Polis əməkdaşlarının keçirdikləri əməliyyat tədbirləri ilə iyulun 26-da və 27-də ümumi çəkisi 15,5 kiloqramdan artıq narkotik vasitə və kultivasiya yolu ilə yetişdirilmiş 15 ədəd çətənə kolu aşkar olunaraq götürülüb. Bu barədə DİN-in mətbuat xidmətindən məlumat verilib. 

Lerik Rayon Polis Şöbəsinin əməkdaşları isə narkotik vasitələrin qanunsuz dövriyyəsi və satışına qarşı əməliyyat keçiriblər. DİN-in Mətbuat Xidmətinin Lənkəran regional qrupundan verilən məlumata görə, tədbirlərlə 26 yaşlı Məhəmməd Şıxəliyev və Natiq Xəlilov saxlanılıblar. Onlardan 20 kiloqram marixuana və 1990 ədəd narkotik tərkibli metadon həbi aşkarlanaraq götürülüb.

Davam etdirilən əməliyyat tədbirləri ilə avtomobili qoyaraq çətin relyefli ərazidə gizli yolla qaçmağa çalışan narkoşəbəkənin digər üzvləri - 24 yaşlı Vurğun Qasımlı, 30 yaşlı Rəşid Ağazadə, 31 yaşlı Emin Əhmədov polis əməkdaşları tərəfindən saxlanılıblar.

Keçirilən baxış zamanı həmin şəxslərin ərazidə qoyaraq uzaqlaşdığı avtomobildən də marixuana aşkarlanaraq götürülüb. Araşdırmalarla narkoşəbəkə üzvlərinin İran vətəndaşından əldə etdikləri narkotik vasitə və həblərin satışının təşkil olunmasından ötrü maddi qazanc qarşılığında paytaxt ərazisinə gətirməyə razılaşdıqları müəyyən edilib.

Faktla bağlı cinayət işi başlanılıb, M.Şıxəliyev, N.Xəlilov, V.Qasımlı, R.Ağazadə və E.Əhmədov barəsində məhkəmənin qərarı ilə həbs qətimkan tədbiri seçilib.

Bu istiqamətdə qətiyyətli mübarizə tədbirləri davam etdirilir.

P.ƏMİRCANOV
XQ