Professor Olqa Şişova bu günlərdə qaraciyərdə yaranan problemləri açıqlayıb. Bildirib ki, Yeni il şənliklərində yemək və içki çoxluğundan qaraciyər yüklənir.
Həkim bildirib ki, qaraciyərin yükləndiyini daimi yorğunluq, iştahın itməsi, sağ tərəfdə qabırğa altında ağrı, dərinin saralması, qəbizlik, ağızda acılıq, ayaq və dizlərdə narahatlıq, ürəkbulanma, dəridə səpkilər kimi əlamətlər bildirir. Həmin siqnallar istənilən an bu orqanda pozulma ola biləcəyini göstərir.
Qaraciyərin sağlamlığını qorumaq üçün düzgün, az və faydalı qidalanmaq, alkoqol və yağlı qidadan imtina etmək, toksinlərdən – pestisid, rəng, sənaye maddələri, kimyəvi maddələr, həlledicilərdən uzaq durmaq lazımdır. Zərərli peşədə işləyənlər müdafiə geyimində və maskada olmalıdır.
Bundan başqa, fiziki aktiv olmaq, normal maddələr mübadiləsini və çəkini qaydada saxlamaq, ildə 1 dəfə müayinədən keçmək lazımdır.
Həkim onu da tövsiyə edir ki, qaraciyəri özbaşına müalicə etmək olmaz. Bunun üçün mütəxəssisə müraciət etmək, düzgün təyinat almaqda fayda var.
Z.HÜSEYNLİ
XQ
