Rusiya–Ukrayna müharibəsi özünün ən gərgin dövrünə qədəm qoyub. Son günlər olduqca geniş ərazi boyu uzanan cəbhənin bütün təmas xətti boyu döyüşlər intenvsiv xarakter almağa başlayıb. Görünən budur ki, hər iki tərəf Yeni il ərəfəsində kiçik də olsa, qələbə qazanmağa cəhdlər edir.
UNİAN agentliyi xəbər verir ki, hazırda ən gərgin vəziyyət Donetsk vilayətinin Marinka yaşayış məntəqəsi ətrafında yaranıb. Rusiya mühüm strateji əhəmiyyət kəsb edən bu şəhəri artıq ələ keçirdiyini iddia edir. Ukrayna rəsmiləri bunu təkzib edirlər və orada hələ də amansız döyüşlərin getdiyini bildirirlər.
Dünən Ukrayna Milli Təhlükəsizlik və Müdafiə Şurasının katibi Aleksey Danilov bildirib ki, Marinka şəhərinin bir hissəsi onun həmvətənlərinin nəzarətindədir. O, həmçinin ağır bombardmanlar nəticəsində şəhərdə bir dənə də olsun salamat bina qalmadığını vurğulayıb. Danilovun sözlərinə görə, Marinkada dağıntılar Baxmutda olduğundan da çoxdur.
Bu arada Ukrayna Silahlı Qüvvələrinin “Tavriya” əməliyyat-strateji qoşun qrupunun komandiri, general Aleksandr Tarnevski BBC-yə müsahibəsində bildirib ki, 2024-cü il Ukrayna üçün daha çətin il ola bilər. Onun sözlərinə görə, mövcud resurslar müharibəni dabam etdirmək üçün kifayət deyil: “Kiyevə döyüş meydanında uğur qazanmaq üçün əlavə qüvvələr və vasitələr lazımdır”.
A.Tarnevskinin fikrincə, ərazilərin minalarla “bol olması” da əks-hücum əməliyyatlarına mənfi təsir edir: “Rusiya dünyanın ən güclü ordularından birinə malikdir. Onun müdafiəsi bir yox, bir neçə xətdən ibarətdir. Qarşı tərəf bu müdafiə xətlərini bir ayda deyil, bizim hücum hərəkətlərinə hazırlaşdığımız dövrdə yaradıb”.
Xatırladaq ki, Rusiya ilə Ukrayna arasında genişmiqyaslı müharibə ötən il fevralın 24-də başlayıb. Ukrayna bu ilin iyunundan geniş əks-hücum əməliyyatları keçirir. Lakin bu məqsədlə aparılan döyüşlər gözləntiləri doğrultmayıb. Bəzi mənbələr müharibənin hətta illərlə davam edəcəyini ehtimal edirlər.
Hazırda bu dağıdıcı müharibənin nə vaxt bitəcəyini proqnozlaşdırmaq çox çətindir. Tərəflər güzəştə getmək barədə danışmaq belə istəmirlər. Rəsmi Kiyevin mövqeyinə görə, Ukraynanın ərazi bütövlüyü tam təmin olunmadan müharibə başa çatmayacaq. Moskva da öz hərbi planlarında israrlıdır.
Lakin son aylar Qərbin Ukraynaya hərbi və maliyyə dəstəyi azalmağa başlayıb. Məlumdur ki, ABŞ Senatı Ukrayna üçün 61 milyard dollarlıq yardım paketinin müzakirəsini növbəti ilə saxlayıb. Silah-sursat sarıdan da Kiyevin çətinlikləri yaranıb.
Ukrayna Prezidenti Volodimir Zelen-ski bir müddət əvvəl bildirmişdi ki, Qərb dəstəyi dayandırsa, ölkəsi geri çəkiləcək. Bu bəyanat daha çox xəbərdarlığa bənzəyir. Bunu nəzərə alaraq, Avropa İttifaqı (Aİ) Ukraynaya 20 milyard avro məbləğində maliyyə yardımı göstərmək üçün ehtiyat plan hazırlayır. Bu barədə nüfuzlu “Financial Times” qəzeti bir çox etibarlı mənbələrə istinadən məlumat yayıb.
Məqalədə, həmçinin qeyd olunur ki, Macarıstanın Baş naziri Viktor Orbanın dekabrın ortalarında Aİ-nin sonuncu sammitində 2024–2027-ci illər ərzində Ukraynaya 50 milyard avro ayrılmasını nəzərdə tutan icmal büdcəsinə düzəlişin qarşısını almasından sonra bu istiqamətdə yeni maliyyə variantları axtarılır. Bunun üçün isə müəyyən vaxt lazımdır.
Yeri gəlmişkən, müzakirə olunan yeni sxem Aİ üzvlərinin qurumun büdcəsinə maliyyə zəmanəti verməsini nəzərdə tutur ki, bu da Avropa Komissiyasına (AK) Kiyev üçün kapital bazarlarından 20 milyard avro borc almağa imkan verəcək. Bu sxemin əsas üstünlüyü ondan ibarətdir ki, o, Aİ-nin bütün üzvlərinin razılığını tələb etmir, yəni, Budapeştdən yeni veto riskini aradan qaldırır.
Bununla belə, “Financial Times” nəşri qeyd edib ki, Almaniya və Niderland kimi bəzi ölkələrin bu cür zəmanətlər vermək üçün parlamentin təsdiqinə ehtiyacı olacaq. Bu planla bağlı qərar hələ fevralın 1-də keçiriləcək sammitdə verilə bilər və Brüssel ümid edir ki, vəsait 2024-cü ilin martına qədər Kiyevə çatmalıdır.
Göründüyü kimi, Ukraynanın yaxın günlər və həftələr ərzində əlavə maliyyə yardımları əldə etmək imkanları məhduddur. Müharibədə isə hər saat, hər gün böyük vəsaitlər xərclənir. Napoleon deyirdi ki, hər bir müharibəni udmaq üçün üç şey tələb olunur: pul, pul və yenə də pul!
Bir çox ekspertlərin fikrincə, Rusiya–Ukrayna müharibəsinin nəticəsini resurslar müəyyən edəcək. Hansı tərəfin hərbi və əsgəri resursları çoxdursa, təbii ki, onun uğur qazanmaq şansı da böyükdür. Rusiyanın, yoxsa Ukraynanın resursları daha tez tükənəcək? Bu məchulun cavabını isə əlahəzrət Zaman verəcək!
P.ƏFƏNDİ,
M.HACIXANLI
XQ