Gədəbəy ilin bütün fəsillərində gözəldir. Qış isə bir başqa aləmdir. Elə ki, dağlar, dərələr, meşələr ağ örpəyə büründü, Gədəbəy toya hazırlaşan gəlinə bənzəyir. Əyninə geyinmiş ağ libas ona xüsusi gözəllik verir.
Vaxt var idi belə qarlı-buzlu havada bir kənddən başqa bir kəndə gedəndə problemlər ortaya çıxırdı. Yollar pis vəziyyətdə, körpülər yox, adamlar odun sobası yandırır, bəzən günlərlə işıq üzünə həsrət qalırdılar... Amma son 20 ildə Gədəbəy o qədər gözəlləşdi, abadlaşdırıldı, yeni yollar salındı ki, istəyir qar lap dizinə çıxsın, o kəndlərə həvəslə gedəcəksən. Çünki şərait yaradılıb və Gədəbəy əvvəlki Gədəbəy deyil.
Bu sətirləri qeyd etməyimiz də təsadüfi deyil. Rayon mərkəzində 104 saylı Gədəbəy Dairə Seçki Komissiyasının sədri Xaliq Xudaverdiyevlə görüşdükdən sonra öyrəndik ki, fevralın 7-də keçiriləcək Prezident seçkilərində Gədəbəy rayonunda 47 min 796 seçici iştirak edəcək və onlardan 5 nəfərinin yaşı yüzü keçib. Maraqlıdır ki, 5-i də qadındır. Təbii ki, elə həmin an bu uzunömürlü, bir əsri yola salmış ağbirçəklərin yanına tələsdik və qeyd etdiyimiz kimi hərəsinin müxtəlif kəndlərdə, ünvanlarda olması, çoxlu qar yağması bizi qətiyyən narahat etmədi. Çünki nə yollar əvvəlkidir, nə də kəndlər...
Yolumuz Çalburunadır. Kənd rayon mərkəzindən 16 kilometr aralıda yerləşir. Hər tərəf ağ örpəyə bürünsə də yol açıqdır. Özü də yol nə yol! Asfalt, geniş, rahat. Bir neçə il qabaq çəkilib. Bax, həmin kənddə, 1920-ci ildə anadan olmuş bir seçicimiz var, Səmayə Həsənova, onun yanına gedirik. Haqqında o qədər məlumat toplamşam ki, heç görüşünə getməsək də yaza bilərdik. Amma yox, 104 yaşlı bir qadınla görüşüb söhbət etmək, hal-əhval tutmaq həm savabdır, həm də çox maraqlıdır. Bizə yol bələdçiliyi edən kənd icra nümayəndəsi Həsən Həsənli ilə kəndin lap girəcəyində maşından düşüb Çalburunu seyr edirik. Bir gecədə qar o qədər yağıb ki, kimin evi harada yerləşir, uzaqdan bir baxışla ayırd etmək də çətindir.
Nəhayət, Səmayə nənə ilə görüşüb söhbət etmək bizə qismət olur. Oğlu Vüqarın “ana, qonaqların gəlib” deməyi ilə içəri daxil olub bizə “xoş gəldiniz” deməyi bir olur. Çox sərbəst şəkildə keçib masa arxasında əyləşir.Oğlu Vüqar deyir ki, anam uşaqların adlarını əzbər bilir, hamısını tez-tez görə bilməsə də vəziyyətləri ilə maraqlanır, bizdən soruşur. Məsələn, nəvəsinin biri 44 günlük Vətən Müharibəsi qazisidir. Elmirlə fəxr edir, onu tez-tez oxşayır, nəvaziş göstərir...
Nəvələrdən söz düşmüşkən, Elmirlə birlikdə Səmayə nənənin 30 nəvəsi var. Nəticələrinin sayı 55-ə çatıb. Hətta 2 nəticəsi də dünyaya gəlib. 10 övladı olan Səmayə Həsənovanın 4 oğlu və 2 qızı dünyasını dəyişib. O barədə söz düşəndə gözləri dolur, danışmaq istəmir, “kaş onların yerinə...” deyən kimi, Vüqar “ana başlama, 6 ildən sonra sənin 110 illiyini qeyd edəcəyik, sonrasına baxarıq” deyə Səmayə nənənin danışmasına imkan vermir.
Kənd icra nümayəndəsi H.Həsənli də söhbətə müdaxilə edib mövzunu dəyişmək istəyir:
– Nənə, indiyədək neçə seçkidə iştirak etmisən? – deyə soruşur.
Nənə duruxur, barmaqlarını bir-bir qatlayır və əlləri yumruğa çevriləndə “nə bilim ay bala, sayı yox, hesabı yox” deyir.
– Çalışacağam bu seçkiyə də özüm, öz ayağımla gedim. O səs verilən yeri tanıyıram, bizdən 4-5 yüz metr aralıda, məktəbdə yerləşir. İlham Əliyevi çox istəyirəm. O gələndən biz qaz, işıq gördük, əsl yol, körpü nə olduğunu bildik. Mənim ayrı namizədim yoxdur, bunu uşaqlarım da bilir...
104 yaşlı bir qadın o qədər sərbəst, məntiqlə, maraqla danışır ki, ayrılmaq olmur və deyə də bilmirik ki, “bizi digər həmyaşıdların da gözləyir”.
104 yaşlı Güllüzar Hüseynovanın sorağı ilə Düzyurd kəndinə gəlib çıxırıq. Qızı Məryəmin yanında yaşayır. Düzü Məryəm xanımın özü yaşlı olsa da anasına bu cür qulluq göstərməsi, necə deyərlər, hər nazı ilə oynaması, körpə uşaq kimi əzizləməsi bizi heyran edir.
