UEFA Çempionlar Liqasının səkkizdəbir final mərhələsində gərgin mübarizə başa çatdıqdan sonra dörddəbir finalın püşkatma mərasimi keçirilib. “Eurosport”un məlumatına görə, mərasim UEFA-nın Nyondakı mənzil-qərargahında keçirilib.
Püşkatma nəticəsində dörddəbir final mərhələsində qarşılaşacaq komandalar məlum olub. Püşkatmaya əsasən, Madridin “Real” klubu Londonun “Çelsi” komandası ilə üz-üzə gələcək. Milanın “İnter” klubu Lissabonun “Benfika” komandasını sınağa çəkəcək.
İngiltərənin “Mançester Siti” klubu isə Almaniya təmsilçisi “Bavariya” ilə qarşlaşacaq. Dörddəbir finalın daha bir görüşü İtaliya klubları arasında keçiriləcək. Belə ki, həmin matç “Milan” və “Napoli” komandaları arasında oynanılacaq.
Dörddəbir final mərhələsinin ilk oyunları aprelin 11–12-də, cavab görüşləri həmin ayın 18–19-da keçiriləcək. Yarımfinal qarşılaşmaları mayın 9, 10-da və 16, 17-də oynanılacaq. Çempionlar Liqasının finalı isə iyunun 10-da İstanbuldakı Atatürk Olimpiya Stadionunda olacaq.
Qeyd edək ki, son 17 ildə ilk dəfədir ki, İtaliyada 3 komanda dörddəbir finala yüksəlir.
Elçin AĞAMİRZƏ, “Xalq qəzeti”
