ABŞ Prezidenti Co Bayden Rusiyanın taktiki nüvə silahından istifadə təhlükəsini “real” adlandırıb.
ABŞ Prezidenti Kaliforniyada çıxışı zamanı deyib: “Təxminən 2 il əvvəl burada olarkən və Kolorado çayının qurumasından narahat olduğumu deyəndə hamı mənə dəli kimi baxırdı. Putinin taktiki nüvə silahından istifadə edə biləcəyindən narahat olduğumu deyəndə də mənə o cür baxırlar. Bu, realdır”. Daha əvvəl Ağ ev rəhbəri Rusiyanın Belarusda bu cür silahlar yerləşdirməsini pisləyib və Putinin bəyanatını tamamilə məsuliyyətsizlik adlandırıb.
Xatırladaq ki, bundan əvvəl Rusiya Prezidenti Vladlmir Putin Rusiya Federasiyasının nüvə silahlarının Belarus ərazisində yerləşdirilməsinə başlandığını elan etmişdi: “Bunda qeyri-adi heç nə yoxdur. ABŞ onilliklərdir ki, bunu edir. Onlar uzun müddətdir ki, öz taktiki nüvə silahlarını Avropadakı müttəfiq ölkələrinin, NATO ölkələrinin ərazilərində yerləşdirirlər. 6 dövlətdə Almaniya Federativ Respublikası, Türkiyə, Hollandiya, Belçika, İtaliya və Yunanıstanda nüvə silahı yerləşdirilib. Bəli indi Yunanıstanda yoxdur, amma anbar var. Belarusla razılaşdıq ki, biz də eyni şeyi edəcəyik. Biz bunu nüvə silahının yayılmaması ilə bağlı beynəlxalq öhdəliklərimizi pozmadan edəcəyik”.
“Xalq qəzeti”
