Gənc Tamaşaçılar Teatrı – 95
(1991 – 2023)
2-ci məqalə
(əvvəli XQ-nin 2 sentyabr nömrəsində)
Azərbaycan Respublikası ikinci dəfə müstəqilliyinə 1991-ci ilin sonlarında qovuşsa da, teatrın yaradıcılıq konsepsiyasında, repertuar yeniləşməsində, poetikasının yeni estetikada formalaşmasına 1992-ci ildən başlandı. Vətənpərvərlik ruhlu, mənəvi-əxlaqi dəyərlərin ülviyyətindən, insanlarda yeni optimal şüurun formalaşmasından, eləcə də sosial-ictimai tərəqqiyə mane olan, vacib məişət problemlərinə insan mənəviyyatı prizmasından yanaşan pyeslərin tamaşaya qoyulmasına maraq gücləndi. İnsan psixologiyasının mürəkkəbliyi, emosional lirizm, poetik dramatizm tamaşaların ruhunda daha fəal estetik təcəssüm tapırdı.
Mövzu genişliyi teatrda janr əlvanlığına meydan açdı və rejissorlar cəsarətli addımlar atdılar. Teatr bir az qəmli komediya, romantik komediya, gop-komediya, qaravəlli, məzəli oyun, uydurulmuş məzəli hadisə, ekssentrik komediya, qəhrəmanlıq komediyası, qanlı faciə, publisistik faciə, mistik faciə, sənədli fəci dram, lirik-faciəvi məhəbbət hekayəti, kövrək etiraf, nağıl-müzikl, alleqorik nağıl, poetik-pupblisist dram, bir həyatın xronikası, publisistik qrotesk, ibrətamiz tövsiyə, ibrətamiz rəvayət, sənədli elegiya, macəra-hekayət, məhəbbət balladası, monotamaşa, tragifars, dramatik məhəbbət dastanı, psixoloji həqiqətlər dramı, əyləncəli macəra, treller, tək ifa üçün lirik dram janrlarında tamaşalar oynayıb
Müstəqillik illərində Gənc Tamaşaçılar Teatrı ilə yeni dramaturqlar, rəssamlar, bəstəkarlar yaradıcılıq əlaqələri qurublar. Elçinin, Əli Əmirlinin, Əhməd Orucoğlunun, Kamal Abdullanın, Hidayətin, Marat Haqverdiyevin, Tamara Vəliyevanın, Hüseybala Mirələmovun, Aqşin Babayevin, Firuz Mustafanın, Dilsuz Mustafayevin, Rövşən Ağayevin, Aygün Həsənzadənin, Əjdər Olun, Rəvan Tohidoğlunun, Sevinc Elsevərin, Pərvin Nurəliyevanın, Ülviyyə Heydərovanın pyesləri müxtəlif rejissor estetikasında tamaşaya qoyulub. Bu tamaşalar teatra çağdaş zamanla səsləşən fəlsəfi ideyalar, psixoloji fikirlər aşılayıb. Eyni zamanda, tamaşaçılar maraqlı rejissor işiləri, cazibəli aktyor ifaları ilə tanış olublar.
Azərbaycan Respublikası Nazirlər Kabinetinin 19 mart 2009-cu ildə verdiyi 41 saylı qərarda göstərilirdi ki, Dövlət Gənclər Teatrı Azərbaycan Dövlət Gənc Tamaşaçılar Teatrına birləşdirilsin. Bu qərarın icrası ilə bağlı Mədəniyyət və Turizm naziri Əbülfəs Qarayevin 9 aprel 2009-cu ildə 130 saylı əmri verildi. Teatr bütün yaradıcı kollektivi ilə GTT-yə keçdi. Xalq artisti Cənnət Səlimova kollektivə baş rejissor təyin edildi. Cənnət xanımın yaratdığı və rəhbəri olduğu Bakı Kamera Teatrı ləğv edildi və onun aktyorları da GTT-nin truppasına qəbul olundular. Truppaya yeni daxil olan aktyorlar arasında xeyli səriştəli və təcrübəli, həmçinin istedadlı gənc aktyorlar vardı.
