Elm və Təhsil Nazirliyinin İqtisadiyyat İnstitutunda Azərbaycan Respublikası baş nazirinin müşaviri, Azərbaycan Respublikası Mərkəzi Bankının sabiq sədri, iqtisad elmləri doktoru Elman Rüstəmovla görüş keçirilib.
Tədbirdə institutun rəhbərliyi ilə yanaşı, əsasən gənc tədqiqatçılar və doktorantlar iştirak ediblər.
Tədbiri giriş sözü ilə İqtisadiyyat İnstitutunun baş direktoru, professor Nazim Müzəffərli açaraq qonağı təqdim edib.
Sonra Elman Rüstəmov “Keçid iqtisadiyyatı: nəzəri-emprik baxış bucağı” mövzusunda çıxış edib. Elm sahəsinə marağı və apardığı tədqiqatlar barədə məlumat verən E.Rüstəmov keçmiş SSRİ-nin dağılması səbəbləri, sosialist iqtisadiyyatının çatışmayan cəhətləri və onu geri salan iqtisadi səbəblər, 1990-cı illərdəki sosial-iqtisadi böhran, iqtisadiyyatdakı şöklar, keçid dövrünün başlıca xüsusiyyətləri, problemləri barədə danışıb. Bu məsələləri klassik iqtisadi nəzəriyyələr əsasında dəyərləndirib. İqtisadiyyatın dövlət tənzimlənməsi, dövlətin iqtisadiyyatdakı rolu və ölkədə makroiqtisadi sabitliyin təmin olumasına dair mülahizələrini bölüşüb. Keçid dövrünün sosial-iqtisadi problemlərini həll edən müstəqil Azərbaycanın uğurlu siyasi, hüquqi və iqtisadi islahatlar nəticəsində müasir inkişaf səviyyəsinə gəlib çıxdığını qeyd edib.
Sonra suallar cavablandırılıb. İqtisadi artıma təsir edən başlıca amillər, makroiqtisadi sabitlik, infilyasiya, milli valyutanın məzənnəsi, bank sektorunun dayanıqlığı, Mərkzi Bankın funksiyaları, maliyyə siyasəti və iqtisadi aktivlik, faiz, kredit və pul siyasəti, iqtisadiyyatın dövlət tənzimlənməsinin sərhədləri, liberallaşma və s. kimi məsələlər geniş müzakirə olunub.
XQ
