Çoxlarınız, xüsusən də Azərbaycan idmanının yaşlı pərəstişkarları dərhal deyəcəksiniz ki, belə böyük şərəfə layiq görülmüş məşhur insan oyunçu kimi də, məşqçi kimi də ömrünün sonunadək futbola sədaqətlə xidmət etmiş SSRİ idman ustası Əhməd Lətif oğlu Ələsgərovdur. Haqlısınız. O, həyatı Azərbaycan, Ukrayna, Tacikistan və Moldova respublikalarının Əməkdar məşqçisi kimi tərk etmişdir. Baş məşqçi Ə. Ələsgərovun 1966-cı ildə “Neftçi”yə, 1974-cü ildə isə Odessanın “Çernomorets” komandasına Sovet İttifaqı çempionatının bürünc medallarını qazandırdığını da unutmamışıq.
Bildiyimiz kimi, “Neftçi” SSRİ çempionatlarında çıxış etdiyi illər ərzində yalnız bir dəfə, 28-ci turnirin birinci dövrəsindən sonra komandanın “sükanı arxasında” moskvalı mütəxəssis Vasili Sokolovu öz futbolumuzun yetirməsi Ə. Ələsgərov əvəz etdikdən sonra medal qazanmışdır. Nə həmin “bürünc” 66-cı ilədək, nə də ondan sonra komandamız SSRİ çempionatının mükafatçısı ola bilməyib.
Əvəzində Əhməd müəllim özü məşqçi kimi ölkə birinciliyində bir daha təbrikləri qəbul edib. Bu dəfə 1974-cü ildə Odessanın “Çernomorets” komandasının baş məşqçisi rolunda. Maraqlıdır ki, azərbaycanlı mütəxəssis Ukrayna klubuna 1973-cü ildə dəvət olunmuşdu, bundan cəmi bir il sonra isə Odessanın fəxri olan komandanı Sovet İttifaqı çempionatında bürünc zirvəyə yüksəltdi.
Həmyerlimiz bu kollektivi çalışdırdığı dörd-beş il ərzində ona verdiyi töhfələrə görə təkcə yerli futbol həvəskarlarının deyil, bütün odessalıların böyük hörmətini qazanmışdı. Ona Odessa şəhərinin fəxri vətəndaşı, Ukrayna SSR-in Əməkdar məşqçisi adı təsadüfən verilməmişdi. Ötən əsrin yetmişinci illərinin ortalarında azərbaycanlı baş məşqçi Əhməd Ələsgərov Odessada ən sevimli insanlardan biri idi.
Tacikistan və Moldovada da onun məşqçi bacarığına biganə qalmadılar. Düşənbənin “Pamir”, Kişinyovun “Nistru və Tiraspolun “Şerif” komandaları Ə.Ələsgərovun başçılığı ilə 1970–1990-cı illərdə müəyyən uğurlara nail olmuşdular. Həmin kollektivlərdə yüksəlişin əsas səbəbkarı məşqçi idi.
Statistikaya görə, Ə.Ələsgərov 1960–1965-ci illərdə “Neftçi”nin heyətində SSRİ çempionatının güclülər dəstəsində 115 oyunun iştirakçısı olmuş və bu görüşlərdə rəqiblərin qapısından 6 top keçirmişdir. O, “bürünc” mövsümdən sonra, 1967–1970-ci illərdə də Anatoli Banişevski, Kazbek Tuayev, Adil və Yaşar Babayevlər, Sergey Kramarenko, Mübariz Zeynalov, Valeri Hacıyev, Vyaçeslav Semiqlazov, Aleksandr Trofimov, Anatoli Qryazev kimi usta futbolçularla birlikdə respublikanın 1 nömrəli komandasında fəaliyyətini davam etdirmişdir. Bundan əlavə, dövlət müstəqilliyimizin bərpasından sonra Azərbaycan milli komandası beynəlxalq meydanda özünün ilk görüşünü məhz Ə.Ələsgərovun rəhbərliyi ilə keçirmişdir. Bu oyun 1992-ci ildə Gürcaani şəhərində Gürcüstan yığması ilə olmuşdur.
Ə.Ələsgərov Azərbaycan milli komandasının baş məşqçisi olarkən ən uğurlu oyunlarından biri 1999-cu ilin payızına təsadüf etmişdir. Həmin ilin baharında yığmamız Avropa çempionatının seçmə mərhələsi çərçivəsində səfərdə Portuqaliya ilə görüşdə ağır məğlubiyyətə uğramışdı (0:7). Cavab matçı isə sentyabrın 3-nə təyin edilmişdi. Lakin həmin gün rəqiblər yalnız bir hissə oynaya bildilər. İlk 45 dəqiqədə hesab açılmadı. Fasilədə isə gözlənilmədən stadionda işıqlar söndü. Nəticədə, iki ölkənin futbol federasiyaları arasında qarşılıqlı razılıq əsasında və UEFA-nın icazəsi ilə komandalar ertəsi gün yenidən üz-üzə gəldilər. Oyunda bizim üçün qələbəyə bərabər heç-heçə qeydə alındı— 1:1. Hesabı Zaur Tağızadə açdı, portuqaliyalı Luiş Fiqu isə komandasını yalnız sonuncu dəqiqədə məğlubiyyətdən xilas edə bildi.
Azərbaycan futbolu tarixində unudulmaz sima kimi yaşayan Əhməd Ələsgərov 1935-ci il oktyabrın 5-də Bakıda doğulmuşdu. Həyatla 2015-ci il mayın 19-da, ömrünün səksəninci ilində Odessada vidalaşmışdır. Məzarı da həmin şəhərdədir. Cənazəsi isə “Çernomorets” stadionundan götürülmüşdür. Stadionda vida mərasimində Odessa Şəhər Şurasının yaydığı məlumatda bildirilmişdi: “Bu insan bir çoxları üçün futbol karyerasına vəsiqə verib. Əhməd Ələsgərovun istedadı və rəhbərliyi sayəsində “Çernomorets” klubu 1974-cü ildə SSRİ çempionatının bürünc mükafatçısı olub və ilk dəfə Avropa yarışlarında çıxış edib”.
Ruhu şad olsun!
P.S. O uzaq illərdən yadımda kimdənsə eşitdiyimmi, hardasa oxuduğummu iki misra da qalıb:
Eylə ki, işlər azacıq bəd gələr,
Dostların imdadına Əhməd gələr.
Oqtay BAYRAMOV,
Əməkdar jurnalist