NATO üzvləri Ukraynanın məğlubiyyətinin Avropa İttifaqına (Aİ) təsirini “sakit şəkildə” müzakirə etməyə başlayıblar. “Bloomberg” mənbələrinin fikrincə, bu, ABŞ-ın müdafiə vədləri ilə bağlı şübhələrə səbəb olacaq. 

Şimali Atlantika Alyansının avropalı üzvləri Moskvanın şərqdə NATO üzvləri üçün yarada biləcəyi riskləri yenidən qiymətləndirərək, Ukraynanın Rusiya ilə münaqişədə məğlubiyyətinin bloka təsirini “sakit şəkildə nəzərdən keçirməyə” başlayıblar. Daxili müzakirələrdən xəbərdar mənbələr “Bloomberg”ə bildiriblər. Belə bir ssenaridə, ABŞ-ın tərəfdaşları və müttəfiqləri Vaşinqtonun müdafiə vədlərinin etibarlılığını şübhə altına almağa başlayanda dalğalanma effekti bütün dünyada hiss olunacağını deyirlər. Agentliyin həmsöhbətləri hesab edirlər ki, “belə bir strateji uğursuzluğun” nəticələri Amerika qoşunlarının 2021-ci ildə Əfqanıstandan çıxarılmasından sonra daha dərin olacaq. ABŞ kontingentinin çıxarılmasından sonra Taliban Əfqanıstanda hakimiyyəti ələ keçirmişdi.

Avropa İttifaqında bu cür müzakirələr ABŞ və Aİ-də Ukraynaya hərbi və maliyyə yardımının ayrılmasına dair razılaşmanın olmaması fonunda başlayıb. Agentliyin yazdığına görə, Avropa rəsmiləri hesab edirlər ki, Kiyev lazımi silahları almasa, bu, onu Moskvanın şərtləri ilə atəşkəs razılaşmasını qəbul etməyə məcbur edə bilər. Ukraynaya yardımın gələn ilin əvvəlində təsdiqlənəcəyi ilə bağlı iddialara baxmayaraq, rəsmilər bunun “döyüş meydanında böyük irəliləyiş”ə səbəb olmayacağını və mübarizənin “illər boyu” davam edə biləcəyini deyirlər. Məqalədə qeyd edilir ki, Prezident Co Baydenin ictimai təminatlarına baxmayaraq, ABŞ və digər müttəfiqlərin, həqiqətən, kiçik ölkələri qorumaq üçün öz qoşunlarını riskə atıb-atmayacağına dair suallar artır.  

Noyabrda NATO-nun baş katibi Yens Stoltenberq demişdi ki, Rusiyanın Ukraynada qələbəsi Şimali Atlantika Alyansını zəiflədəcək, nüfuzunu sarsıdacaq. 

S.Məmmədov 
XQ