30 ildən sonra ilk dəfə Azərbaycanın işğaldan azad olunmuş ərazisində möhtəşəm futbol matçı keçirildi. Həyatın bütün sahələrində böyük uğurların qazanıldığı 2023-cü il il daha bir tarixi hadisə ilə əlamətdar oldu.
Əslində, əzəli və əbədi yurd yerimiz Xankəndidə Azərbaycanın qədim diyarı Qarabağın adını şərəflə daşıyan “Qarabağ” yığması ilə düşmən üzərində böyük Zəfər qazanan hərbçilərimizin komandası – Mərkəzi Ordu İdman Klubunun görüşünün çox dərin rəmzi mənası var.
Xankəndi stadionunda Azərbaycan Prezidenti İlham Əliyevin oyun ərəfəsindəki çıxışında qeyd etdiyi kimi, Qarabağ–Ordu–Xalq birliyi bizim Zəfərimizin əsas mənbəyidir. Hər dəqiqəsində, saniyəsində belə Qələbə ruhunun yaşandığı möhtəşəm oyunda “Yaşasın Qarabağ!”, “Yaşasın şanlı Ordumuz!”, “Qarabağ Azərbaycandır!” sədaları altında böyük izdiham yaşandı.
Əsl idman mübarizəsi şəraitində başa çatan yarışda “Qarabağ”ın xeyrinə 1:0 hesablı qələbə qeydə alındı. Yeganə qolun sahibi olan “Qarabağ”ın futbolçusu Nəriman Axundzadə isə işğaldan azad olunmuş ərazilərdə 30 ildən sonra keçirilən ilk futbol matçında fərqlənən hücumçu kimi tarixə düşdü.
“Qarabağ”ın baş məşqçisi Qurban Qurbanov oyundan sonra jurnalistlərə müsahibəsində illərlə bu günün həsrətində olduqlarını, məhz Xankəndi stadionunda meydana çıxdıqları üçün çox sevindiklərini deyib. Şəhidlərin qəhrəmanlığı sayəsində Xankəndidə olduqlarını vurğulayan, böyük Qələbəyə görə Prezident İlham Əliyevə və Azərbaycan Ordusuna minnətdarlığını bildirən baş məşqçi xalqımıza hər zaman sağlam və xoşbəxt yaşamağı arzulayıb.
Matçla bağlı fikirlərini bildirən Qurban Qurbanov meydanda gərgin mübarizənin getdiyini, qolun son saniyələrdə vurulmasının isə oyunu daha da maraqlı etdiyini söyləyib. Son saniyəyədək mübarizə aparan MOİK komandasını təbrik edən 51 yaşlı mütəxəssis rəqibdən bu cür əzmkar oyun gözləmədiyini də dilə gətirib. Qeyd edib ki, MOİK-in belə mübarizə aparması gələcəyə ümid verir. Onlar da belə bir əlamətdar gündə tarixə düşdülər.
Baş məşqçi onu da deyib ki, kubok matçlarının hamısını Xankəndidə keçirmək istəyirlər:
– Finala qədər getsək, burada oynamağı planlaşdıra bilərik. Gələcəkdə bu sahədə addımlar atılacaq. Prezident İlham Əliyev bir neçə aydan sonra Ağdam şəhərində “İmarət” stadionunun yenidən inşasına başlanılacağını bildirdi. Bu məsələyə belə diqqət ayırdığına görə dövlət başçısına minnətdaram. Böyük məmnuniyyətlə orada oynayarıq.
MOİK komandasının baş məşqçisi Qəzənfər Abbasov tarixi torpaqlarımızda möhtəşəm oyuna görə Prezident İlham Əliyevə və Ordumuza minnətdar olduğunu bildirib:
– Allahdan şəhidlərimizə rəhmət, qazilərimizə şəfa diləyirik. Onların sayəsində bu gün buradayıq. Meydanda sonadək mübarizə apardıq. Gözəl futbol göstərmək istəyirdik. Hansı komandaya qarşı oynadığımızı yaxşı bilirdik.
Mütəxəssis “Qarabağ”ın gücünün hər kəsə bəlli olduğunu deyib:
– Rəqib komandanı təbrik edirəm. Qurban Qurbanov baxımlı oyuna görə mənə öz təbriklərini çatdırdı.
Q.Abbasov onu da bildirib ki, gələcəkdə Premyer Liqada çıxış edə bilərlər. Baş məşqçi ev oyunlarını Xankəndidə keçirməyin onlar üçün şərəf olduğunu da sözlərinə əlavə edib.
Beləliklə, 30 illik həsrətdən sonra doğma stadionuna qovuşan futbolumuz möhtəşəm qələbəsini qeyd etdi. Bu, Azərbaycan xalqının əbədi Zəfəridir!
L.QURBANOVA
XQ
