Azərbaycan şahmatçısı İddiaçılar Turnirinə vəsiqə qazandı
Dünyanın idman mərkəzlərindən biri olan Azərbaycanda daha bir mötəbər yarış – şahmat üzrə Dünya kuboku uğurla başa çatdı. 25 gün əvvəl start götürən və qadınların da yarışı daxil olmaqla, ümumilikdə, 309 oyunçunun qatıldığı bu möhtəşəm şahmat bayramını minlərlə insan Bakıdan birbaşa onlayn izlədi.
Bu nüfuzlu turnirin tapıntısı olan Azərbaycan şahmatçısı Nicat Abasovun bir-birindən maraqlı oyunları insanları heyran etdi. Azərbaycan şahmat məktəbi, ölkəmizin idman potensialı, onun ənənələri təqdir edildi.
Yarışın qalib və mükafatçılarını müəyyən edən son günün tay-breklərini insanlar xüsusi maraq və həyəcanla izlədilər. Məhz N.Abasov, M.Karlsen, F.Karuana və Rameşbabu Praqanqhaa dünyanın ilk dördlüyü demək idi və bütün diqqət ən güclü cütlüklərin qalib adı uğrunda mübarizəsinə yönəlmişdi.
Dünya reytinqinin 3-cüsü Fabiano Karuana ilə bürünc medal uğrunda qarşılaşmada Nicat Abasov uduzsa da, adını şahmat tarixinə yazdı. Nicat müstəqil Azərbaycanda doğulub bu səviyyədə uğur qazanan ilk şahmatçımızdır. İstedadlı zəka ustasının timsalında artıq yeni nəsil şahmatçıların yetişməsini görmək qürurvericidir. FİDE prezidenti də Nicat Abasovun Dünya kuboku yarışında bu cür parlaq çıxışının böyük sürpriz olduğunu vurğulayıb. O qeyd edib ki, bu, Azərbaycan şahmatı üçün uğurlu nəticədir.
Azərbaycan Şahmat Federasiyasının 1-ci vitse-prezidenti Faiq Həsənov “Xalq qəzeti”nə açıqlamasında Nicat Abasovun güclü potensiala malik şahmatçı olduğunu bildirdi: “Nicat Abasov çox gözəl oyun nümayiş etdirdi. Ən əsası da İddiaçılar Turnirinə vəsiqə qazandı. Şahmatçımız gələn il keçiriləcək İddiaçılar Turnirində iştirak edəcək. Yarışın qalibi Maqnus Karlsen oldu. O, bu yarışda iştirak etsə də, indiyədək qalib titulunu qazana bilməmişdi”.
Turnirdə Hindistan şahmatçılarının çıxışını xüsusi vurğulayan qurum rəsmisi qeyd etdi ki, səkkizdəbir finalda iştirakçıların 4-nün bu ölkənin təmsilçisi olması diqqətəlayiqdir. Faiq Həsənov onu da bildirdi ki, Dünya kuboku yarışı ölkəmizdə yüksək səviyyədə, maraqlı mübarizə şəraitində keçib. Şahmatçıların öz potensiallarında maksimum istifadə etmələri üçün hər bir şərait yaradılıb.
Milyonların kumiri, karyerası boyu saysız-hesabsız yarışların qalibi olmuş beşqat dünya çempionu Maqnus Karlsen tay-brekdə hindistanlı Praqnanandha üzərində qələbə qazanaraq Dünya kubokuna sahib olub.
Qadınlar arasında isə FİDE-nin bayrağı altında çıxış edən Aleksandra Qoryaçkina birinci yeri tutub. Rusiyalı idmançı finalda bolqarıstanlı Nurgül Salimovanı məğlub edib. Ukraynalı Anna Muziçuk isə üçüncü pillədə qərarlaşıb.