Pekin və Vaşinqton Çin–ABŞ münasibətlərinin inkişaf yolunu seçməlidir - əməkdaşlıq, yoxsa qarşıdurma? Bunu Çin Kommunist Partiyası Mərkəzi Komitəsinin xarici məsələlər üzrə komissiyasının dəftərxana rəhbəri, Siyasi Büronun üzvü Van İ ABŞ dövlət katibi Antoni Blinkenlə görüşdə deyib.
“Birləşmiş Ştatların dövlət katibinin Pekinə səfəri Çin–ABŞ münasibətlərindəki böhranlı dövrə təsadüf edir. Biz dialoq və ya qarşıdurma, əməkdaşlıq və ya münaqişə arasında seçim etməliyik”, - deyə Van İ vurğulayıb. O, həmçinin iki ölkə arasında münasibətlərin pisləşməsi prosesini dayandırmağa, “sağlam və sabit inkişaf yoluna” qayıtmağa çağırıb. Antoni Blinken isə “twitter” səhifəsində Van İ ilə ikitərəfli münasibətləri, ölkə daxilində və bütün dünyada insanlara təsir edən qlobal əhəmiyyətli məsələləri müzakirə etdiyini yazıb.
ABŞ dövlət katibi iyunun 18–19-da Pekində səfərdə olub. Dövlət Departamentinin bir qədər əvvəl təsdiqlədiyi məlumata görə, Antoni Blinken bu gün ÇXR-in sədri Si Cinpinlə görüşəcək.
“Xalq qəzeti”
