Mədəniyyət Nazirliyinin təşkilatçılığı ilə noyabrın 27-dən dekabrın 3-dək Azərbaycanda yaradıcı sənayelər həftəsi (“Yaradıcı həftə”) keçiriləcək. Layihənin məqsədi mədəniyyət və yaradıcı sənayelərin vahid sahə kimi formalaşması, bazar iştirakçılarının fəaliyyətinin dəstəklənməsi və sahəvi klasterləşmənin təşviqidir.
Bu münasibətlə təşkil olunan mətbuat konfransında mədəniyyət nazirinin müşaviri Cahangir Səlimxanov və digər rəsmilər jurnalistləri maraqlandıran mövzular, o cümlədən “Yaradıcı həftə” çərçivəsində həyata keçiriləcək tədbirlər barədə məlumat veriblər. Qeyd olunub ki, həftədə müvafiq dövlət qurumlarının rəhbərləri, yaradıcı sektorun təmsilçiləri, onlarla beynəlxalq və yerli təşkilatın nümayəndələri, yüzlərlə yaradıcı şəxs, şirkətlər və ictimai birlikləri iştirak edəcəklər.
“Yaradıcı həftə” çərçivəsində Mədəniyyət və Yaradıcı Sənayelər Forumu və sərgisi, “Yaradıcı müzakirələr”, Musiqi Sənayesi Platforması təşkil ediləcək, “GƏL, YARAT! Yaradıcılıq üzrə Marafon, Türk Dünyası Yumor Festivalı, “CINEMO” Mobil Film Festivalının açılışı baş tutacaq, “Disney” studiyasının 100 illiyi qeyd olunacaq, eləcə də milli filmlərin ali məktəblərdə nümayişləri, hakatonlar, təlimlər, türk dünyasının elektronik musiqi gecəsi, moda tədbirləri, təqdimat və digər tədbirlər keçiriləcək.
Qeyd edək ki, “Yaradıcı həftə” paytaxtla yanaşı, bölgələri də əhatə edəcək.
XQ