Ukrayna Silahlı Qüvvələrinin əks-hücum əməliyyatı davam edir. İlk günlərdə itkilər böyük olsa da, Ukrayna ordusu Rusiyanın əsas müdafiə xəttinə çatmayıb.
Eyni zamanda, Ukrayna ordusunun hücumlarını dəf edərkən Rusiya piyada qoşunlarının daha böyük itkilər verdiyi bildirilir. Könüllü təslim olan və jurnalistlərlə söhbət edən əsirlər rusların əhval-ruhiyyəsinin aşağı olduğunu bildirirlər. Dağlıq Altaydan olan Anatoli adlı müqaviləli əsgər deyib ki, onun bölməsindəki insanlar ukraynalıların irəliləyişini gözlədikləri günlərdə demək olar ki, bir-biri ilə danışmayıblar. "Hər kəs susurdu, ukraynalı hərbçilərin hansı tərəfdən gələcəklərini düşünürdülər. Biz çox qorxurduq”.
Anatoli daha sonra bildirib: “Heç kim ölmək istəmirdi. Ümid edirdik ki, əks-hücum olmayacaq. İki gün ərzində hər şey sakit idi. Amma sonra güclü hücum başladı. Hər şey xaotik idi, güllələr, mərmilər başımızın üstündən uçurdu, səngərdə olanlar qaçırdılar. Artilleriya və minaatanların atəşi arasındakı fasilədə tarlalara baxaraq düşməni tapmağa çalışırdım. Amma heç kimi görmədim... Bir neçə dəqiqədən sonra Ukrayna Silahlı Qüvvələri meşə zolağına girdi və mənim olduğum səngərə əl qumbaraları atdılar. Yanımda olan beş nəfər, o cümlədən yaxın dostum Georgi öldürüldü. Mən səngərdən çıxaraq əllərimi qaldırıb qışqırmağa başladım: Təslim oluram, təslim oluram!”
Öz növbəsində, Uzaq Şərqdən olan rusiyalı çağırışçı Dmitri isə əlavə edib ki, uzun müddət səngərdə olsa da, növbəsi dəyişdirilməyib. “Bizim bölmədə tanklar və zirehli maşınlar üçün ekipajlar çatışmırdı. Onlar (Ukrayna Silahlı Qüvvələri - UNİAN) tanklardan, minaatanlardan, artilleriyadan bizə atəş açırdlar”, - deyə o bildirib.
Rus qoşunları isə Ukrayna hərbçilərinin irəliləməsini dayandırmaq üçün Ukraynanın cənubuna 20-dən çox helikopter yerləşdirib. “Ukrayna əks-hücum əməliyyatlarına başlayandan bəri Rusiya bölgədəki hücum helikopter qüvvələrini gücləndirib", – Britaniya Müdafiə Nazirliyi “Twitter”-də bildirib.
Kəşfiyyat rəsmilərinin fikrincə, helikopterlər işğalçılara Ukraynanın cənubunda qismən üstünlük əldə etməyə kömək edib. Yer hədəflərinə qarşı daha uzaq mənzilli raketlərdən istifadə edən hücum helikopterləri döyüşlərdə güclü rol oynayıb. Bu, Kiyevin hücumunu bir qədər səngidib.
Ukraynanın hücumunun tez bir zamanda uğura çıxaracağı isə mütləq deyil, münaqişə uzun müddət davam edə bilər. "Ukraynada dərhal həlledici nəticənin olacağı barədə təminat yoxdur. Biz bunu dərk etməliyik. Biz dərk etməliyik ki, Ukraynanı tələb olunan qədər dəstəkləməliyik, çünki söz vermişik", – Böyük Britaniyanın xarici işlər naziri Ceyms Kleverli deyib.
Ukrayna Müdafiə Nazirliyi isə bununla belə bildirib ki, əks-hücum əməliyyatı uğurludur, müdafiə qüvvələri bütün istiqamətlərdə iki kilometrə yaxın məsafədə irəliləyir və orada möhkəmlənirlər. “Son 24 saat ərzində Ukrayna hərbçiləri Tavriçesk istiqamətində irəliləyərək ruslara xeyli itki verib. Xüsusilə, rusların beşdən çox bölüyü və 90-a yaxın rus texnikası məhv edilib”,– “Tavriya” əməliyyat-strateji qoşun qruplaşmasının komandiri, briqada generalı Aleksandr Tarnavski bildirib.
Müdafiə nazirinin müavini Vladimir Qavrilovun bildirdiyinə görə isə, hazırda Ukrayna ordusu ruslarla müharibədə təşəbbüsü ələ alır. “Amma qələbə üçün düşmənə uzaqdan zərbələr endirməliyik. Bunun üçün isə uzaqmənzilli silahlara ehtiyacımız var. Ukraynanın bütün hərbi planları hesablamalara uyğun gedir. F-16 qırıcı təyyarələrinin yaxın zamanlarda Ukraynaya təhvil veriləcəyinə inanırıq”.
Hadisələrin bu fonunda Rusiya qoşunları Ukraynaya yenidən hava zərbələri endirib. Bu dəfə daha çox ballistik raketlərdən istifadə olunub. Rusiyanın 6 “Kinjal”, 6 “Kalibr” tipli qanadlı raketləri və 2 pilotsuz uçuş aparatı (PUA) zərərsizləşdirilib. Ən çox isə Xersonda dağıntılar olub. Nəticədə 2 nəfər mülki şəxs həlak olub, 25 sakin yaralanıb.
Pünhan ƏFƏNDİYEV, “Xalq qəzeti”