Böyük güclərin hərbi və siyasi intriqaları isə bitmək bilmir
Anomal istilərin dünyanı cənginə aldığı bu günlərdə planetimizin bir guşəsi var ki, orada ağır döyüşlər nəinki səngimir, əksinə, günbəgün güclənir. Bura mehriban və vətənpərvər insanların doğma yurdu olan Ukraynadır. Orada insanlar təkcə dözülməz istilərdən əziyyət çəkmir, onlar üçün daha dəhşətlisi bomba və raketlərin yaratdığı ölüm qorxusu və ağır məhrumiyyətlərdir.
Döyüşlər isə min kilometrlərlə uzanan cəbhə boyu aramsız olaraq davam edir. UNİAN agentliyi yazır ki, dünən Rusiya hərbçiləri Donetsk vilayətinin Pokrovsk şəhərinin mərkəzindəki yaşayış binalarına raketlərlə zərbələr endiriblər, çox sayda itkilər var.
Ukrayna Prezidenti Volodimir Zelenski özünün “Teleqram” kanalındakı səhifəsində yazıb ki, Rusiyanın yalnız dağılmış və yanmış daşlar qoymağa çalışdığı Donbasa iki raket zərbəsi endirilib. Yaşayış binasına dəyib. Təəssüf ki, həlak olanlar var. Xilasedicilər və bütün lazımi xidmətlər hadisə yerindədir. İnsanlar təxliyə edilir.
Donetsk vilayət hərbi administrasiyasının rəhbəri Pavel Kirilenkonun sözlərinə görə, Pokrovsk şəhərinə “İsgəndər” tipli raketlərlə hücumlar edilib. Nəticədə çoxmərtəbəli evlərə, özəl sektordakı yaşayış binalarına, mehmanxana, iaşə obyektlərinə, mağaza və inzibati binalara ziyan dəyib.
Ukrayna mətbuatı təəssüf hissilə bildirir ki, Rusiyanın “Kinjal” hipersəs raketləri Ukraynanın təyyarə mühərrikləri istehsal edən “Motor Sich” zavodunu vurub. Qeyd edək ki, müəssisənin buraxdığı mühərriklər əsasən “Akıncı” Pilotsuz Uçuş Aparatı (PUA) və “Kızılelma” və “Anka-3” raketləri üçün nəzərdə tutulub. “Motor Sich” obyektlərinin hədəfə alındığını dövlət başçısı V.Zelenski də təsdiqləyib.
Məlumatda bildirilir ki, Xmelnitsk bölgəsindəki obyekti hədəfə alan Rusiya aviasiyası Ukraynanın bəzi fərqli nöqtələrinə də raket hücumları həyata keçirib.
Raket hipersəslə, yəni səsdən beş dəfə yüksək sürətlə uça bilir. Yüksək hündürlükdən təyyarədən buraxılan raket saatda 6125 kilometr sürətlə hədəfinə çata bilir. Bu yüksək sürətə görə onları vurmaq çox çətindir.
Bu arada Moskva vilayətinin Sergiyev Posad şəhərində partlayış baş verib. 31 nəfərin yaralandığı bildirilir. Vilayətin qubernatoru Andrey Vorobyovun sözlərinə görə, yaralananlardan 19-u hospitala yerləşdirilib. Dünən axşam Rusiya paytaxtının Ukrayna tərəfindən atılan dron zərbələrinə tuş gəldiyi barədə xəbərlər yayılıb.
Rəsmi Kiyev bundan narazılığını gizlətməsə də, Qərb müttəfiqləri Ukraynanı lazımi silahlarla təchiz etməyə çalışırlar. Məsələn, Almaniya Kansleri Olaf Şolts və hakim Sosial Demokrat Partiyasının (SDP) nümayəndələri Berlinin müəyyən şərtlər daxilində Ukraynanı uzaqmənzilli “Taurus” qanadlı raketləri ilə təchiz etməyə hazır olduqlarını bəyan ediblər.
Fakt budur ki, ilyarımdır davam edən Rusiya–Ukrayna müharibəsi sonu görünməyən, üzücü bir mərhələyə daxil olub. Analitiklərin fikrincə, Ukraynanın əks-hücumu bu vaxtadək Kiyevin və Qərbin gözləntilərini doğrultmayıb. Deməli, müharibə daha da uzana bilər.
Bu günlərdə məşhur CNN telekanalı Rusiya–Ukrayna müharibəsindəki vəziyyət barədə analitik material yayımlayıb. Orada qeyd olunur ki, Ukrayna hökuməti ABŞ və Qərbin silah tədarükündən asılıdır. Döyüş meydanında verilən qurbanlar Ukraynanın nə qədər ərazini geri qaytara biləcəyinə təsir göstərəcək, lakin müharibənin nəticəsi Vaşinqton, Moskva və Avropa paytaxtlarındakı qəbul edilən hərbi və siyasi qərarlardan asılı olacaq.
Böyük güclər isə yalnız öz milli maraqlarından çıxış etdikləri üçün heç cür ortaq məxrəcə gələ bilmirlər. Hər gün Ukraynada bomba və raket zərbələri altında qalan günahsız insanlar isə həlak olurlar.
CNN-in materialında həmçinin qeyd olunub ki, sabiq dövlət başçısı Donald Tramp respublikaçıların 2024-cü il prezident seçkilərində namizədi olmasa belə, müharibəyə ictimai dəstəyin itirilməsi Co Baydenə zərər vura bilər. Bayden Ukraynadan uğurlu əks-hücum gözləyir. Bu, ona çox lazımdır.
Bəli, Ağ ev tələsir və həm siyasi, həm də strateji səbəblərdən Ukraynanın bu yay başlatdığı və çoxdan gözlənilən əks-hücumu üzərində nəzərəçarpan döyüş irəliləyişləri əldə etməsi üçün nəhəng təzyiq göstərir.
Məsaim ABDULLAYEV,
“Xalq qəzeti”