib idmançısı kimi yola düşəcəyik. Paris Paralimpiadasın­da da yenilməz güc nümayiş etdirə­cəyik. Hamımız buna inanırıq.

Leyla QURBANOVA
XQ