1992 – 2023-cü illərdə rejissorlardan Ağakişi Kazımovun “Kiçik təpə” (Nəbi Xəzri), “Ağ div, qara div” (Əli Səmədli), Bəhram Osmanovun “Cəza” (Əli Əmirli), “Hacı Qara” (Mirzə Fətəli Axundzadə), “Yaddaş ağrısı” (Hüseynbala Mirələmov), “Mehmanxana sahibəsi” (Karlo Qoldoni, Vaqif İbrahimoğlunun “Unutmağa kimsə yox” (Kamal Abdulla), Vaqif Əsədovun “Ana laylası” (İsgəndər Coşqun), “Oliver Tvistin macəraları” (Çarlz Dikkens), Möhsün Mürsəlovun “Danışan gəlincik” (Abdulla Şaiq), Rafiq Əliyevin “Nəsrəddin” (Yusif Əzimzadə), Loğman Kərimovun “Qaraca qız” (Abdulla Şaiq), “Mənim ağ göyərçinim” (Tamara Vəliyeva), “Ölüm hökmü” (Elçin), Nicat Kazımovun “Ana qaz” (Rəsul Rza), “Pəri cadu” (Əbdürrəhim bəy Haqverdiyev), Fikrət Sultanovun “Yağış, yağmur və daldan atılan daş” (Nəcəf bəy Vəsirov), Ağaxan Salmanlının “Açarını itirənlər” (Əhməd Orucoğlu), Ağalar İdrisoğlunun “Əcəl atı” (Vaqif Əlixanlı), “Pələng ili” (Firuz Mustafa), Cənnət Səlimovanın “Buzovna kəndinin əhvalatları” (Elçin), “Əlincə qalası” (Dilsuz Mustafayev), Gülnar Hacıyevanın “Bir gecənin nağılı” (Rövşən Ağayev), Mehriban Ələkbərzadənin öz əsəri əsasında “Kod adı: “V.X.A.”, Elşad Rəhimzadənin “Qar kraliçası” (Hans Xristian Andersen), Nofəl Əliyevin “Sonluğun sonu” (Rövşən Ağayev), Alya Osmanovanın “Mən öləndə ağlama” (Pərvin Nurəliyeva) pyeslərinə verdikləri quruluşlar müəyyən janr əlvanlığı yaradıb.
Teatrın fəaliyyət məkanları
Kollektiv yeni yarananda onun binası yox idi və 1929 – 1930-cu illərdə əsasən 33 saylı məktəbdə fəaliyyət göstərib. 1933 – 1935-ci ildə teatr Opera və Balet Teatrı ilə üzbəüz olan “Kolizey” adlı yararsız binaya köçüb. Sonralar bu bina “Temp” adı ilə kinoteatr kimi fəaliyyət göstərib və qırxıncı illərin ikinci yarısında sökülüb. 1935 – 1936-cı il teatr mövsümündə kollektiv 9 Yanvar (Malakanskaya) küçəsindəki 8 nömrəli ünvanda teatra uyğunlaşdırılmış binada fəaliyyət göstərib. Hazırda haqqında söhbət gedən küçə klassik Azərbaycan şairi Xaqaninin adını daşıyır. Həmin yerdə isə Teatr Xadimləri İttifaqı üçün dördmərtəbəli inzibati bina, Aktyor evi tikilib və 1971-ci ildən fəaliyyətə başlayıb. Ünvan isə Xaqani küçəsi, ev 10-dur. 1938-ci ildə Bakıda müstəqil Musiqili Komediya Teatrı yaradılıb. Bir il sonra Xalq Komissarları Sovetinin qərarı ilə Gənc Tamaşaçılar Teatrının binası Muskomediyanın kollektivinə verilib. Gənc Tamaşaçılar Teatrı isə Xalq Komissarlar Soveti yanında İdman Komitəsinin yerləşdiyi binaya köçürülüb. 1939-cu ilin son günlərində Musiqili Komediya Teatrı hazırda Rəşid Behbudov adına Mahnı Teatrı yerləşən binaya köçüb. GTT yenidən 9 Yanvar küçəsindəki ünvana qayıdıb və 1951-ci ilədək həmin binada yerləşib. 1956-cı ildən 1963-cü ilədək isə burada Musiqili Komediya Teatrı fəaliyyət göstərib. Gənc Tamaşaçılar Teatrı 1951-ci ilin sonlarında Nizami küçəsi, 72 ünvanda tikilmiş yeni binaya köçüb. Təntənəli açılış isə 30 dekabrda olub. Binanın tamaşaçı salonu 450 nəfərlik idi. Salonun yarısından sonra oturacaqlar antik teatr üslublu pilləvari qurumda yerləşdirilmişdi. Kollektiv yaradıcılq yolunu 1980-ci ilədək bu binada davam etdirib. 1980-ci ildə qəza vəziyyətində olan bina sökülüb. Səkkiz il ərzində GTT Aktyor evində məskunlaşıb və tamaşalarını da orada göstərib. Memarlar Sənan Salamzadə və Rəhim Seyfullayevin layihəsi əsasında tikilən bina 1988-ci ilin sonunda təhvil verilib. Teatrın kolektivi 1989-cu ilin əvvələrindən başlayaraq, təzə binaya köçüb. Teatr pərdələrini aprel ayında bu binada açıb. 1989-cu ilin aprel ayında açılışı olan yeni binada teatr sənətinin estetik prinsiplərinə və texniki tələblərinə cavab verməyən ciddi qüsurlar vardı. Buna baxmayaraq teatr 18 il bu şəraitdə fəaliyyət göstərib. Azərbaycan Respublikasının Prezidenti İlham Əliyevin 19 fevral 2007-ci il tarixli sərəncamı ilə teatrın binası əsaslı təmir və yenidənqurma üçün bağlanıb. 2009-cu ildə təmir-bərpa işləri başa çatıb.
