On yeddi aydan çox davam edən Rusiya–Ukrayna savaşında tərəflərin bir-birlərinə qarşı ən çox istifadə etdiyi silah növü pilotsuz uçuş aparatları – PUA-lardır. Elə bir gün olmur ki, Rusiya Ukraynanın şəhər və kəndlərini dron atəşinə məruz qoymasın. Ukrayna tərəfi də ara-sıra cavab tədbirləri görür.
Dünən, avqustun 3-də Rusiya ordusu Kiyev və Odessa şəhərlərinə yenidən İran istehsalı olan “Şahed” dronları ilə hücum edib. UNİAN agentliyi yazır ki, paytaxtda partlayış səsləri eşidilib, Dunaydakı limanlarda yanğınlar baş verib.
Kiyev şəhərinin hərbi müdafiə idarəsinin rəisi Sergey Popko Kiyevə tərəf uçan bütün kamikadze dronlarının vurulduğunu, şəhər əhalisi arasında həlak olan və ya xəsarət alanların olmadığını bildirib: “Dronlar eyni vaxtda paytaxta bir neçə istiqamətdən daxil olub. Buna baxmayaraq, 10-dan çox uçuş aparatı Hava Hücumundan Müdafiə Qüvvələri tərəfindən vaxtında müəyyən edilərək məhv edilib”.
Kiyevin meri Vitali Kliçko təsdiq edib ki, vurulan pilotsuz raketlərin hissələri şəhərin üç rayonuna düşsə də, ciddi dağıntı olmayıb. Bir vaxtlar dünya şöhrətli boksçu olmuş hazırkı mer onu da bildirib ki, dronlardan qeyri-yaşayış binasına ziyan dəyib, başqa bir yerdə isə ağac yanıb. Ukraynanın Fövqəladə Hallar üzrə Dövlət Xidməti yetkilisinin sözlərinə görə isə, pilotsuz təyyarənin qalıqlarının Kiyev vilayətinin Buçanski rayonundakı fərdi yaşayış evinə düşməsi nəticəsində yanğın baş verib. Bütün hallarda insan tələfatı olmayıb.
Öz növbəsində, Kiyev vilayət hərbi administrasiyasının rəhbəri Ruslan Kravçenko qeyd edib ki, qəsəbələrdən birinin üzərində vurulan pilotsuz uçuş aparatının qalıqları mağazanın damına ziyan vursa da, itki olmayıb. Odessa vilayət administrasiyasının rəhbəri Oleq Kiper isə xəbər verib ki, dünən gecə vaxtı Rusiyanın dron hücumundan sonra Dunaydakı Ukrayna limanlarında yanğınlar başlayıb, elevator zədələnib.
Rusiya–Ukrayna müharibəsi səngimir. Amma, təkcə döyüş meydanında deyil, informasiya sahəsində də “müharibə” şiddətlənir. Hər iki tərəfdən “feyk xəbərlər”in sayı durmadan artır. Məqsəd rəqib tərəfində ruh düşkünlüyü yaratmaqdır. Ukrayna bəzən təkcə rəqibindən başqa, öz müttəfiqlərindən də “zərbələr” alır. Məsələn, bu günlərdə Polşa prezidentinin xarici siyasət üzrə müşaviri Marcin Pşidaç rəsmi Kiyevin Rusiya ilə müharibədə Varşavanın dəstəyinə daha çox dəyər verməli olduğunu söyləyib. Bu fikir Ukrayna rəsmiləri tərəfindən birmənalı qarşılanmayıb. Polşanın Kiyevdəki səfiri Ukrayna XİN-ə dəvət olunub. Prezidentin müşaviri həmin qalmaqallı çıxışında həmçinin bildirib ki, onun ölkəsi gələn aydan Ukraynanın kənd təsərrüfatı mallarının idxalına müəyyən məhdudiyyətlər qoya bilər. Onun sözlərinə görə, Polşa hökuməti, ilk növbədə öz fermerlərinin maraqlarını qorumalıdır.
