İsrail şirkəti dünyanın ilk ekransız noutbukunu təqdim edib. Belə ki, “Spacetop” adlanan cihazın ekranını yalnız noutbukun sahibi görə bilir. Xəbəri “cnn.com” saytı verib.
Təl-Əvivdə yerləşən “Sightful” şirkətinin hazırladığı Android əsaslı “Spacetop”un ekranı yoxdur və istifadəçi xüsusi hazırlanmış eynəkləri taxdıqda ekran görünür. Cihazın alt hissəsi klassik noutbuklardan fərqlənmir. O, sensor panel, klaviatura, barmaq izi skaneri və portlarla təchiz edilmiş plastik korpusa malikdir.
“Spacetop”un iş prinsipi sadədir. İstifadəçi noutbuku yandırır və eynəkləri taxır. Bundan sonra gözlərinin qarşısında 100 düymlük virtual ekran görünür. Eynəklər kabel vasitəsilə daimi olaraq noutbuka qoşulur.
“Spacetop”-un ən böyük üstünlüyü istifadəçinin nə etdiyini ondan başqa heç kimin görə bilməməsidir.
Əfsanə ƏHƏDLİ, “Xalq qəzeti”