Salnamə faktları
Gənc Tamaşaçılar Teatrının direktorları: Vasili Şneybax (1928 – 1935), Məmməd Səlim Tahirli (1936 – 1939), Məhərrəm Haşımov (1939 – 1940), Məmmədsadıq Allahverdiyev (1941 – 1949), Atamoğlan Rzayev (1949 – 1954), Əli İsmayılov (1954 – 1964), Bala Qasımov (1964 – 1973), Eldar İlyasov (1973 – 1975), Məmməd Mərdanov (1976 – 1986), Aydın Teymurbəyov (1987 – 1988), Kamal Əzizov (1988 – 2006), Mübariz Həmidov (2006 – 2018), Naidə İsmayılzadə (1 iyun 2018-cı ildən).
Gənc Tamaşaçılar Teatrı Azərbaycan bölməsinin baş rejissorları: Pavel Velski (1928 – 1932), Soltan Dadaşov (1932 – 1937), Məhərrəm Haşımov (1937 – 1946), Kazım Ziya (1946 – 1947), Həsən Əliyev (1947 – 1951), Tofiq Kazımov (1951 – 1952), Kərim Həsənov (1949 – 1952, 1953 – 1954), Ağəli Dadaşov (1952 – 1953), Zəfər Neymətov (1954 – 1969), Hüseyn Sultanov (1969 – 1972), Ulduz Əliyeva-Rəfili (1973 – 1975), Ağakişi Kazımov (1976 – 1983, 1988 – 2002), Azər Paşa Nemətov (1983 – 1988), Loğman Kərimov (2002 – 2009), Cənnət Səlimova (2009 – 2012), Bəhram Osmanov (2012 – 2022), Mehriban Ələkbərzadə (1 mart 2022 – 12 may 2023).
Rəhbərlik
Direktor: Naidə İsmayılzadə (1 iyun 2018-cı ildən).
Direktor müavini: Gülnarə İbrahimova.
Baş rejissor: Əməkdar incəsənət xadimi Mehriban Ələkbərzadə 15 may 2023-cü ildə Akademik Milli Dram Teatrına bədii rəhbər təyin olunduğu üçün hələlik baş rejissor yoxdur.
Quruluşçu rejissorlar: Xalq artistləri Cənnət Səlimova, Əməkdar incəsənət xadimi Ağalar Mehdiyev (İdrisoğlu), Əməkdar artist Nicat Kazımov, Elşad Rəhimzadə. Rejissor: Gülnar Hacıyeva. Rejissor assistentləri: Günay Qasımova, Sona Mustafayeva, Gülnar Əliyeva, Fuad Cavadzadə.
Teatrın baş rəssamı Mustafa Mustafayev; quruluşçu rəssam Telman Şıxıyev; dekorçu-rəssam Elnur Babayev.
Truppa müdiri Ələsgər Muradxanlı; Ədəbi-dram müdiri Əməkdar mədəniyyət işçisi Rafiq Rəhimli; musiqi hissə müdiri Şamxal Novruzlu, pedaqoq-təşkilatçı Yeganə Məhərrəmova; baş inzibatçı Bəhmən Hüseynov; quruluş hissə müdiri Zəminə Elbir; quraşdırma sexinin rəisi Zaur Abbasov.
