Bizdən – dəstək, komandadan – qələbə...

Bu gün uzaq və soyuq Norveçin Molde şəhərində eyniadlı yerli klubla Azərbay­can çempionu Ağdamın “Qarabağ” komandası arasında keçiriləcək UEFA Avro­pa Liqasının “H” qrupunda 5-ci tur görüşünün çox mühüm əhəmiyyəti hər kəsə məlumdur. Bu oyun ağır döyüş xarakteri daşıyacaq. Başqa cür ola da bilməz. Ortada pley-off mərhələsinə vəsiqə var. Molde sınağının xoşbəxt qalibi onu özünə təmin edəcək və pərəstişkarlarının sevinci yerə-göyə sığmayacaq.

Matç ərəfəsində rəqiblər hərəyə 6 xalla turnir cədvəlinin ikinci-üçün­cü mövqelərində mehriban qonşular kimi yanaşı addımlayırlar. Üstünlük sentyabrda Norveç təmsilçisini Bakı­dan vətəninə məğlubiyyətlə (1:0) yola salmış “Qarabağ”ın tərəfindədir. Ölkə çempionumuz şəxsi görüşün nəticə­sinə görə cədvəldə rəqibini qabaqlayır. Amma ikinci yerin taleyi məhz bugünkü oyunda qəti həll oluna bilər. Molde sı­nağının qalibi yekun cədvəlində finişə “Bayer” Leverkuzendən sonra ikinci çatacaq.

Əgər tərəflərin bir-birinin müqa­vimətini qırmaq cəhdləri baş tutmasa və onlar meydanı “dinc” nəticə ilə tərk etsələr, təqvimdə dekabrın 14-nə təyin edilmiş son tur qarşısında “Qarabağ” özünü daha inamlı hiss edəcək. Bu halda Qurban Qurbanovun komanda­sı yenə cədvəldə ikinci pillədə olacaq. Üstəlik də, iki həftədən sonra vida tu­runda “Molde”ni Leverkuzendə qrupu­muzun da, Almaniya Bundesliqasının da məğlubedilməz lideri “Bayer” ilə görüş gözləyirsə, Ağdam komandası Bakıda, Tofiq Bəhramov adına Res­publika Stadionunda artıq qrupda hər şeydən əli üzülmüş kimi görünən İsve­çin “Hekken” klubunu qəbul edəcək. 

Bununla belə, bütün hallarda ümidi axırıncı tura saxlamayıb, hər şeyi elə bu gün qəti şəkildə həll etmək “Qara­bağ”ın azarkeşlərinin ürəyindən olar. Yeri gəlmişkən, bir məqamı xüsusi qeyd edək. “Molde” – “Qarabağ” qar­şılaşmasına ölkəmizdə maraq hədsiz­dir. Son günlər yayılan məlumata görə erməni işğalından azad edilmiş əra­zilərdə, Laçın şəhərindəki kinoteatrda futbol həvəskarları üçün oyunu böyük ekranda izləmək imkanı yaradılacaq. Bu çox yaxşı təşəbbüsdür və hamımı­za oyundan xoş əhvalla, qələbə sevin­ci, ya da ən azı, heç-heçə ilə ayrılmağı arzulayaq.

Dünən səhər Norveçə yola düşən “Qarabağ” Avroliqada qrup sınaqların­dan şərəflə çıxıb, öz tarixinə daha bir parlaq səhifə yazmaq üçün, şübhəsiz, əlindən gələni edəcək. Komandanın bu məqsədinə də çatıb, pley-off mər­hələsində mübarizə aparmaq hüququ qazanmağa gücü çatar.

Bir maraqlı məqam da yada düşür. “Neftçi” öz tarixində SSRİ çempionatla­rında ilk və yeganə medalına – bürünc mükafata məhz 30 noyabrda (1966-cı il) sevinmişdi. İndi həmin unudulmaz gündən 57 il ötür. Bu gün də noyabrın 30-dur. Deməyim odur ki, bu tarix fut­bolumuz üçün uğurlu gündür.

Elə “Qarabağ”ın Azərbaycan Prem­yer Liqasının 14-cü turunda “Sabah”a qalib gələrək (2:1), yenidən turnir cəd­vəlində adət etdiyi vahid lider mövqe­yinə yüksəlməsi də yaxşı əlamətdir.

Moldedə oyunun Bakı vaxtı ilə ge­cəyarısı, 00:00-da başlayacağını da xatırladıb, onu izləməyə hazırlaşaq.

Oqtay BAYRAMOV,
Əməkdar jurnalist