Türkiyədə fəaliyyət göstərən Azərbaycan Elm Adamları Dərnəyinin rəhbəri, Bilkent Universitetinin professoru Əmirulla Məmmədov 28 may Müstəqillik günündə görkəmli siyasi və dövlət xadimi, Azərbaycan Xalq Cümhuriyyətinin qurucularından olan Məhəmməd Əmin Rəsulzadənin qəbrini ziyarət edib. Onun paylaşdığı məlimatda deyilir:
- Hər il olduğu kimi 28 may Müstəqillik günündə ümmətdən millət, əyalətlərdən dövlət yaradan, müstəqil Azərbaycanın qurucularından olan mərhum Məmməd Əminin Ankara Cəbəci Əsri qəbiristanlığında məzarı başında idim. Azərbaycanın bütün qurucularını yad etdim, nur içində uyusunlar. Fatihəmi oxudum, məzarı üzərinə güllər düzdüm. Unudulmursan, unudulmazsan. Ey böyük insan, biz azərbaycanlılarin gələcək tarixində həmişə var olacaqsan.
Qeyd edək ki, 1918-ci il mayın 28-də Azərbaycan Xalq Cümhuriyyətinin yaradılması Azərbaycan xalqının həyatına əlamətdar hadisə kimi əbədi daxil olmuşdur. Azərbaycan xalqı 1991-ci ildə öz dövlət müstəqilliyini bərpa etdikdən sonra AXC-nin ideallarını davam etdirərək bu tarixi varislik üzərində yeni müstəqil Azərbaycan dövlətini yaratmışdır. Dövlət müstəqilliyinin bərpasından sonra bu tarix dövlət bayramı - Respublika Günü kimi təntənə ilə qeyd edilib, 15 oktyabr 2021-ci ildən isə adı dəyişdirilərək Müstəqillik Günü olmuşdur. AXC Azərbaycan Milli Şurasının ilk sədri Məhəmməd Əmin Rəsulzadə olmuşdur. Ömrünün sonunadək Azərbaycanın müstəqilliyinin bərpa olunması uğrunda istiqlal mübarizəsini davam etdirən Rəsulzadə 1955-ci il mart ayının 6-da Ankarada vəfat etmiş və şəhərin Əsri qəbristanında dəfn olunmuşdur.
XQ
