Ötən əsrin 70-ci illəri idi. 9 May Qələbə Günü ərəfəsində televiziyada “Uzaq sahillərdə” filmi göstərilirdi. Xatırladım ki, rəhmətlik atam həmin filmə daha böyük həvəslə baxırdı. Atam Mazelli rolunu oynayan aktyoru bir daha görəndə fikrini qətiləşdirdi: “Bu artist nemesdir! Onu haradan tapıblar?” ( 1941-45-ci illər müharibəsinin veteranı və əlili olan atam alman sözünü qətiyyən işlətmirdi). Dedim yox, titrlərə diqqətlə baxmışam, həmin aktyorun adı Andreydir. Andreydirsə, deməli rusdur.
Sonralar mən İncəsənət İnstitunda oxumalı oldum. Qrup yoldaşlarımızdan birinin – rəhmətlik Nemət Rzayevin Kinostudiyada işlədiyini biləndə ( Nemət orada filmlərin sınaq çəkilişi zamanı aktyorların rolu necə oynayacağını foto lentlərə köçürürdü) Mazelli rolunu oynayan aktyor barədə soruşdum. Birmənalı olaraq dedi ki, rus deyil, xaricidir. Daha təfsilata varmadıq və mövzu unudulub getdi.
***
Bir neçə gün əvvəl – mayın 9-da telekanallarımızdan biri həmin filmi yenə də göstərirdi. Mazellinin böyük ustalıqla nümayiş etdirdiyi jest, mizan və hərəkətlərini görəndə atamın, təxminən, 50 il əvvəlki sözü yadıma düşdü və xoşbəxtlikdən, bu dəfə əlimin altında kompüter var idi. Ona görə də, dərhal “Mazellinin axtarışı”na çıxdım.
Məlum oldu ki, Andrey Fayt adlı bu aktyor 1903-cü ildə Rusiyanın Nijni Novqorod şəhərində doğulsa da, milliyətcə almandır. O, 1812-ci ildə Rusiyaya köçmüş alman tacir ailəsinin üzvü olan həkim Andrey Faytın nəvəsidir. Rusiyada inqilabi vəziyyət yarananda – 1905-ci ildə onun atası öz pasiyentlərinin köməyi ilə Fransaya qaçıb. Sonra arvadı və iki oğlu da onun yanına gediblər. Paris yaxınlığındakı ruslar üçün olan düşərgədə yaşayıblar. Balaca Andrey orada liseydə oxuyub. Sonra Sergey Gerasimov adına Ümumrusiya Dövlət Kinematoqrafiya İnstitutunu bitirib. Yəni, atamın dediyi “nemes”lik onun qanında var imiş.
***
Qərəz, mən “Mazellinin axtarışına” “Uzaq sahillərdə” filmi haqqında olan məlumatlarla başladım. Həmin film haqqında formalaşdırılmış yazılı materialların “İstinadlar” bölməsində göstərilirdi ki, İttifaq Mirzəbəylinin 2015-ci ildə hazırlayıb “Xalq qəzeti”ndə verdiyi “Uzaq sahillərdə”ni başlayanda mənim 25, müəllimimin isə 37 yaşı vardı” adlı məqaləsindən də istifadə edilmişdir.
Yadıma düşdü. Söhbət ondan gedirdi ki, mən böyük bəstəkarımız Qara Qarayevlə (Qara müəllim “Uzaq sahillərdə” filminin bəstəkarı idi) onun tələbəsi olmuş Tofiq Bakıxanovun (Tofiq müəllim isə “Uzaq sahillərdə” simfonik poemasının müəllifidir) bir fotosunun tarixçəsini öyrənmək istəyəndə Tofiq müəllim maraqlı bir xatirə danışmışdı. Mən də həmin xatirəni qəzet yazısına çevirmişdim.
Məlum olmuşdu ki, həmin foto Tofiq müəllimin öz ustadı, 60 il qabaq (xatirə 2015-ci ildə qələmə alınmışdır) Azərbaycan Dövlət Konservatoriyasında bəstəkarlıq fənni üzrə müəllimi olmuş dünyaca məşhur Qara Qarayevdən bir əsər barədə xeyir-dua aldığı gün çəkilmişdir.
