Rafael HÜSEYNOV,
Milli Məclisin deputatı
Bu gün – 2024-cü il fevralın 7-si xalqın öz əziz övladına – Prezident İlham Əliyevə məhəbbətinin təntənəsi günüdür.
Azərbaycanda bugünəcən keçirilmiş seçkilərin heç birinə bənzəməyən sevgi seçkisi!
İnsanlar Azərbaycan boyu seşki məntəqələrində növbələrə düzülmüşdülər (yalnız Azərbaycandamı? Müxtəlif xarici ölkələrdəki vətəndaşlarımızın seçki gününün axşamı və gecəsindəki etiraf paylaşımlarını oxuduqca qürur hissi keçirməyə bilmirsən. Özləri yazırlar ki, onlardan hansı birisə qarlı-şaxtalı gündə piyada, hansılarısa ailəlikcə ucqar şəhərdən Azərbaycanın o ölkədəki diplomatik nümayəndəliyində təşkil edilmiş səsvermə məntəqəsinə yüz kilometrləri aşaraq vicdan borcunu yerinə yetirməyə tələsən kimi həvəslə yollanıb).
Belə fəallıq, belə coşqu heç vaxt olmamışdı.
Səbəb sadədir – İlham Əliyevin bu xalq və bu yurd üçün bugünəcən etdikləri!
Fevralın 7-si seçkisi həm də dərsdir.
Sən xalqınçün böyük olan, bu xalqın tarixində qalacaq işlər görürsənsə, əməyin qiymətsiz qalmır, xalq xidmətlərinin əvəzində sənə bitib-tükənməyən məhəbbətini bağışlayır.
Amma bu gün həm də torpağımızın bayramıdır, həm də Qarabağımızın bayramıdır. Çünki xalqın Prezident İlham Əliyevə belə sonsuz məhəbbəti və inamının çox səbəbləri sırasında ilk yerdə dayanan söz yox ki, onun əsas müəllifi olduğu Qarabağ zəfəridir.
Prezident İlham Əliyevə bu gün nümayiş etdirilən el məhəbbəti və sayğısı həm də xalqımızın bu yurdun hər qarış torpağına tükənməz eşqinin ifadəsidir – millət öz qüdrətli oğluna Qarabağ rəşadətinə görə, torpaqlarımızı əsarətdən qurtardığı üçün, bu ölçüyəgəlməz sevinc və iftixar müqabilində öz sevgisini qatdığı səsiylə minnətdarlığını ifadə etdi.
Hər belə səsin dəyəri bir millət rəhbərindən ötrü sərvətlərin alisidir.
Azərbaycan vətəndaşlarını müxtəlif hünərlərinə və nailiyyətlərinə görə mükafatlandıran, orden-medallarla təltif edən Prezident İlham Əliyevə bu gün ordeni xalq verdi.
Birini yox, milyonlarlasını!
Bu cür köksəsığmaz məhəbbət qarışmış hər səsdən daha üstün olan orden varmı?!
Dərəcələrinə, mahiyyətinə görə orden-medalların sinədə asılma sırası və ardıcıllığı var.
Xalqın öz istəkli balasını təltif etdiyi bu MİLLƏT SEVGİSİ ORDENindən daha ucada dayana biləcək bir təltif ola bilərmi?!
Xalqın 7 fevral sevgisini Prezident İlham Əliyev gördü – təbii ki, bəxtiyardır.
Amma bunu həm də vəzifəsi dövlətə və xalqa qulluq etməkdən ibarət hər kəs də gördü.
Hamısı ibrət götürsün!
Zəkanla, qabiliyyətinlə, səriştənlə, peşəkarlığınla, fədakarlığınla belə ola bilirsənsə, yolunu davam et, əməllərinin qarşılığında xalqdan bu cür məhəbbət və ehtiram qazanmağa gücün yoxsa, Rəhbərinə tən gəlmədiyini duyursansa, yer tutma, mane olma!
Bu tarixi gündə həm də unudulmaz Heydər Əliyevi düşünürəm.
Ömrünün bitəcəyində millətinə üz tutaraq insanlarımızı İlham Əliyevə dəstək verməyə, ona arxa durmağa çağırırdı: “Mən ona özüm qədər inanıram” deyirdi.
Bu gün xalq da elə həmin sözü dedi!
Və əlbəttə ki, bu gün Ulu Öndərin də ruhu şaddır!
Bu seçkinin qalibi xalqdır.
MÜZƏFFƏR oğlunu QALİB çıxaran QALİB XALQ!
