2020-ci ildə Hindistan-Çin sərhədində baş verən hərbi münaqişə Hindistan və Çin arasındakı münasibətlərdə strateji etimadı sarsıdıb. Bunu Hindistan Baş nazirinin milli təhlükəsizlik üzrə müşaviri Ajit Doval Çin Kommunist Partiyası (ÇKP) Mərkəzi Komitəsinin (KK) Xarici Əlaqələr Komissiyasının ofisinin rəhbəri, ÇKP MK Siyasi Bürosunun üzvü Vanq İ ilə görüşdə deyib.
Onların söhbəti bazar ertəsi BRİKS ölkələrinin (Braziliya, Rusiya, Hindistan, Çin, Cənubi Afrika) təhlükəsizlik məsələlərinə cavabdeh olan yüksək nümayəndələrinin Yohannesburqda keçirilən görüşü çərçivəsində baş tutub.
“Hindistan-Çin sərhədinin qərb sektorunda 2020-ci ildə yaranmış faktiki nəzarət xətti boyunca yaranmış vəziyyət [Hindistan-Çin] əlaqələrinin strateji etimadını və ictimai-siyasi əsasını sarsıdıb”, - deyə Doval çərşənbə axşamı Hindistan Xarici İşlər Nazirliyinin yaydığı press-relizdə bildirib.
"Doval ikitərəfli münasibətlərin normallaşmasına maneələrin aradan qaldırılması üçün vəziyyətin tam həlli və sərhədyanı ərazilərdə sülh və əmin-amanlığın bərpası üçün səylərin davam etdirilməsinin vacibliyini vurğulayıb", - Hindistan Xarici İşlər Nazirliyi bildirib.
Xarici İşlər Nazirliyinin qeyd etdiyi kimi, tərəflər Hindistan və Çin arasındakı münasibətlərin təkcə iki ölkə üçün deyil, həm də Asiya regionu və bütün dünya üçün əhəmiyyətli olması barədə razılığa gəliblər.
"Xalq qəzeti"