Azərbaycanın sərbəst, yunan-Roma güləşi və qadın güləşi üzrə millilərinin Serbiyanın paytaxtı Belqradda sentyabrın 16-da start götürəcək dünya çempionatı üçün heyətləri açıqlanıb.

Yarışda 10-u sərbəst, 10-u yunan-Roma, 6-sı isə qadın güləşçi olmaqla, ümu­milikdə 26 idmançı mübarizə aparacaq. Builki dünya çem­pionatına millimizin hazırlığı necə qiymətləndirilir? 

Sərbəst güləş üzrə Azər­baycan millisinin baş məşqçi­si Xetaq Qazyumov jurnalist­lərə müsahibəsində mundiala yüksək heyətlə yola düşəcək­lərini deyib. O qeyd edib ki, yarışda Olimpiadaya mini­mum 6 lisenziya qazanmağı hədəfləyib. 

Baş məşqçi qeyri-olimpi­ya çəkilərində, əsasən, gənc­lərə üstünlük verdiklərini vur­ğulayıb: “Olimpiya çəkilərində təcrübəli güləşçilər mübarizə aparacaqlar. Avropa çempio­numuz Əliabbas Rzazadədən (57 kq) minimum olimpiadaya lisenziya qazanmağı göz­ləyirəm. Maksimum nəticə göstərərsə, dünya çempionu ola bilər. Üçqat dünya çem­pionu Hacı Əliyevin (65 kq) böyük potensialı var. Hazırda çox yaxşı formadadır və dü­şünürəm ki, hansısa problem onun yenidən dünya çempi­onu olmasına mane olmaya­caq”.

Xetaq Qazyumov Turan Bayramov, Abubakr Abaka­rov (86 kq), Maqomedxan Maqomedov (97 kq) və Ge­orgi Meşvildişvilidən (125 kq) də yüksək nəticələr göz­lədiyini bildirib. Qeyd edib ki, istər olimpiya, istərsə də qeyri-olimpiya çəkilərində maksimum nəticəni hədəflə­yirlər. Bunun üçün güləşçilər potensiallarından maksimum istifadə etməlidirlər. 

Azərbaycan millisinin lideri Hacı Əliyev (65 kq) komanda yoldaşlarının hər birisinin yaxşı formada ol­duğunu deyib. Vurğulayıb ki, yığma ilboyu həm ölkə xaricində, həm də Vətəndə birlikdə təlim-məşq toplanışı keçib. Güləşçi özünün yaxşı formada olduğunu da bildirib: “Düşünürəm ki, yaxşı forma­dayam. Yarışa tam tam ha­zıram və uğurlu nəticə əldə etmək üçün əlimdən gələni edəcəyəm.

Əsas hədəf dünya çem­pionu olmaq və Olimpiya Oyunlarına lisenziya qazan­maqdır”.

Qadın güləşi üzrə millinin baş məşqçisi Semyon Şte­rev də yarışa hazırlıqla bağlı təəssüratlarını bölüşüb. O qeyd edib ki, yarışda Mariya Stadniklə (50 kq) yanaşı, Jalə Əliyeva (57 kq) və Elis Mano­lovadan (62 kq) da yaxşı nəti­cə gözləyirlər: “Ölkə xaricində bir neçə təlim-məşq toplanışı keçmişik, yarışlarda iştirak et­mişik. Güləşçilərimizin uğurla çıxış edəcəklərinə inanırıq”.

Yunan-Roma güləşi üzrə Azərbaycan millisinin baş məşqçisi Aleksandr Taraka­nov dünya çempionatından mümkün qədər çox olimpiya lisenziyası ilə qayıtmaq istə­diklərini deyib: “Ötənilki dün­ya çempionatındakı nəticəni yaxşılaşdırmaq istəyirik. Ya­rışda qızıl medal qazanmaq böyük əhəmiyyət daşıyır. Komandamızın üzvləri çem­pionata yaxşı hazırlaşıblar. Bu yarışdan sonra daha çox lisenziya xarakterli turnirlər olacaq. Güləşçilərimiz özlə­rinə əmindirlər. Düşünürük ki, nəticə yaxşı olacaq”. 

Qeyd edək ki, sentyabrın 16-24-ü aralığında keçiriləcək dünya çempionatında Azər­baycanın 6 qadın güləşçisi mübarizə aparacaq.

L.QURBANOVA
XQ