Son günlər Rusiya-Ukrayna savaşı yenidən aktiv fazaya keçib. Dünən cəbhənin bir çox istiqamətlərində qızğın döyüşlərin getdiyi barədə məlumatlar yayılıb. Hər iki tərəfdən itkilərin olduğu bildirilir. 

“The Associated Press” agentliyi ABŞ-dakı Müharibə Araşdırmaları İnstitutuna istinadən yazıb ki, Uk­rayna hərbçiləri dünən Zaporojye vilayətində bir neçə istiqamətdən hücuma keçiblər və müəyyən qədər irəli gediblər. 

Hələlik söhbət məhdud taktiki uğurlardan gedir. Lakin təhlilçilə­rin fikrincə, bu, Ukraynanın çoxdan gözlənilən əks-hücum əməliyyatları­na başladığına dəlalət etmir. 

UNİAN agentliyinin verdiyi xə­bərə görə, dünən Ukrayna ordusu Donetsk vilayətinin qərb hissəsində, Zaporojye vilayətinin isə şərqində uğurlu lokal hücum əməliyyatları hə­yata keçirib. Ukraynanın mexanik­ləşdirilmiş hərbi birlikləri Rivnopolya istiqamətində irəliləyə biliblər.

Belə bir xəbər də yayılıb ki, Rusiya hərbçiləri Levadnomda öz mövqelərin­dən geri çəkilməli olublar.

Rəsmi Moskva bütün bu faktları təkzib edir, əksinə, cəbhənin bir çox is­tiqamətlərində Rusiya silahlı qüvvələri­nin üstün mövqelər qazandığını bildirir. Göründüyü kimi, tərəflər bir-birinə qarşı həm də kəskin dezinformasiya mühari­bəsi aparırlar. 

Yeri gəlmişkən, cəbhədə baş verən qızğın döyüşlər barədə xəbərlər sosial şəbəkələrdə də öz əksini tapır. Bir çox blogerlərin məlumatlarına görə, Ukrayna hərbçiləri dünən Donetsk və Zaporojye vilayətlərində rəqibin müdafiəsinin birinci eşolonunu yararaq 500 metrdən 3 kilo­metrədək irəliləyiblər. Lakin bu faktları dəqiqləşdirmək mümkün olmayıb. 

Ukrayna Quru Qoşunlarının koman­danı, general-polkovnik Aleksandr Sırs­ki bildirib ki, Ukrayna Silahlı Qüvvələri Svatovsk rayonu (Luqansk vilayəti) is­tiqamətində Rusiya silahlı birləşmələ­rinə qarşı uğurla əks-hücuma keçərək 400 metr irəliləməyə nail olublar.

Onun sözlərinə görə, Rusiya or­dusu cəbhədəki hərbi qruplaşmalarını məhbuslardan ibarət “Ştorm Z” hücum dəstələri ilə gücləndirib. 

Sırski, həmçinin 80-ci əlahiddə hava hücumu briqadası döyüşçülərinin İvanovski meşəsi yaxınlığındakı ərazi­nin bir hissəsini azad etdiyini söyləyib. Qeyd edilir ki, söhbət Baxmut istiqamə­tində meşəlik ərazidən gedir.

2022-ci il fevralın 24-də Rusiyanın Ukraynaya hücumu ilə başlayan mü­haribə Avropada İkinci Dünya mühari­bəsindən sonra ən böyük silahlı hərbi münaqişədir. Ukrayna Silahlı Qüvvələ­rinin Baş Qərargahının yaydığı son məlumatda deyilir ki, hərbi əməliyyatlar başlayandan indiyədək Rusiya ordusu­nun 210 min 350 hərbçisi məhv edilib. Rusiya mənbələri isə rəqəmlərin reallığı əks etdirmədiyini bildirir. 

Rusiya Müdafiə Nazirliyi xəbər verir ki, ukraynalı silahlılar dünən Belqorod vilayətinin Novaya Tavoljanka rayonuna daxil olmağa cəhd ediblər, lakin hava və artilleriya zərbələri nəticəsində bunun qarşısı alınıb, 10-dan çox silahlı zərə­sizləşdirilib.

“Qarşıdurma zamanı Ukraynanın 5 minaatan tağımı sıradan çıxarılıb, Rusi­ya ərazisinə hücum edən Polşa istehsa­lı olan iki “Krab” özüyeriyən silah qurğu­su məhv edilib. Rusiya Silahlı Qüvvələri son sutka ərzində Donetsk istiqamə­tində 425-ə qədər ukraynalı hərbçini məhv edib. Bundan başqa, Rusiya hava hücumundan müdafiə sistemləri Donetskdə Ukrayna Silahlı Qüvvələrinə məxsus Su-27 təyyarəsini vurub. RF Si­lahlı Qüvvələri Zaporojye istiqamətində düşmənə xeyli itki verib”, - Rusiya MN-in məlumatında qeyd olunub.

Bəli, Ukrayna torpağında on beş ay­dan çoxdur ki, qanlı müharibə gedir və bu, ağır zorakılıqlarla müşayiət olunan amansız qarşıdurmanın nə vaxt bitəcə­yi bəlli deyil. Bir çox dövlətlər müharibə­nin dayandırılması və sülh danışıqları­nın başladılması üçün cəhdlər edib. Bu dövlətlərdən biri də Çindir. 

Çinin bu təşəbbüsü ilə bağlı Ukray­nanın müdafiə naziri Oleksiy Reznikov “The Straits Times” qəzetinə müsahi­bəsində bildirib ki, Pekin Rusiyanı zəbt etdiyi bütün ərazilərdən geri çəkilməyə məcbur edə bilsə, Ukrayna müharibəni dayandırmaq üçün sülh təşəbbüsündə Çini vasitəçi kimi qəbul etməyə hazırdır.

Müdafiə nazirinin sözlərinə görə, Çin çox güman ki, Rusiya üzərində təsir im­kanlarına malikdir, lakin onun niyyətləri qeyri-müəyyən olaraq qalır. Xatırladaq ki, Çin müharibədə sülhməramlı kimi çıxış etmək niyyətində olduğunu açıqla­yıb və 12 bənddən ibarət “sülh planı”nı təqdim edib.

Bu arada məlum olub ki, italiyalı kar­dinal, İtaliya yepiskopları konfransının rəhbəri Matteo Cuppi Roma Papasının elçisi kimi Kiyevə gələcək. “Müqəddəs taxtın” mətbuat xidmətinin məlumatına görə, xüsusi elçi böhranın həlli yollarını müzakirə etmək üçün iyunun 5-6-da Uk­raynada olacaq. Bu barədə açıqlamada bildirilir ki, kardinalın səfərinin məqsədi ədalətli sülhün yolları barədə Ukrayna hakimiyyətini diqqətlə dinləmək və gər­ginliyin azalmasına kömək edəcək hu­manitar səyləri dəstəkləməkdir.

Rusiya mediasında yayılan məlu­mata görə, Papanın elçisinin Moskvaya da səfəri planlaşdırılır.

Məsaim ABDULLAYEV, “Xalq qəzeti”