Ukrayna münaqişəsi başlanandan ABŞ və Çin arasında soyumaqda olan diplomatik münasibətlərin normallaşacağına ümidlər vəd edən görüş baş tutdu. Məhz Ukraynada xüsusi hərbi əməliyyatlara baş vuran Rusiyaya fərqli münasibətləri səbəbindən iki supergücün mövqeyində yumşalmaya doğru atılacaq addımları Qərbdə olduğu kimi, Şərqdə də gözləyənlər az deyildi. Deyəsən, qarşılıqlı anlaşmaya yönəlik cəhdlər fayda verməyə, ikitərəfli münasibətlərdə yaranan buzlar əriməyə başlayır. İki ölkənin rəsmiləri iki gün ərzində keçirilən danışıqlardan ciddi qərarların qəbulunu gözləməsələr də, təmasların əsas məqsədinin iki ölkə arasındakı “yüksək hərarətli siyasi münasibətlərin” yumşaldılması və sabitliyin bərpası olduğunu qeyd ediblər.
ÇXR Xarici İşlər Nazirliyinin sözçüsü Hua Cunying ABŞ rəsmilərinin səfərindən məmnun olduqlarını və bu səfərin İndoneziyada keçirilən G20 Sammitində bir araya gələn ABŞ Prezidenti Co Bayden və Çinin dövlət başçısı Si Cinpin tərəfindən razılaşdırıldığını bildirib. Çin diplomatının sözlərindən bu nəticə hasil olur ki, A.Blinkenin bu səfərini iki supergüc arasında münasibətləri yaxşılaşdırmaq istiqamətində razılaşmanın ilk addımı saymaq olar.
* * *
Əslində, A.Blinkenin Pekinə səfəri cari ilin fevral ayına planlaşdırılmışdı və bu barədə rəsmi açıqlama da verilmişdi. Amma Çinə aid olduğu deyilən casus şarının Birləşmiş Ştatların hava məkanına daxil olmasından sonra səfər təxirə salınmışdı. Pekinə ikigünlük səfəri çərçivəsində A.Blinken öncə Çinin xarici işlər naziri Qin Qanq, daha sonra Çin Kommunist Partiyası (ÇKP) Mərkəzi Komitəsinin xarici əlaqələr komissiyası ofisinin direktoru Vanq Yi ilə görüşüb. İyunun 19-da günün ikinci yarısında ÇXR Sədri Si Cinpin ABŞ Dövlət katibinin başçılıq etdiyi nümayəndə heyəti ilə görüşüb.
Zamanın dəyişdiyini, dünyaya yeni Çin-Amerika münasibətlərinin lazım olduğunu yüksək qonağın diqqətinə çatdıran Si Cinpin bəşəriyyətin gələcək perspektivlərinin və taleyinin Pekin və Vaşinqtonun bir-biri ilə uzlaşmasının düzgün yolunu tapmalarından asılı olduğunu vurğulayıb. Çin lideri hər iki ölkənin qarşılıqlı tərəqqisi və birgə çiçəklənməsi naminə planetin geniş ərazisinin kifayət etdiyini söyləyərək, çinlilərin də amerikalılar kimi fərdi ləyaqət hissinə, özünə, öz gücünə söykənən özünəinama malik olduqlarını və hamının yaxşı yaşamağa haqqı çatdığını qeyd edib: “İki ölkənin ümumi maraqlarına xüsusi əhəmiyət vermək vacibdir. Tərəflərdən birinin əldə etdiyi uğurlar digər tərəf üçün təhdid deyil, əksinə, yaxşı şansdır. Cənab Dövlət katibi, ümid edirəm ki, bu səfərinizin sayəsində siz Çin və Amerika arasında münasibətlərin sabitləşməsinə daha müsbət töhfənizi verəcəksiniz”.
Birləşmiş Ştatların Çinlə münasibətlərinə daim məsuliyyətlə yanaşdığını bəyan edən Antoni Blinken bu səfərin prezident Co Baydenin təşəbbüsü ilə baş tutduğunu Si Cinpinin diqqətinə çatdırıb: “Cənab Prezident məndən Pekinə getməyimi xahiş elədi. Çünki o hesab edir ki, ABŞ və Çinin üzərində bizim münasibətlərimizin idarə olunmasına görə öhdəlik və məsuliyyət var. Bu, həm Birləşmiş Ştatların və Çinin, həm də bütün dünyanın marağındadır. İki gün ərzində bizim xarici işlər naziri Qin Qanq, xarici əlaqələr komissiyası ofisinin direktoru Vanq Yi ilə səmərəli görüşlərimiz oldu. Biz ikitərəfli və qlobal məsələlərin geniş dairəsini müzakirə etdik. Sizinlə bundan sonrakı fəaliyyətimizi müzakirə etmək imkanını isə yüksək qiymətləndirirəm”. Yüksək səviyyəli Pekin dialoqu ilə bağlı Çin və ABŞ mediasının şərhlərinə əsasən deyə bilərik ki, bu görüş ilin sonuna qədər iki supergüc liderləri arasında sammitin keçirilməsinə yaxşı təməl rolunu oynaya bilər.
P.S. ABŞ-dan Çinə sonuncu diplomatik səfər 2018-ci ildə keçmiş dövlət katibi Mayk Pompeo tərəfindən olub.
İ.HƏSƏNQALA, “Xalq qəzeti”