Bəstəkar demişdi: Tanrı insanı elə yaradıb ki, hamı yaşa dolduqca xatirələrə daha çox meyilli olur. Həyatı boyu çoxsaylı görkəmli və dahi sənətkarlarla ünsiyyətdə olmuş adamın xatirə boğçası isə çözələndikcə qurtarmır. Bu baxımdan mənim bəxtim çox gətirib. Ən dəruni xatirələrim isə dahi bəstəkarımız Qara Qarayevlə bağlıdır. Ulu öndər Heydər Əliyevin Azərbaycana birinci dəfə rəhbərlik etdiyi dövrdə SSRİ-nin ən nüfuzlu mükafatlarından olan Sosialist Əməyi Qəhrəmanı adına layiq görülmüş sənət adamlarının önündə məhz mənim müəllimim, Milli Elmlər Akademiyamızın akademiki, müharibədən sonrakı dövr Azərbaycan mədəniyyətinin ən görkəmli nümayəndələrindən biri — bəstəkar Qara Qarayev dayanırdı. Qara müəllim cismən aramızda olduğu illərdə də, çoxmilyonlu sənət xiridarlarının xatirəsində və qəlbində yaşadığı son 33 ildə də daim sevilib və ehtiramla qəbul edilib. Yeri gəlmişkən, cənab Prezident İlham Əliyev də ulu öndərimizin yaradıcı ziyalılara göstərdiyi qayğı və diqqət ənənəsini sədaqətlə davam etdirir və biz yaradıcı insanlar daim onun diqqətindəyik.
Bu fotoşəkil isə 1955-ci ildə, mərhum müəllimimdən xeyir-dua aldığım günlərdən birində, bilavasitə onun indiki Şeyx Şamil (o zamankı Buynakski) küçəsindəki evində çəkilib. Onda Qara müəllimin 37, mənim isə 25 yaşım vardı. Onu da deyim ki, Üzeyir bəy Hacıbəylinin vəfatından sonra 30 yaşlı Qara Qarayev Azərbaycan Dövlət Konservatoriyasına rektor təyin olunmuşdu. O, eyni zamanda, konservatoriyada bəstəkarlıq kafedrasının müdiri, Bəstəkarlar İttifaqının birinci katibi, SSRİ Ali Sovetinin deputatı, Azərbaycan Kommunist Partiyası Mərkəzi Komitəsinin üzvü kimi məsul vəzifələr daşıyırdı. Üstəlik, gərgin yaradıcılıqla da məşğul olurdu. Onun ən böyük vəzifəsi isə sadə Azərbaycan ziyalısı olması idi. Mən ömrümdə onun qədər sadə və səmimi insan görməmişəm.
Bu qədər məsul vəzifələri olan Qara müəllimin dərsi heç zaman boş keçməzdi. Mən onun bəstəkarlıq kursunda oxuyurdum. Əgər hansısa rəsmi tədbir — qurultay, plenum və ya sessiya səbəbindən dərsə gələ bilməsəydi, xəbər göndərirdi ki, həmin dərs axşam bizim evdə olacaq. Biz yığışıb onun evinə gedirdik və heç bir dərsimizin boş keçməsinə imkan vermirdi. Həmin evdə dərs keçdiyimiz günlərdən birində məndən soruşdu ki, yay tətili zamanı hansı əsər üzərində işləmək isəyirsən? O, bütün tələbələrin gündəlik və perspektiv yaradıcılığı ilə daim maraqlanırdı. Soruşdu və mən də bir neçə ay ürəyimdə götür-qoy etdiyim məsələ barədə danışdım.
O zaman bilirdim ki, Qara müəllim əfsanəvi qəhrəmanımız Mehdi Hüseynzadənin döyüş yolundan bəhs edən “Uzaq sahillərdə” filminin musiqisini yazır. Film 1958-ci ildə ekranlara çıxmalı idi və çıxdı da. Mən Qara müəllimə danışdım ki, Mehdi Hüseynzadə bizim qonşuluqda yaşayırdı. Onun bacısı mənim atam Əhməd Bakıxanovun tar sinfinin tələbəsi idi. Yəni, Mehdinin surəti də, ölüm xəbərindən sonra onun ailəsinin keçirdiyi üzüntülər də mənim gözümün qabağındadır. Ona görə də ustada dedim ki, aylarla haqqında düşündüyüm “Uzaq sahillərdə” simfonik poemasını işləyib başa çatdırmaq istəyirəm. Gülümsündü və səmimiyyətlə xeyir-dua verdi. Bəlkə də onun əvəzinə başqa bir bəstəkar olsaydı, deyərdi ki, o barədə artıq mən yazmışam. Qara müəllim isə həmin filmin musiqisini yazdığını qətiyyən yada salmadı və mən öz müəllimi ilə eyni dövrdə, eyni mövzuda əsər yazmış tələbə bəstəkar kimi tarixə düşdüm.
İttifaq MİRZƏBƏYLİ