Gürcüstanın Marneuli şəhərində “Heydər Əliyev İli”nin yekunlarına və Dünya Azərbaycanlılarının Həmrəyliyi Gününə həsr olunmuş “Heydər Əliyev və Azərbaycan–Gürcüstan mədəni əlaqələri” adlı mərasim keçirilib.
“Türk Ağsaqqallar İctimai Birliyi” (TAİB) və Marneulidəki “Çay evi” Təhsil və İnkişaf Mərkəzinin birgə təşkilatçılığı, Azərbaycanın Gürcüstandakı səfirliyinin dəstəyi ilə reallaşan tədbirdən öncə şəhərdəki Mədəniyyət Mərkəzində Ulu öndərin həyat və fəaliyyətini əks etdirən elektron fotosərgiyə baxış olub.
Azərbaycanın Gürcüstandakı səfirliyinin müşaviri Eldar Bayramov çıxış edərək Heydər Əliyevin həyat və fəaliyyəti barədə geniş məlumat verib. Vurğulayıb ki, müasir Azərbaycan və Gürcüstan dostluğu və qardaşlığı da məhz Ümummilli liderin adı ilə bağlıdır. “Təhsil və İnkişaf Mərkəzi”nin direktoru Emin Əhmədov soydaşlarımızı qarşıdan gələn Yeni İl və Dünya Azərbaycanlılarının Həmrəyliyi Günü münasibətilə təbrik edib.
Qonaqlar – “Türk Ağsaqqallar İctimai Birliyi"nin sədri, akademik Südeyf İmamverdiyev, Əməkdar jurnalisti Telli Pənahqızı, tarixçi alim, akademik Sabir Tağıyev Azərbaycan dövlətinin inkişafında və dünya ölkələri sırasında layiqli yer tutmasında Ümummilli liderin xüsusi xidmətləri barədə danışıblar. Tədbir çərçivəsində gürcü tarixçi alim, politoloq Quram Marxuliyaya Turan Elmlər Akademiyasının akademiki fəxri adı təqdim olunub. Gürcüstan Mədəniyyət Akademiyası İcraiyyə Şurasının sədri, Gürcüstan Sosial Elmlər Akademiyasının akademiki Şota Maqlakelidze Ulu öndərlə bağlı xatirələrini bölüşüb.
Tədbir bədii hissə ilə davam edib.
Nizami MƏMMƏDOV
Gürcüstan, Marneuli
