Planetin ən güclü pilotlarının şəhər trekləri arasında sürətdə tayı-bərabəri olmayan Bakı trasında gərgin mübarizəsi başlayıb. Formula 1 üzrə dünya çempionatının dördüncü mərhələsi – Azərbaycan Qran-Prisinə Formula 2 yarışı üzrə sərbəst yürüşlə start verilib.
Yarışda 11 komanda birincilik uğrunda mübarizə aparıb. Hər komandanı iki pilot təmsil edib. 45 dəqiqə davam edən sərbəst yürüşdə “Preme Racing” komandasının pilotu Oliver Berman birinci olub. “Hitech”in üzvü İsak Hajar yarışı ikinci, “Campos Racing”dən Kuş Maini üçüncü yeri tutublar.
Yarış “Dams” komandasının üzvü Artur Lekler üçün uğursuz olub. 23 yaşlı sürücünün maşını ikinci döngənin çıxışında fırlanandan sonra dayanıb.
Sonra Formula 1 pilotlarının sərbəst yürüşü başlayıb. Hər biri iki pilotdan ibarət 10 komanda 6 kilometrlik Bakı şəhər halqasında mübarizə aparıb. Bir saat davam edən mübarizədə ən yaxşı nəticəni "Red Bull"dan Maks Ferstappen göstərib. "Ferrari"dən Şarl Lekler ikinci, Ferstappenin komanda yoldaşı Serxio Peres üçüncü yeri tutub.
Bu yarışda “Alpine” komandasının pilotu Pyer Qasli sonacan mübarizə apara bilməyib. Pilotun bolidi yanaraq alışdığı üçün yürüşü dayandırmaq məcburiyyətində qalıb. “Haas” komandasının pilotu Kevin Maqnussen də sərbəst yürüşdə mübarizəni erkən başa vurub. O, maşınında yanacaq sistemində təzyiqin artması nəticəsində yürüşə davam edə bilməyib.
“Red Bull” komandasının rəhbəri Kristian Horner sərbəst yürüşdən sonra Bakı trekində təəccübləndirəcək çox şeyin olduğunu deyib. Sessiyanın yaxşı keçdiyini qeyd edən komanda rəhbəri bildirib ki, prioritet bazar gün keçiriləcək yarışda maksimum xal toplamaqdır.
“Mövsüm yeni başladığı üçün xal ehtiyatını artırmaq vacibdir. Pilotlarımız bir-biri ilə yarışa bilərlər. Yetər ki, bunu təmiz mübarizə ilə etsinlər”, – deyə o əlavə edib.
Formula 2 yarışlarının sıralanma turu da gərgin mübarizə şəraitində keçib. Burada pilotlar qəzasız ötüşməyiblər. Belə ki, “PHM Racing”in sürücüsü Bred Benavidesin bolidi birinci döngədə təhlükəsizlik maneəsinə çırpılıb və yararsız hala düşüb. 30 dəqiqə davam edən yürüşdə “Preme Racing” komandasının pilotu Oliver Berman qalib olub. “Rodin Carlin” komandasının üzvü Enzo Fittipaldi yarışı ikinci, “ART Grand Prix”in pilotu Teo Purşer üçüncü pillədə başa vurublar.
Günün sonunda Formula 1 pilotları sıralanma turunda güclərini nümayiş etdirirblər. Niderlandlı sürücü sıralama turunda qəza törədib. Belə ki, “Alpha Tauri” komandasının pilotu Nik de Vrisun bolidi təhlükəsizlik səddinə çırpılıb və yararsız hala gəlib.
Yarışı “Ferrari”nin pilotu Şarl Lekler qalib kimi başa vurub. “Red Bull Racing”in üzvləri Maks Ferstappen və Serxio Peres ilk üçlüyü tamamlayıblar.
Beləliklə, Azərbaycan Qran-Prisinin start düzülüşü bəlli olub.
Bu gün Formula 1 üzrə sprint yarışlarının təsnifat və əsas, Formula 2 üzrə isə sprint yarışı keçiriləcək. Sonuncu gün – sabah isə Formula 1 Azərbaycan Qran-Prisi, həmçinin Formula 2 üzrə ikinci yürüş keçiriləcək.
Qeyd edək ki, Bakı treki 51 dövrədən ibarət olub, ümumilikdə 306,049 kilometr məsafəni əhatə edir. Paytaxtımızda Formula 1 yarışı Avropa Qran-prisi adı ilə ilk dəfə 2016-cı ildə keçirilib. Sonrakı altı turnir Azərbaycan Qran-Prisi adlanıb. İlk yarışda almaniyalı pilot Niko Rozberq qalib adına layiq görülüb. Sonrakı yarışlarda Daniel Rikkardo (Avstraliya), Lyuis Hamilton (Böyük Britaniya), Valtteri Bottas (Finlandiya), Serxio Peres (Meksika) və Maks Ferstappen (Niderland) birinci yeri tutublar.
Hazırda “Red Bull”un niderlandlı sürücüsü Maks Ferstappen 132 xalla liderlik edir. Onun komanda yoldaşı meksikalı Serxio Peres 116, “Aston Martin”in ispaniyalı pilotu Fernando Alonso 85 xalla sonrakı pillələrdə qərarlaşıblar.
“Red Bull” 123 xalla Konstruktorlar kubokunda birinci yerdədir. “Aston Martin” 65 xalla ikinci, “Mercedes” 56 xalla üçüncü yeri tuturlar.
Leyla SABİRQIZI, “Xalq qəzeti”
.jpeg)
