Məhbub Xoşkəlam 1909-cu ildə Sərab məhalının Çöllü kəndində yoxsul kəndli ailəsində anadan olmuşdur. O, məktəbə gedib oxumaq əvəzinə, özgə təsərrüfatlarında işləməyə məcbur olmuşdu. Cavan ikən öz doğma kəndindən baş götürüb iş dalınca şəhərlərə getmişdi. O, İranın mövcud irtica quruluşunun ağırlığını öz çiyinlərində hiss etdikcə, ona qarşı daha çox nifrət etmiş, bu vəziyyətdən çıxış yolu axtarmışdı.
1941-ci ildə Hizbe Tudə İran yarananda onun sıralarına qoşulan Məhbub onun məram və şüarlarının yayılmasına xidmət edir. 1945-ci ildə Azərbaycan Demokrat Firqəsi təşkil olunanda isə Məhbub Xoşkəlam bu partiyaya öncüllər sırasında qoşulur. Sərab Vilayət Komitəsinin Təftiş komissiyasının sədrliyinə seçilmiş Xoşkəlam Milli Hökumətin ictimai, iqtisadi islahatın həyata keçirilməsinə çalışır.
Məhbub Xoşkəlam “21 Azər” hərəkatında əldə silah fəal surətdə iştirakına görə Azərbaycan Milli Məclisi tərəfindən “21 Azər” medalı ilə təltif olunur. Torpaq islahatı, maarif şəbəkələrinin genişlənməsi işlərində Xoşkəlam Milli Hökumətin məmurlarına kömək edir. O, Sərab bələdiyyəsinə seçilir, şəhərin abadlığı və asayişinin təmin edilməsində firqə və hökumət göstərişlərini ardıcıl yerinə yetirir.
Şah qoşunları 1946-cı ilin dekabrında Azərbaycana xaincəsinə basqın etdikdə Məhbub Xoşkəlam vəhşicəsinə qətlə yetirilir. Sərab zəhmətkeşlərinin mübariz oğlu Məhbub Xoşkəlamın xidmətləri, onun xatirəsi azadlıqsevər güneylilərin qəlbində yaşayır.
Hüseyn RƏHİMZADƏ
