“Threads” platforması 5 gün ərzində 100 milyon istifadəçiyə çatıb. Digər tərəfdən isə “Twitter” şirkəti proqramın istifadəsində artım olduğunu iddia edib. Bəs bu iki rəqib platforma arasında fərqlər nələrdir?
“Twitter” və “Threads” platformaları arasındakı fərqlərin başlanğıcında paylaşılan yazılarda simvol məhdudiyyətləri dayanır. Belə ki, “Threads” platformasında bu rəqəm 500 olduğu halda, “Twitter”-də 280-dir. Bundan əlavə, hər iki platformada linklər və fotoşəkillər paylaşılarkən “Threads”də 5 dəqiqəyə qədər video, “Twitter”-də isə 2 dəqiqə 20 saniyə qədər video yükləmək mümkündür..
Hər iki proqramda da paylaşılan yazılar hələ ki redaktə oluna bilmir. Bir istifadəçi “Twitter”də başqa bir istifadəçiyə mesaj göndərə bilsə də, “Threads”də hələlik bu mümkün deyil. Həmçinin, hələ “Threads”də heç bir reklam yayımlanmayıb.
Xatırladaq ki, “Meta” şirkəti “Threads” platformasını 6 iyulda istifadəçilərə təqdim edib.
Əfsanə ƏHƏDLİ, “Xalq qəzeti”