Avropa Şahmat İttifaqının təşəbbüsü ilə Polşada keçirilən III Avropa Oyunlarına dəstək məqsədi daşıyan cütlüklərin blits üzrə Avropa çempionatı təşkil olunub.
Şəhriyar Məmmədyarovla Günay Məmmədzadədən ibarət Azərbaycan millisi yarışda 3 medal qazanıb. Belə ki, şahmatçılarımız qrup mərhələsində Niderlanda məğlub olub, ardınca İsrail komandası ilə heç-heçə edib, Polşa, Rumıniya, Ukrayna və İspaniyaya qalib gəlib. Son turda komandamız Ermənistanla heç-heçə oynayıb.
Qrupda ilk dördlükdə qərarlaşan şahmat duetimiz pley-offa yüksəlib. Dairəvi sistemlə keçirilən yarışın yekununda Günay Məmmədzadə gümüş, Şəhriyar Məmmədyarov isə bürünc medal qazanıb.
Yekun sıralamada komandamız turnir cədvəlində üçüncü yeri tutaraq daha bir mükafata – bürünc medala layiq görülüb.
