İlk məşəlini “Odlar yurdu” Azərbaycanda alovlandıran “qoca qitə”nin adı ilə bağlı növbəti – III Avropa Oyunlarının başlamasına cəmi 2 gün qaldı. Tarixi Bakıda başlayan dördilliyin möhtəşəm Oyunları Avropa idmanının inkişafına yeni töhfələr verməyə hazırlaşır.
Bəs Azərbaycan komandası iyunun 21-də Polşanın Krakov şəhərində start götürəcək yarışlara hazırdırmı? Budəfəki Avropa Oyunlarında komandamızın 86 üzvü idmanın 13 növü – oxatma, badminton, çimərlik futbolu, boks, qılıncoynatma, cüdo, karate, muay-tay, kikboksinq, padel, atıcılıq, taekvondo və triatlon üzrə yarışlarda mübarizə aparacaqlar. Azərbaycan III Avropa Oyunlarında 86 idmançı ilə təmsil olunacaq. Bəs onlardan hansı nəticələri gözləyirik?
Milli Olimpiya Komitəsinin vitse-prezidenti Çingiz Hüseynzadə jurnalistlərə müsahibəsində III Avropa Oyunlarının proqramına salınan idman növlərinin bizim üçün o qədər də uğurlu olmadığını deyib. Bunu onunla əsaslandırıb ki, əsas idman növlərimiz Polşada təmsil olunmayacaq. Bununla belə, vitse-prezident bildirib ki, Azərbaycan millisi ölkələrin sıralamasında ilk onluğa düşməyə əsas namizədlərdəndir: “Biz buna layiqik və inanırıq ki, komandamız uğurlu çıxışı ilə xalqımızı sevindirəcək”.
Qeyd edək ki, əsas dayaq idman növlərimizdən biri güləş budəfəki yarışda yer almayıb. Onu da xatırladaq ki, “Bakı–2015”-də qazanılan 56 medalın 6-sı qızıl olmaqla 15-i güləşçilərin payına düşüb. Minsk Oyunlarında isə 28 medalın 10-nunu güləşçilərimiz qazanıblar. İkinci Avropa Oyunlarında 5 qızıl medaldan 3-nə pəhləvanlarımız sahib olmuşdular. İlk Avropa Oyunlarında ümumi hesabda ikinci, növbəti yarışda isə 10-cu pillədə qərarlaşdıq.
Komandaların hazırlığına gəldikdə, birinci oyunlarda güləşdən sonra ən yaxşı nəticə qazanan boks komandamız (11 medal) Minskdə 2 medala sahib olmuşdu. Yığmanın məşqçisi Nəriman Abdullayev “Xalq qəzeti”nə müsahibəsində budəfəki yarışlara hazırlıq məqsədilə həm kişi, həm də qadın boksçulardan ibarət milli komandalarımızın təlim-məşq toplanışını ölkə xaricində keçdiklərini dedi: “Komandamız Assizidə İtaliya, Avstriya, Belçika, Serbiya, İrlandiya, Böyük Britaniya, Niderland, Estoniya, Finlandiya və Slovakiya ilə birgə hazırlıq keçdi. Boksçularımız yaxşı formadadırlar. Ümid edirik ki, nəticələr yaxşı olacaq”.
Dayaq idman növlərimizdən biri olan taekvondo üzrə yığmamızın hazırlığı ilə maraqlandıq. Taekvondo Federasiyasının vitse-prezidenti Niyaməddin Paşayev həm kişi, həm də qadın komandalarımızın Avropa Oyunlarına hazırlığı ilə bağlı son məşqlərin keçirildiyini diqqətə çatdırdı. Qeyd etdi ki, komandanın üzvlərinin öz potensialından maksimum istifadə etmələri üçün lazımi işlər görülür. Bakıda keçirilən dünya çempionatında uğursuzluqdan sonra yığma özünü toparlayıb yaxşı nəticə göstərməlidir. Vitse-prezident komandanın üzərinə düşən vəzifəni layiqincə yerinə yetirəcəyinə ümid etdiyini bildirdi.
“Minsk-2019”da 5 medal qazanan cüdoçularımız bu dəfə də nailiyyətləri ilə xalqımızı sevindirmək istəyirlər. Azərbaycan Cüdo Federasiyasının mətbuat xidmətinin rəhbəri Ülkər Abbasova 11 cüdoçunun (6 kişi, 5 qadın) ölkəmizi Polşada təmsil edəcəyini bildirdi: “Oyunlara hazırlıq məqsədilə təlim-məşq toplanışı uzun zamandır davam edir. İdmançılarımızın oyunlara maksimum səviyyədə hazırlaşması üçün federasiya tərəfindən bütün tədbirlər görülüb. Yığmamızdan yaxşı nəticələr gözləyirik”.
Kişi karateçilərdən ibarət Azərbaycan yığma komandasının baş məşqçisi Qurban Tağıyev Avropada kumite növü üzrə yarışlara ən çox lisenziyanı komandamızın qazandığını bildirdi: “Həm qadın, həm də kişi karateçilərimizə ümidimiz çox böyükdür. Düzdür, idmanda qələbələr olduğu kimi, məğlubiyyətlərdən də bəzən qaçmaq olmur. Komanda yüksək ruha köklənib. Polşaya qələbə üçün gedəcəyik”.
İkinci Avropa Oyunlarının qalibi və üçqat Avropa çempionu Asiman Qurbanlı Polşada keçiriləcək Oyunlarda ölkəmizi təmsil edəcək. İdmançı yarışların komandamız üçün yaxşı keçəcəyinə inanır: “Gündə 2, bəzən 3 dəfə məşq edirik. Yarışda potensialımızdan maksimum istifadə etməyə çalışacağıq. Yüksək nəticə ilə ölkəyə qayıdacağımıza ümid edirəm”.
Kikboksinq, atıcılıq, qılıncoynatma, badminton, muay-tay və digər idman idman növləri üzrə də komandalarımızın hazırlığı ilboyu diqqət mərkəzində olub ki, onlardan da yaxşı nəticələr gözləyirik.
Xatırladaq ki, 2023-cü il üçün Azərbaycan milli komandalarının vahid idman geyim forması ilk dəfə Polşada keçiriləcək III Avropa Oyunlarında istifadə olunacaq. İdman formasının təqdimat mərasimində çıxış edən gənclər və idman naziri Fərid Qayıbov deyib: “Dövlətimizin başçısı İlham Əliyevin idmanla bağlı tapşırıqları var. Bunlardan biri də vahid idman formasının olması idi. Artıq idmançılarımızın gözəl və ən əsası keyfiyyətli idman geyimi var. İdmançılarımız fəxr edə bilərlər ki, milli brendimizlə beynəlxalq arenalara çıxacaqlar”.
Komandamız artıq Oyunlara hazırdır. Azərbaycan nümayəndə heyəti bu nüfuzlu yarışda iştirak etmək üçün iyunun 20-də çarter reysi ilə Polşaya yola düşəcək.
Belə mötəbər yarışlarda böyük qələbə əldə etmək üçün güc və peşəkarlıqla yanaşı, qələbə əzmi, fədakarlıq və Vətənə sevgi lazımdır. İnanırıq ki, həmişə böyük əzmkarlıqla mübarizə aparıb adını ən güclü komandalar sırasına yazdıran vətənpərvər idmançılarımız bu dəfə də Vətənə qələbə ilə qayıdacaqlar!
Leyla QURBANOVA, “Xalq qəzeti”