Beynəlxalq Valyuta Fondunun məlumatına görə, Avrozona iqtisadiyyatı Rusiyanın Ukraynaya təcavüzündən və ondan sonra baş verən ticarət qarışıqlığından bəri qeyri-adi dayanıqlılıq nümayiş etdirib. Bununla belə, Avropada iqtisadi fəallıq zəifləyib, inflyasiya tədricən azalsa da, yüksək olaraq qalır.
BVF-nin rəhbəri Kristalina Georgiyeva “Euronews”a müsahibəsində vurğulayıb ki, avrozona üçün ən təhlükəli məsələ iqtisadi artıma mənfi təsir göstərə biləcək uzunmüddətli yüksək inflyasiyanın olmasıdır. BVF-nin son proqnozlarına görə, inflyasiya 2025-ci ilin ortalarına qədər nəzərdə tutulduğundan, yuxarı qalxa bilər.
Keçən il Avropa İttifaqında inflyasiya 10 faizi ötübsə, indi səngiyib. Avropa Mərkəzi Bankı inflyasiyanın bu il orta hesabla 5,4 faiz olacağını və 2025-ci ilə qədər 2,2 faizə düşəcəyini proqnozlaşdırır. Bununla belə, bu proqnoz hələ də AMB-nin üstünlük verəcəyi 2 faizdən yüksəkdir.
.jpg)