Bu arada Ukrayna Prezidenti Volodimir Zelenski ölkə səfirlərinə müraciət edərək onlara Rusiyaya qarşı sanksiyaların gücləndirilməsi üzərində işləməyi tapşırıb. Dövlət başçısı bu barədə çıxışında deyibdir: “Fərqli tərəfdaşlarımızın sanksiya siyasəti mahiyyəti fərqlidir. Kimsə bu istiqamətdə liderdir, kimsə hələ də tərəddüd edir, bir az geri qalır. Təəssüf ki, Rusiyaya sanksiyalardan yan keçməyə, əslində isə torpağımızda terroru davam etdirməyə kömək edən ölkələr var”.
V.Zelenski sonra qeyd edib ki, azad dünya ölkələrində müdafiə sənayesi üçün kritik komponentlər və ikili təyinatlı məhsullar istehsal edən iri şirkətlər var. Bütün bu mallar sanksiyalara baxmayaraq, müxtəlif yollarla Rusiyaya çatdırılır. Prezident hazırkı məqamda buna qarşı diplomatik mübarizənin gücləndirilməsinin olduqca vacib olduğunu vurğulayıb.
Bu yazının əvvəlində qeyd etdik ki, rəqiblər bir-birlərinə qarşı, əsasən, dronlardan istifadə edirlər. Lakin unutmaq olmaz ki, ta qədim dövrlərdən bugünə qədər hər bir savaşın əsas qəhrəmanı, əlbəttə, əsgər və zabitlərdir. Bu gün Ukrayna əsgəri motivasiyalıdır, o, öz doğma torpaqlarının müdafiə və azad olunması naminə canından keçir.
Sirr deyil ki, Avropanın bir çox ölkələrindən olan könüllülər Ukraynanın tərəfində vuruşur. Dünən qlobal KİV-də yayılan məlumata görə, Çexiya Prezidenti Petr Pavel ölkəsinin daha 14 vətəndaşının Ukrayna müharibəsində iştirak etməsinə icazə verib. Bu barədə dövlət başçısının mətbuat xidmətindən bildirilib.
Qeyd olunub ki, çex könüllülər Ukrayna Silahlı Qüvvələrinə Rusiyanın hücumunu dəf etməkdə yardım göstərəcəklər. Hazırda 146 çex savaşda iştirak edir. Nəzərə çatdırmaq istərdik ki, hazırda Ukrayna Ordusunun sıralaraında Baltikyanı ölkələrdən, eləcə də qonşu Polşa, Rumıniya, Bolqarıstan və digər dövlətlərdən olan könüllülər də az deyil.
Dünən axşam saatlarında qəzetimiz çapa hazırlanarkən bəlli oldu ki, Ukrayna ordusu cəbhənin Donetsk və Zaporejye istiqamətlərində geniş əks-hücum əməliyyatları həyata keçirməyə cəhd edib. Hərbi əməliyyatın nə qədər uğurlu olduğu barədə dəqiq məlumatlar yoxdur. Ukraynanın Milli Təhlükəsizlik və Müdafiə Şurasının katibi Oleksiy Danilov bildirib ki, əks-hücum əməliyyatları ilə bağlı konkret qrafik yoxdur: “Kiyevdən başqa, kimsə əks-hücum əməliyyatlarımızı müəyyənləşdirə bilməz. Hansısa müddətdən danışanlar hərbi əməliyyatların nə olduğunu başa düşmürlər. Əməliyyat şəraiti çətin və mürəkkəbdir. Buna təsir edən bir sıra amillər var”.
O.Danilovun sözlərinə görə, Ukrayna öz silahları ilə Rusiya ərazisinə zərbələr endirmək hüququna malikdir: “Qarşı tərəf, demək olar ki, hər gün bizim uşaqlarımızı öldürür. Biz buna necə dözə bilərik?”. Fakt budur ki, Ukraynada bütün cəbhə boyu ağır, üzücü döyüşlər davam edir. Tərəflər hər gün xeyli sayda canlı itki verirlər. Müharibənin nə vaxt bitəcəyi isə məlum deyil.
Məsaim ABDULLAYEV, “Xalq qəzeti”