“Yaşıl dünya naminə həmrəylik İli” çərçivəsində Mərkəzi Aran Regional Mədəniyyət İdarəsi Mingəçevir nümayəndəliyinin təşəbbüsü ilə ağacəkmə aksiyası keçirilib.
Məlum olduğu kimi, Azərbaycanın 2030-cu ilə qədər sosial-iqtisadi inkişafa dair beş milli prioritetindən biri “Təmiz ətraf mühit və yaşıl artım ölkəsi” kimi müəyyən edilib. Mingəçevir şəhərində həmin prioritetə uyğun olaraq mühüm addımlar atılır. Mərkəzi Aran Regional Mədəniyyət İdarəsinin xətti ilə vaxtaşırı keçirilən müvafiq aksiyalarla da yaşıllıqların artırılması, ekologiyanın sağlamlaşdırılmasına töhfələr verilir.
Növbəti aksiyada Mingəçevir şəhərinin Bayraq Meydanı ilə Şərq giriş qapısı istiqamətində yerləşən Park Xiyabandakı yaşıllıq zolağında qabaqcadan şəhər yaşıllaşdırma və sanitar təmizlik idarəsinin işçilərinin hazırladığı çalalara ağaclar əkilib. Tədbirdə Heydər Əliyev Mərkəzinin, mədəniyyət və musiqi ocaqlarının kollektivləri iştirak ediblər.
Aksiya çərçivəsində 210 ədəd şam ağacı tingləri əkilib. Tədbirlər planına uyğun olaraq, ağacəkmə aksiyaları ardıcıl olaraq şəhərin digər yaşıllıq zolaqlarında, parklarda, istirahət məskənlərində də keçiriləcək.
İlqar HƏSƏNOV,
XQ-nin bölgə müxbiri