– Bax, ana, bu corabları almışam ki, ayağına geyinəsən, daha bir kənara atmaq üçün yox, deyə üstündə çoxlu ürək şəkilləri olan qaralı-qırmızılı yun corabı onun ayaqlarına dartır.
Gədəbəy Şəhər İƏD nümayəndəsinin müavini Kəmaləddin Məmmədov yavaşca qulağıma deyir ki, iki-üç il əvvəl görüşmüşdüm, onda daha qıvraq idi. Görünür yaş öz işini görür. Öyrənirik ki, Güllüzar nənənin 5 nəvəsi, 6 nəticəsi var. O da öz seçimini dilə gətirir, “Kəmaləddin məni yaxşı tanıyır, bu yaşa çatmışam, dilimə yalan dəyməyib. Yalan danışan adam da gözümün düşmənidir. On-on beş il qabaq dediilər ki, deputat seçkiləridir, gəl səs ver. Dedim kənddə, eldə, obada o adam bir iş görüb? Susdular. Mən elə adamlara heç vaxt səs vermərəm. Bax, Prezidentimə qurban olum, kişi kimi söz verdi, kişi kimi sözünün üstündə durub Qarabağımızı o mundarlardan təmizləyib bizə qaytardı. Gədəbəyin özündə nə qədər işlər görüb. Yollar çəkib, körpülər salıb, qazımız, işığımız daim var. Bunları eləməsəydi, indi bir metr meşəmiz də qalmamışdı, hamısını qırıb yandıracaqdılar.
Kiçik Qaramurad kəndinin sakini, hazırda qonşu Dəyirmandağ kəndində qızı Cəmilənin yanında yaşayan 104 yaşlı Bəsti Quliyeva ilə də söhbət edə bilirik. Kənd icra nümayəndəsi Xıdır Məmmədov əvvəlcədən bizi xəbərdar edir ki, 22 nəvəsindən biri, Mehtab Quliyev 44 günlük Vətən müharbəsində şəhid olub. Daim deyib- gülən, zarafat edən, şən, nikbin olan nənənin elə o vaxtdan çöhrəsinə sanki qara buludlar çöküb, az danışır, kefi açılmır. Amma nəvəsi ilə fəxr edir, deyir oğlum qəhrəmandır, erməniyə düz çökdürüb.
– Yaxşı yeriyə bilsəydim Mehrabın Zəngilanda həlak olduğu o yüksəkliyə qalxardım, həmin yerin torpağını öpərdim, deyə nənə yaylığını çıxarır,- o qədər ağlamışam, daha gözlərimin yaşı da quruyub. Amma nə qədər ağlasam da, bir o qədər qürurluyam. İlham Əliyev bizim torpaqları qaytardı, ona qurban olum. Deyirəm nə yaxşı ki, Allah mənə imkan verdi bu günləri gördüm, qələbə sevincini mən də yaşaya bildim. Bundan sonra ölsəm də dərdim yoxdur…
Bəsti nənə bunları deyərkən birdən sanki dodağı qaçdı, azacıq gülümsəyərək “hara ölürəm, hələ gedib İlham balama səs də vermək istəyirəm” dedi. Qeyd edək ki, Bəsti Quliyevanın 40 nəticəsi, 7 kötücəsi də var. Özü də hələ 10 övladından 5-i uşaq ikən vəfat edib. Təsəvvür edirsinizmi, indi onlar da sağ olsaydı, Bəsti nənənin nəvə və nəticələrinin sayı bəlkə də iki dəfə bundan çox olardı...
…Daha bir 100 yaşlı seçici haqqında məlumat verim sizə. Səryaz Hüseynova. “Qumlu” deyilən yaşayış massivində yaşayır. 1924-cü ildə anadan olub. K.Məmmədov bildirdi ki, Səryaz nənənin 8 övladı olub. Hazırda 22 nəvəsi, 30 nəticəsi var. S. Hüseynova ilə görüşüb söhbət edə bilməsək də ona qulluq edənlər bizim xahişimizlə şəklini çəkib göndərdilər. Nə olar, buna da çox sevindik. Təki sağ-salamat olsun. Onlar bizim əsri adlayan sərvətlərimizdir, gərək nəyin bahasına olursa olsun, qoruyaq, ömürlərini bir qədər də uzadaq.
S.Hüseynovanın yaşıdı, Çaldaş kənd sakini Gülü Qəfərova ilə də görüşümüz baş tutmadı. Kənd icra nümayəndəsi Eldar Qocayev dedi ki, hazırda Daşkəsənin Quşçu kəndində yaşayan qızının yanındadır. Bir müddət qabaq yıxılıb ayağı sınıb, yorğan-döşəkdən tərpənmir. Amma sonra öyrəndik ki, son vaxtlar xeyli dirçəlib, az da olsa gəzə bilir. Eldar Qocayev elə bizim yanımızda qızı ilə videogörüntü yaratdı. Nənə məni tanımasa da icra nümayəndəsini tanıdı, dərhal salamladı, hal-əhval tutdu, “yaxşı olsam, seçkiyə özüm gəlmək istəyirəm” dedi.
Gülü nənənin isə hazırda 16 nəvəsi, 22 nəticəsi var.
...Gədəbəydən qaş qaralanda ayrılıram. Narın qar yağır. Deyirlər qar yağmayanda, necə deyərlər, qış qış kimi keçməyəndə, bu yerlərin adamlarının qaşı-qabağı açılmır. Belə qəbul olunub ki, qar ruzi-bərəkət gətirir. Amma indi baxıram, gədəbəylilər daha çox sevinir, təkcə ona görə yox ki, yaxşıca qar yağır, həm də qarşıdan tarixi bir gün, 7 fevral gəlir...
Hamlet QASIMOV,
XQ-nin bölgə müxbiri,
Gədəbəy