Hüquq və İnsan Haqları İnstitutu müxtəlif dövlət qurumlarının (orqanlarının) əməkdaşları üçün mütəmadi olaraq insan hüquq və azadlıqlarının müdafiəsi mövzularında silsilə təlimlər keçirir. Bu istiqamətdə keçirilən təlimlərin davamı olaraq İnstitutun təlimçi-ekspertləri aprelin 23-də Pirallahı Rayon İcra Hakimiyyətinin 25 nəfər əməkdaşı üçün təlim keçiblər.
Təlimdə Pirallahı Rayon İcra Hakimiyyəti başçısının birinci müavini Vəzir Səfixanov açılış nitqi ilə çıxış edərək bildirib ki, Hüquq və İnsan Haqları İnstitutunun təşəbbüsü ilə keçirilən bu təlimlər yerli icra hakimiyyəti əməkdaşlarının işində peşəkarlığı artırmaqla yanaşı, həm də icra hakimiyyətlərinin müasir tələblərə cavab verən orqanlar kimi formalaşmalarına və dövlət idarəetməsində daha yaxşı göstəricilər əldə etmələrinə kömək edə bilər.
Daha sonra İdarə Heyəti sədrinin müavini Vəfaddin İbayev çıxış edərək təlim iştirakçılarına institutun fəaliyyəti haqqında ümumi məlumat verib və gələcək perspektivlərdən söz açıb. Sədr müavini institutun insan hüquqları sahəsində apardığı maarifləndirici təlimlərin sayının günü-gündən artdığını da xüsusilə vurğulayıb.
Təlimdə institutun İnsan hüquqları üzrə təlim və ekspertiza şöbəsinin müdiri Vüsalə Muradxanlı, eyni zamanda həmin şöbənin təlimçiləri Heydər Həsən oğlu Əliyev və Ülvi Abbasov təqdimatlarla çıxış ediblər.
Təlim “Vətəndaşların müraciətlərinə baxılması”, “Korrupsiya, rüşvət və etik davranış” və “Sosial mediada məsuliyyət” mövzularını əhatə edib.
Sonda təlim mövzuları ətrafında geniş müzakirələr aparılıb və təlimin qiymətləndirilməsi keçirilib. Həmçinin təlim iştirakçılarına sertifikatlar təqdim olunub.
Qabil YUSİFOĞLU
XQ
