Aprelin 28-dən 30-dək Bolqarıstanın Kranevo şəhərində Dünya və Avropa Şotokan Federasiyasının (WSF/ESF) təşkilatçılığı ilə 13-cü Avropa çempionatı keçirilib. Avropa çempionatında milli komandamız da iştirak edib.

Federasiyadan “Xalq qəzeti”nə bildirilib ki, komandamızın kapitanı, ikinci dan qara kəmər sahibi, dünya çempionu tituluna sahib olan idmançımız +84 kiloqram çəkidə mübarizə aparan Ülvi Məmmədov keçirdiyi dörd döyüşdə qələbə qazanaraq fəxri kürsünün ən yüksək pilləsinə yüksəlib.
Rumıniya, Gürcüstan və Çex təmsilçisindən üstün olan həmyerlimiz finalda yerli idmançı ilə qarşılaşıb. O, bu görüşdən də qalib ayrılaraq Avropa çempionu titulunu qazanıb.

Qeyd edək ki, dünya çempionu Ülvi Məmmədov 2021-ci ilin oktyabrında Polşanın Katovis şəhərində 30-dan çox ölkənin iştirakı ilə keçirilən fudokan üzrə 25-ci Avropa çempionatında komanda döyüşlərində bürünc, 2021-ci ilin noyabrında Türkiyədə WSF üzrə dünya çempionatında gümüş, 2022-ci ildə Qırğızıstanda keçirilən Açıq Asiya çempionatında gümüş medal qazanıb. Ötən il Çexiyanın Pardubitse şəhərində Dünya Şotokan Federasiyasının (WSF) təşkilatçılığı ilə 12-ci dünya çempionatında isə Ü.Məmmədov dünya çempionu tituluna yiyələnib.

Elçin ABBASOV,
“Xalq qəzeti”