Batabat Astrofizika Rəsədxanasında “Azərbaycanda ətraf mühitin qorunmasında ümummilli lider Heydər Əliyevin rolu” mövzusunda konfrans təşkil edilib.
Naxçıvan Muxtar Respublikasında Azərbaycan Respublikası Prezidentinin Səlahiyyətli Nümayəndəliyinin, Naxçıvan Dövlət Universitetinin, Muxtar Respublika Ekologiya və Təbii Sərvətlər Nazirliyinin və Həmkarlar İttifaqları Şurasının təşkilatçılığı ilə keçirilən ekoloji məclis Ümummilli liderin anadan olmasının 101-ci ildönümünə, Naxçıvan Muxtar Respublikasının yaranmasının 100 illiyinə, “Yaşıl dünya naminə həmrəylik ili”nə və COP29-a həsr olunub.
Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli konfransın işinə uğur arzulayaraq bildirib ki, ulu öndər Heydər Əliyev ölkəmizə hər iki rəhbərliyi dövründə ekoloji tarazlığın qorunması istiqamətində kompleks tədbirlər həyata keçirib, ətraf mühitin mühafizəsi sahəsində əsaslı dönüş yaradılıb. Ölkəmizdə bu sahədə fəaliyyəti tənzimləyən dövlət qurumları yaradılıb, eyni zamanda təkmil qanunvericilik bazası formalaşdırılıb.
Səlahiyyətli nümayəndə vurğulayıb ki, Prezident İlham Əliyevin siyasi iradəsi və beynəlxalq nüfuzu sayəsində Azərbaycan COP29 çərçivəsində iqlim dəyişikliyi ilə mübarizə işinə mühüm töhfələr verəcək. Bu gün Azərbaycan Prezidenti tərəfindən görülən işlər və ölkəmizdəki mövcud qanunvericilik sistemi ətraf mühitin mühafizəsi sahəsində sistemli tədbirlərin icrasına imkan verir.
Naxçıvan Dövlət Universitetinin rektoru Elbrus İsayev, Naxçıvan Muxtar Respublikası ekologiya və təbii sərvətlər nazirinin müavini Xanlar Mustafayev, Muxtar Respublika Həmkarlar İttifaqları Şurasının sədri Qəzənfər Abdullayev, AMEA-nın müxbir üzvü, Torpaqşünaslıq və Aqrokimya İnstitutunun baş direktoru Əlövsət Quliyev, biologiya üzrə fəlsəfə doktoru Elsevər Əsədov, AMEA-nın həqiqi üzvü Tariyel Talıbov digər çıxış edənlər mövzu ilə bağlı aktual məsələləri gündəmə gətiriblər.
Konfrans bədii hissə ilə davam edib. Batabat ərazisində təmizlik aksiyası da keçirilib.
Səbuhi HƏSƏNOV,
XQ-nin bölgə müxbiri