Hazırda Gənc Tamaşaçılar Teatrının truppasında 85 aktyor var.
Xalq artistləri: Yasin Qarayev, Qurban İsmayılov, Naibə Allahverdiyeva, Nübar Novruzova.
Əməkdar artistlər: Kəmalə Müzəffər (Hüseynova), Vahid Əliyev, Nəsibə Eldarova, Güşvər Şərifova, Şəfəq Əliyeva, Qəmər Məmmədova, Zemfira Əbdülsəmədova, Mehriban Abdullayeva, Şövqi Hüseynov, Elnur Bəhramxan (Hüseynov), Elşən Rüstəmov, Elnur Kərimov, İlham Əsədov, Rasim Cəfərov, Gülər Nəbiyeva, Leyli Vəliyeva, Nofəl Əliyev.
Aktyorlar: Manaf Dadaşov, Elşən Hacıbabayev, Ədalət Əbdülsəməd, Xalidə Əliməmmədova, İlqarə Tosova, Natiq Fərzəliyev, Xalidə Şərifova, Simuzər Atakişiyeva, Yasəmən Malik (Məmmədova), Asya Atakişiyeva, Aygün Fətullayeva, Hüsniyyə Əhmədova, Günel Məmmədova, Ceyhun Məmmədov, Yusif Dadaşov, Nuriyyə Əliyeva, Aydın Dəmirov, Anar Seyfullayev, Anar Səfiyev, Şəbnəm Hüseynova, Kərəm Hadızadə, Rövşən Abbasov, İradə Rəşidova, Vüqar Məmmədəliyev, Dilarə Fərəcullayeva, Mehriban Hüseynova, Elşən Şıxəliyev, Zülfiyyə Alhüseynova, Zümrüd Quliyeva, Ramil Məmmədov, Vahid Orucoğlu, Sevinc Mehrəliyeva, Eyvaz İbrahimov, Təhminə Məmmədova, Aybəniz Heydərova, Bəhram Əliheydər (Həsənov), Müşfiq Əliyev, Elgün Yəhyayev, Səbinə Məmmədzadə, Araz Pirimov, Hilal Dəmirov, Rəşad Səfərov, Mirzə Ağa Mirzəyev, Xəyalə Qasımova, Gülbəniz Lətifova, Nuranə Hüseynova, Mirsənan Kazımlı, Könül Əbilova, Xalid Bəkirov, Venera Abbasova, Eldar İmanov, Nurlan Süleymanlı, Ümman Budaqov, Ramiq Nəsirov, Tahir İsmayılov, İmran Qurbanov, İlahə Əmirxanova, Hökümə Rəhimzadə, Fəridə Qurbanova, İmdad Tofiqoğlu (Səfiyev), Mətləb Abuşov.
***
Gənc Tamaşaçılar Teatrı özünün 95 illik yubileyinə hazırlaşır. Teatrın çağdaş repertuarında, kiçik səhnə da daxil olmaqla, 50-dən çox tamaşa var. Onlardan 21-i məktəblilər üçündür. Böyüklər üçün əsas tamaşalar: “Leyli və Məcnun” (Məhəmməd Füzuli), “Lənkəran xanının vəziri”, “Müsyö Jordan və dərviş Məstəli şah”, “Xırs quldurbasan” (Mirzə Fətəli Axundzadə), “Dəli yığıncağı” (Cəlil Məmmədquluzadə), “Pəri cadu”, (Əbdürrəhim bəy Haqverdiyev), “Şeyx Sənan” (Hüseyn Cavid), “Oqtay Eloğlu” (Cəfər Cabbarlı), “Sarıköynəklə Valehin nağılı” (İlyas Əfəfndiyev), “Şəhərin qış gecələri” (Anar), “Hasarın o üzü” (Əli Əmirli), “Mənim ağ göyərçinim” (Tamara Vəliyeva), “Kod adı: “V.X.A.” (Mehriban Ələkbərzadə), “Romeo və Cülyetta”, “III Riçard” (Vilyam Şekspir), “Mehmanxana sahibəsi” (Karlo Qoldoni), “Mən gəldim, qızlar” (Las Nuren), “Qağayı” (Anton Çexov), “Don Kixot” (Migel de Servantes), “Dəlixanada qətl” (Fridrix Dürrenmatt), “Tanrıya on dörd məktub” (Erik Emmanuel Şmitt).
İlham RƏHİMLİ,
professor