Mən gülləri həmişə sevmişəm. Onlar da insan kimidir. Sevir, sevilir, əzizlənir, içində tikanlısı da var, tikansızı da. Gülləri belə görmüşəm…
O gün Bakıda acı şimal küləyi əsirdi. Gecədən şəhərə hücum edən ağır tanklar, zirehli maşınlar yolları al qana boyamışdı. Şəhərin “20 Yanvar” dairəsi (o zamanlar bura “XI Qızıl Ordu meydanı” deyirdilər) daha çox insan axınının olduğu məkandakı al qərənfillər artıq ertəsi gündən millətin şəhid olan övladlarına ağı deyirdi.
Qərənfillər şəhidlərimizin yerdə buz bağlamış qanına ləçəkləri ilə sarğı bağlamışdı. Xalqımızla qərənfillərin bu qədər böyük birliyini görməmişdim. Bakı kəndlərindən qucaq-qucaq qərənfillər şəhərin mərkəzinə axın edirdi.
Tarixin 20 Yanvar 1990-cı il faciəsini 34 ildir qərənfillər təkrar-təkrar yazır. Sədaqətli, mərhəmətli, fədakar olduğu qədər həssas, hər ağrımıza-acımıza fəryad qoparıb bizdən ayrılmayan qərənfillər…
Bəli, məhz 20 Yanvar gecəsindən sonra qərənfil gülü bizimlə – xalqımızla birgə sirdaş oldu, yaralarımıza özünün “loğman” sehrini damcılatdı. Susmadı qərənfil… Bütün qərənfilləri harayına çağırdı. Bizim birliyimiz kimi, qərənfillərin də birliyini gördüm. Bakının matəm günlərinin təsəllisi, qüruru idi qərənfillər…
20 Yanvar faciəsi zamanı şəhid olanlar Azərbaycan xalqının birliyi sayəsində həmin Dağüstü parkda al qərənfillərin izdihamı ilə dəfn olundular. Dərdlərimizə məlhəm qərənfillər şəhidlərimizi bağrına basmışdı. Çünki gül məhəbbəti xalqımızın gücünə tapınmışdı, bu birliyi heç bir qüvvə sındıra, sarsıda bilməzdi.
Zamanla addımlayan, vəfalı qərənfil. Hər zaman bizimləsən, məğrursan, qan yaddaşımızı korşalmağa qoymursan. Elə sənin əzəmətin budur, qərənfil!
Gülçü dostlarım deyirdilər ki, güllər çox həssasdır, onları sevin, qərənfili isə heç bir gülün yanına qoymayın. O, yalnız qərənfillərlə bir yerdə olmaq istəyir, çox dözümlüdür, gec solur, başqa güllərə bənzəmir.
Düz 34 ildir ki, qərənfil bizimlə yol gəlir. O da bizim kimi kədərlənir, təəssüflənir, amma qürurunu sındırmır. Şəhidlərimizə tər nəfəsi ilə bir məlhəmdir, bir sükutdur qərənfil! Heç vaxt onları tək buraxmır. Elə hey isti nəfəsi ilə soyuq məzarları bağrına basır.
Şəhidlərimizi tərk etməyən, yağış kimi məzarlara yağıb, onlarla öyünən qönçə qərənfillər. Tarix yaşayıb, tarix yazan, zamana sığmayan şahid qərənfillər…
Bura Azərbaycandır! Bura al qərənfillərin vətənidir! Bura şəhidlik zirvəsini müqəddəs ocaq bilən insanların torpağıdır!
Qərənfilim mənim, ağlama! Tər nəfəsinlə həmişə məğrurluğunu saxla. Sən haqq yolunun qərənfilisən! Nə qədər biz varıq, sən də varsan, Qərənfil!
Şəhidlər xiyabanının əbədi sakini –qərənfil!
Kəmalə ABDİNOVA
XQ