Özünüməşğulluq proqramı çərçivə­sində İmişli rayon sakinləri Cavadzadə Toğrul Sahib oğlu və Qarayev İlham Rə­şad oğlu üçün qurulmuş kiçik təsərrüfat­lara baş çəkən əmək və əhalinin sosial müdafiəsi naziri Sahil Babayev və rayon icra hakimiyyətinin başçısı Elçin Rzayev müəssisələrin işindən məmnun qalıblar.

T.Cavadzadə poliqrafiya, İ.Qarayev isə avtomobil şinlərinin bərpası və təmiri xidməti üzrə aktivlərlə təmin olunaraq kiçik təsərrüfatlarını yaradıblar. Onlar işsiz şəxslərin kiçik bizneslərini qurma­ları üçün göstərilən dəstəyə görə dövlət başçısına minnətdarlıqlarını ifadə edib­lər. Verilən aktivlərdən düzgün istifadə edərək kiçik bizneslərini inkişaf etdir­məyə çalışdıqlarını bildiriblər. 

Qeyd edək ki, ötən il ölkəmizdə daha 17 min 400, o cümlədən İmişli rayonunda 245 nəfər işsiz və işaxtaran şəxs özünüməşğulluq proqramına cəlb olunaraq kiçik təsərrüfatlarını qurmaları üçün mal və materiallar formasında ak­tivlərlə təmin ediliblər.

Nazir İmişlidə Beyləqan sakinləri­ni də qəbul edib. Görüşdə vətəndaşlar məşğulluq, mənzil və avtomobil təmi­natı, əlillik, ünvanlı sosial yardım və s. məsələlərlə bağlı müraciət ediblər. On­ların arasında şəhid ailələrinin üzvləri və müharibə iştirakçıları da olub. Hər bir müraciət fərdi qaydada araşdırılıb və nəticəsinə uyğun tədbirlər görülüb. Sorğu xarakterli müraciətlərlə bağlı qanunvericiliyə uyğun izahatlar verilib. Vətəndaşlar müraciətləri əsasında aktiv məşğulluq proqramlarına, habelə özü­nüməşğulluq proqramına cəlb edilmələ­ri üçün qeydiyyata alınıblar.

Zərifə HÜSEYNOVA
XQ