Bu gün ölkənin aparıcı mətbu nəşrlərindən olan “Xalq qəzeti”nin 105 yaşı tamam olur. Bu tarixin 72 ilini “Kommunist” adı ilə çıxmış rəsmi-ideoloji qəzet uzun illər ölkə həyatının, xüsusən milli mədəniyyətin də güzgüsü olub.
Bir əsrdən uzun müddətdə ümummilli söz tribunası rolu oynayan bu qəzetin 105 yaşının tamam olması təkcə bir redaksiya kollektivinin, milli mətbuatımızın deyil, bütövlükdə, xalqımızın həyatında, ictimai fikir və mədəni tərəqqi tariximizdə əlamətdar hadisədir. Sovet dövrünün yeganə gündəlik anadilli nəşri dövlət müstəqilliyimizin astanasında xalqa xidmət məramını üstün mövqeyə qaldıraraq, sonrakı 33 ildə fəaliyyətini “Xalq qəzeti” adı altında uğurla davam etdirməkdədir.
Ötən əsrin sonlarında xalq hərəkatı baş qaldıranda qəzet “Topxana harayı” yazısı və “Meydan epopeyası” günlərində sərgilədiyi cəsarətli mövqeyi ilə xalqın tərəfində dayandığını göstərdi. Həmin dövrdən “Kommunist” qəzeti sürətlə “Xalq qəzeti”nə çevrilməyə başladı. İndiki ümumxalq sevgisi və ümumdövlət etimadı “Xalq qəzeti”nin qazandığı ən böyük dəyər və fəaliyyətinə verilən ən böyük qiymətdir.
Bütun bu qeyd edilənlər bir daha sübut edir ki, “Xalq qəzeti” xalqımızın taleyində və yaddaşında dərin, silinməz izlər qoymuş, zamanın sınağından üzüağ çıxmış milli mətbuat vasitəsi, ötən 105 ilin sistemli söz saxlancıdır. Bu dərin və sağlam əsaslar qəzeti növbəti əsrin onilliklərinə inamla aparacaq. “Xalq qəzeti” bu gün Azərbaycan şəraitində öz funksiyasını yerinə yetirən ən yaxşı və informativ qəzetlərdən biridir.
Yubiley münasibətilə redaktor Əflatun Amaşov başda olmaqla qəzetin kollektivini təbrik edir, oradakı vicdanlı qələm sahiblərinə uğurlar arzulayıram!
Qulu MƏHƏRRƏMLİ,
BDU-nun professoru
