Akademik Zərifə Əliyevanın 100, Milli Oftalmologiya Mərkəzinin Masallı filialının 15 illiyinə həsr olunmuş “Azərbaycanın Regionlarında oftalmoloji yardımın optimallaşdırılması” mövzusunda XI Regional konfrans keçirilib. Azərbaycan Oftalmoloqlar Cəmiyyətinin təşkil etdiyi məclisin Masallıda keçirilməsində məqsəd oftalmologiya sahəsində baş verən yenilikləri, nailiyyətləri araşdırmaq, təkliflər vermək, bu sahədə baş verən ən son yeniliklərdə region həkimlərinin iştirakını təmin etmək və onların da bu yeniliklərdən istifadəsinə dəstək olmaqdır.
Konfransı giriş sözü ilə Azərbaycan Oftalmoloqlar Cəmiyyətinin sədri, Akademik Zərifə Əliyeva adına Milli Oftalmologiya Mərkəzinin direktoru, professor Elmar Qasımov açaraq tədbirin keçirilmə məqsədindən, Masallı filialının 15 il ərzindəki fəaliyyətindən, əhaliyə yüksək xidmətindən bəhs edərək oftalmologiyanın regionlarımızda durmadan artan inkişafını və gələcəkdə daha da irəli getməsi ilə bağlı görüləcək işlərdən bəhs edib. O, həmçinin yüksək ixtisaslı səhiyyə kadrlarının hazırlanmasına hər zaman dəstəyini davam etdirəcəyini bildirib.
Türk Cümhuriyyəti Oftolmoloji Dərnəyinin (TCOD) fəxri sədri Dr. Sunay Duman, TCOD-un sədri professor Öner Gelişken, Türkiyə Oftalmoloji Dərnəyinin sədri, professor Ziya Kapran və Suleyman Kaynak Masallı filialının 15 illiyi münasibəti ilə keçirilən məclisə videoformatda qoşulublar.
Sonra məruzələr dinlənildi, müzakirələr aparıldı.
Zərifə BƏŞİRQIZI
XQ